Mituna na batangi

Yobo 33:24 ezali kolobela “lisiko” lizwamaki mpo na Yobo, oyo lisalisaki ye ete akufa te. Nani azalaki lisiko yango?

Na eleko wana. mbeka moko te ya lisiko na bomoto epesamaki mpo na Yobo, kasi Nzambe azipaki, to alimbisaki libunga ya mosaleli na ye.

Satana ayokisaki Yobo bampasi mingi, moko na yango ezali “bibimba mabe longwa na matambe na makolo na ye kino epai na likolo na moto na ye.” Ezalela na Yobo ekomaki mabe koleka na boye ete mwasi na ye alobaki na ye: “Lakelá Nzambe mabe mpe kufa na yo!” Ye moko amitunaki soki liwa lizalaki malamu te koleka mpasi motindo wana.​—Yobo 2:7-9; 3:11.

Wana emonanaki ete etikalaki moke Yobo akufa, Elihu asosolaki ezalela na mpasi oyo tata wana azalaki kati na yango mpe atyaki moboko ya elikya, na kolobaka ete: “Mosuni na ye elyami kino emonani te. . . . Ee, molimo na ye ebelemi na nkunda, bomoi na ye epai na babebisi. Soko ntoma azalaki mpo na ye, molobeli, moko kati na nkoto, mpo na kosakwela moto sembo na ye, ye mpe azali na ngolu epai na ye, ye ete: ‘Bikisa ye ete akita na libulu te, nasili komona lisiko! Tika ete mosuni na ye eleka yango na elenge na kitoko, ezonga na mikolo na bolenge na ye!’”​—Yobo 33:21-25.

Toyebi ete Yesu Klisto apesaki bomoi na ye ya moto na kokoka lokola lisiko likokani mpo na bato bazangi kokoka Mbeka na ye efutaki mpenza eloko oyo Adam abungisaki mpe afutaki motuya mosengamaki mpo na kosikolama na lisumu. (Baloma 5:12-19; 1 Timote 2:5, 6) Nzokande, ezali bobele esaleli moko wana te oyo Biblia ezali kosalela liloba “lisiko.” Liloba na liebele oyo tozali kokuta kati na Yobo 33:24 elimboli mpenzampenza “ezipeli.” (Exode 25:17) Na ntango oyo azalaki na boyokani elongo na Yisraele ya kala, Nzambe asalaki ebongiseli mpo na ‘kozipa’ to kosala mbondi mpo na masumu: ezalaki ebongiseli ya kopesa mbeka, oyo ezalaki kozipa masumu, oyo ezalaki kobongisa makambo kati na Nzambe mpe bato.​—Exode 29:36; Levitike 16:11, 15, 16; 17:11.

Liboso na yango, Nzambe asilaki kondima mbeka lokola mabondeli to malombo oyo na nzela na yango bato bazalaki kosenga ye lilimbisi to koluka kondimama epai na ye. (Genese 4:3, 4; 8:20, 21; 12:7; 31:54) Yobo ayebaki motuya ya mbeka yango. Tozali kotanga ete: “Azalaki kolamuka na ntongontongo mpe azalaki kobimisa mbeka na kotumba mpo na motuya na [bana na ye nyonso], mpamba te Yobo alobaki ete: ‘mbala mosusu bana na ngai basali masumu mpe balakeli Nzambe mabe na mitema na bango.’ Yobo asalaki bongo mikolo nyonso.” (Yobo 1:5, MN) Mpo ete azalaki komeka komonana moto malamu liboso na Nzambe mpe azalaki ntango nyonso na elimo etutami, mbeka na ye ezalaki na motuya na miso na Nzambe.​—Nzembo 32:1, 2; 51:17.

Nzokande, na nsima Yobo anyokwamaki na maladi oyo mbele ekokaki koboma ye. Azalaki mpe na likanisi mabe na ntina na boyengebene na ye. Azalaki bongo na mposa ete apamelama, mpe ezali yango nde Elihu asalaki. (Yobo 32:6; 33:8-12; 35:2-4) Elihu alobaki na Yobo ete akotikala libela te kati na ezalela wana ya mawa kino akufa mpe kokota kati na libulu (Schéol to nkunda na bakufi). Soki abongoli motema, “lisiko” likokaki komonana.​—Yobo 33:24-28.

Tosengeli kokanisa te ete “lisiko” oyo Elihu azalaki kolobela ezalaki moto oyo, na eleko wana, asengelaki kokufa mpo na Yobo. Na kotalela lolenge na mbeka oyo basambeli na solo ya Nzambe bazalaki kopesa na eleko wana, ekoki kozala ete lisiko oyo Elihu azalaki kolobela kati na likambo na Yobo ekokaki kozala mbeka na nyama. Tala, na ntina yango, oyo Nzambe alobaki na nsima epai na baninga misato oyo bazalaki kotónga Yobo: “Boye sasaipi bokamata ngombe nsambo mpe mpate nsambo mpe bokenda epai na moombo na ngai Yobo ete bokaba likabo na kotumba mpo na bino; moombo na ngai Yobo akobondela mpo na bino.” (Yobo 42:8) Ezala ata lisiko ya motindo nini, likambo oyo Elihu alingaki komonisa, ezali ete Yobo akokaki komona libunga na ye lizipami mpe kosepela na bolamu oyo ekouta na yango.

Ezali yango nde esalemaki Yobo abongolaki motema na mputulu mpe na mputulu na moto’ mpe “Jehovah ye moko [akangolaki] Yobo. . . . Mpe Jéhovah apambolaki mikolo na nsuka na Yobo koleka yango na ebandeli na ye. . . . Na nsima na oyo, Yobo aumelaki na bomoi mibu nkama na ntuku minei; amonaki bana na ye mpe bana na bana na ye kino mabota minei.” Ezali solo ete, lisiko wana lisikolaki Yobo na lisumu te; yango wana asukaki na kokufa. Kasi, bomoi molai na ye wana emonisi ete nzoto na Yobo ekomaki mpenza ‘na kitoko koleka yango na elenge mpe azongaki na mikolo na bolenge na ye.’​—Yobo 33:25; 42:6, 10-17.

Bolamu oyo Yobo azwaki na lisiko wana, oyo mosala na yango ezalaki na ndelo, ezalaki komeka moke na ebele na mapamboli oyo bato na kondima bakozwa yango kati na mokili ya sika. Na ntango wana, mbeka na lisiko na Yesu ekokokisa mpenza mosala na yango mpe ekosilisa libela bampasi nyonso euti na lisumu mpe na kozanga kokoka. Engebene maloba na Elihu, tokozala na ntina nyonso na “konganga na esengo.”​—Yobo 33:26.