Eloko nini ezali mpenza na ntina?

MOKOLO moko, moto moko akendaki kotala Yesu. Moto yango ayebaki ete Yesu azalaki na bwanya mpenza, yango wana alobaki na ye boye: ‘Moteyi, yebisá ndeko na ngai apesa ngai ndambo ya biloko oyo azali na yango.’ Moto yango akanisaki ete asengeli kozwa ndambo ya biloko ya ndeko na ye.

Soki yo nde ozalaki Yesu, olingaki koloba nini?— Yesu amonaki ete moto yango azalaki na mokakatano moko. Kasi moto yango azalaki mpenza na mposa ya biloko ya ndeko na ye te. Mokakatano na ye ezalaki ete ayebaki te eloko nini ezali mpenza na ntina na bomoi.

Tókanisa naino likambo yango. Eloko nini esengeli kozala mpenza na ntina koleka mpo na biso? Esengeli nde kozala biloko ya kosakana na yango ya kitoko, bilamba ya sika, to biloko mosusu ya ndenge wana?— Te, ezali na eloko moko oyo ezali na ntina mingi koleka. Mpe yango nde likambo oyo Yesu alingaki koteya. Yango wana abɛtaki lisolo ya moto moko oyo abosanaki Nzambe. Okosepela koyoka lisolo yango?—

Moto moko azalaki na bomɛngo mpenza. Azalaki na bilanga mpe na bandako ya kobomba mbuma ya bilanga. Bilanga na ye ebotaki malamu mpenza. Na bandako na ye nyonso ya kobomba mbuma, esika ezalaki kutu te mpo na kobomba mbuma oyo abukaki na bilanga na ye. Na bongo, asengelaki kosala nini? Alobaki na motema na ye ete: ‘Nakobuka bandako na ngai ya kobomba mbuma mpe nakotonga mosusu ya minene koleka. Na nsima, nakobomba mbuma na ngai nyonso oyo nabuki mpe biloko na ngai nyonso ya malamu na bandako oyo ya sika.’

Moto wana ya bomɛngo akanisaki ete kosala ndenge wana ezali malamu. Akanisaki ete azali na bwanya mingi ndenge abombi biloko ebele. Akanisaki na motema na ye boye: ‘Nazali na ebele ya biloko ya malamu oyo ebombami. Ekosalisa ngai bambula ebele. Na bongo sikoyo nakoki kofanda na ngai. Nakolya, nakomɛla mpe nakomisepelisa.’ Kasi makanisi na ye ezali malamu te. Oyebi mpo na nini?— Azalaki kokanisa kaka makambo na ye mpe bisengo na ye. Abosanaki Nzambe.

Yango wana, Nzambe alobaki na moto yango ya bomɛngo boye: ‘Ozali zoba. Okokufa na butu oyo. Sikoyo nani akozwa biloko nyonso oyo osili kobomba?’ Moto wana ya bomɛngo azalaki lisusu na likoki ya kosalela biloko yango nsima ya liwa na ye?— Te, moto mosusu nde akosalela yango. Yesu alobaki ete: “Ezali mpe bongo mpo na moto oyo abombi eloko ya motuya mpo na ye moko kasi azali moto ya bomɛngo te epai ya Nzambe.”​—Luka 12:13-21.

Okolinga te kozala lokola moto wana ya bomɛngo, ezali bongo te?— Likambo ya ntina mingi na bomoi na ye ezalaki kaka kozwa biloko ya mokili. Azalaki komikosa. Mposa na ye ezalaki kaka ya kokóma na biloko mingi. Kasi azalaki “moto ya bomɛngo te epai ya Nzambe.”

Bato mingi bazali lokola moto wana ya bomɛngo. Bato yango balingaka kaka kozala na biloko ebele. Kasi yango ekoki kobimisela bango mikakatano minene. Tópesa ndakisa: Ozali na biloko oyo osakanaka na yango, ezali bongo te?— Biloko nini ya kosakana ozali na yango? Yebisá ngai.— Okosala nini soki omoni baninga na yo bazali na bale to na mwana-popi to eloko mosusu oyo yo ozali na yango te? Okanisi ete ekozala malamu otungisa baboti na yo básombela yo mpe yango?—

Na bantango mosusu, eloko moko ya kosakana na yango ekoki komonana ete ezali na ntina mingi. Kasi na nsima, ekómaka ndenge nini?— Ekómaka ya kala. Ekoki ntango mosusu kopasuka, mpe na nsima okosepela kutu na yango lisusu te. Kasi, ozali na eloko moko oyo ezali na ntina mingi koleka biloko oyo osakanaka na yango. Oyebi eloko yango?—

Ezali bomoi na yo. Bomoi na yo ezali na ntina mingi mpo soki ozali na bomoi te, okoki kosala ata eloko moko te. Kasi mpo ozala na bomoi, osengeli kosala makambo oyo esepelisaka Nzambe, ezali bongo te?— Lokola ezali bongo, tózala te lokola moto wana ya bomɛngo kasi zoba oyo abosanaki Nzambe.

Ezali kaka bana mike te nde bakoki kosala makambo ya bozoba lokola moto wana ya bomɛngo. Mikóló mingi mpe basalaka bongo. Mikóló mosusu balingaka kaka kozala na ebele ya biloko. Ekoki kozala ete bazali na biloko ya kolya oyo esengeli mokolo na mokolo, bilamba ya kolata, mpe esika ya kofanda. Kasi bamonaka ete ekoki kaka te. Balingi kozala na bilamba ebele mpe na bandako ya minene. Biloko wana esɛngaka mbongo mingi. Yango wana babomaka nzoto na mosala mpo na kozwa mbongo ebele. Mpe ata soki bazwi mbongo mingi, bazalaka kaka na mposa ya mbongo mosusu.

Mikóló mosusu bamipesaka kaka na koluka mbongo mpe bazangaka ntango ya kozala elongo na mabota na bango. Bazalaka mpe na ntango te mpo na makambo ya Nzambe. Mbongo na bango ekoki kopekisa bango bákufa?— Te, ata moke te. Bakoki nde kosalela mbongo na bango nsima ya liwa na bango?— Te. Bakosalela yango te mpo bato oyo bakufá bakoki kosala ata eloko moko te.​—Mosakoli 9:5, 10.

Yango elingi koloba ete kozala na mbongo ezali mabe?— Te. Mbongo ekoki kosalisa biso mpo na kosomba biloko ya kolya mpe bilamba. Biblia elobi ete mbongo ebatelaka. (Mosakoli 7:12) Kasi soki tozali kolinga mbongo mingi, yango ekobimisela biso mikakatano. Tokozala lokola moto wana ya bomɛngo kasi zoba oyo amibombelaki biloko ya motuya kasi azalaki moto ya bomɛngo te na miso ya Nzambe.

Kozala moto ya bomɛngo na miso ya Nzambe elingi koloba nini?— Elingi koloba kotya Nzambe na esika ya liboso na bomoi na biso. Bato mosusu balobaka ete bandimaka Nzambe. Bakanisaka ete kozala na kondima mpamba ekoki. Kasi, bato yango bazalaka mpenza bato ya bomɛngo na miso ya Nzambe?— Te, bazali lokola moto wana ya bomɛngo oyo abosanaki Nzambe.

Yesu abosanaki Tata na ye ya likoló ata moke te. Alukaki kozala na ebele ya mbongo te. Azalaki mpe na ebele ya biloko te. Yesu ayebaki eloko oyo ezalaki mpenza na ntina na bomoi. Oyebi eloko yango?— Ezali kozala moto ya bomɛngo na miso ya Nzambe.

Yebisá ngai naino, ndenge nini tokoki kozala bato ya bomɛngo na miso ya Nzambe?— Tokoki kozala bato ya bomɛngo na miso ya Nzambe soki tozali kosala makambo oyo esepelisaka ye. Yesu alobaki ete: “Nasalaka ntango nyonso makambo oyo esepelisaka ye.” (Yoane 8:29) Nzambe asepelaka ntango tozali kosala makambo oyo alingi ete tósala. Sikoyo, yebisá ngai, makambo nini okoki kosala mpo na kosepelisa Nzambe?— Ya solo, okoki kotánga Biblia, kokende na makita ya boklisto, kobondela Nzambe, mpe kosalisa bato mosusu báyekola makambo ya Nzambe. Yango nde makambo eleki mpenza ntina na bomoi ya moto.

Lokola Yesu azalaki moto ya bomɛngo na miso ya Nzambe, Yehova abatelaki ye. Apesaki Yesu mbano ya kozala na bomoi libela na libela. Soki tozali lokola Yesu, Yehova akolinga biso mpe akobatela biso mpe. Yango wana, tózala lokola Yesu mpe tózala ata moke te lokola moto wana ya bomɛngo oyo abosanaki Nzambe.