Mabondeli nini mandimami na Nzambe?

JÉHOVAH azali Nzambe oyo akondimaka mabondeli. Na yango, abengami kati na Liloba na ye, Biblia ete, Ye oyo ‘akoyokaka mabondeli,’ mpe andimaka mabondeli. (Nzembo 65:2) Kasi, andimaka mpenza mabondeli ya nani? Nzambe akondimaka mabondeli ya baoyo bakolukaka kosepelisa ye, baoyo bazali na ezaleli na kobanga Nzambe lokola mokomi na nzembo oyo alobaki ete: “Lokola mbuli aoki mposa na komele miluká na mai, boye molimo na ngai mozali kooka mposa na yo, Nzambe. Molimo na ngai mooki mposa mpo na Nzambe, mpo na Nzambe na bomoi.” (Nzembo 42:1, 2) Kasi ndenge nini komonisa ete Jéhovah andimaka mabondeli ya basambeli na ye ya solo?

Bilembeteli bimonisi ete Nzambe andimaka mabondeli

Biblia ezali na bilembeteli mingi oyo bimonisi ete Jéhovah andimaka mabondeli ya basaleli na ye ya sembo. Na ndakisa, na ntango Yosafata, mokonzi na Yuda, abondelaki mpo na kosɛnga Nzambe ete abikisa bato na ye, Jéhovah andimaki libondeli na ye mpe apesaki ye elonga na kotyáká mobulungano ete banguna babomana bango moko. (2 Ntango 20:1-26) Bobele bongo, wana mokonzi Ezekiase akutanaki na limpinga ya makasi, abondelaki Nzambe na komikitisa nyonso ete asalisa ye. Ezekiase amonaki libateli na Jéhovah na ntango anzelu abomaki Basulia 185 000, na butu moko.​—Yisaya 37:14-20, 36-38.

Mpo na nini Nzambe andimaki mabondeli wana? Na makambo nyonso mibale, bakonzi wana bazalaki komitungisa ete nkombo na Jéhovah mbɛlɛ ekotyolama soki bazwi elónga te. (2 Ntango 20:6-9; Yisaya 37:17-20) Bazalaki komibanzabanza mpo na lokumu na ye. Encyclopédie moko (The lntermtional Standard Bible Encyclopedia) elimboli ete: “Mokano ya liboso ya libondeli ezali mpo na kokumisa nkombo na Nzambe, kasi ezali te mpo na kosɛnga bobele na ntina na bolamu ya moto ye moko.” Na bongo, basaleli na sembo na Jéhovah bakoki kondimisama ete akosalisa bango “mpo na nkombo na ye.” Masoló oyo mazali komonisa ete mabondeli motindo wana mandimamaki, ezali kondimisa basambeli na Nzambe ete ye ayokaka mabondeli na bango.​—Nzembo 91:14, 15; 106:8; Masese 18:10.

Kasi, ata soki nkombo na Jéhovah etalelami kati na likambo moko, ezali ye nde azali na lotómo ya kondima to mpe koboya libondeli. Akoki kozala na bantina malamu ya koboya kondima mabondeli mosusu. Soki tomoni lokola ete mabondeli na biso mandimami na Nzambe te, tokanisa na likambo oyo lipekisi yango.

Mpo na nini mabondeli mosusu mandimami na Nzambe te?

Mokolo moko, Jéhovah alobaki na Bayisraele ete: “Ata bokobondela mabondeli mingi mpenza, nakoyoka bino te.” Alimboli ntina, ete: “Mabɔkɔ na bino matondi na makila.” (Yisaya 1:15) Moto akoki nde kobuka mobeko na Jéhovah na nko mpe kolikya koyokama na ye? Lisese moko ya Biblia lipesi eyano ya polele, ete: “Ye oyo akolongola litoi na ye ete ayoka mobeko te, ata libondeli na ye likozala eloko na koboyama.”​—Masese 28:9.

Biblia ezali kopesa ntina mosusu oyo mabondeli mosusu mandimami te. Totangi boye: “Bokolɔmbaka nde bokozwaka te, mpamba te bokolɔmbaka na makanisi mabe, ete bobebisa yango mpo na kokokisa bamposa na bino mabe.” (Yakobo 4:3) Jéhovah akoki kondima te libondeli lisalemi mpo na kosepelisa bamposa mabe. Tosengeli mpe komikundola ete Nzambe azali kolanda mitinda miuti epai na bato te. Ezali ye nde akozwa ekateli mpo na motindo oyo asengeli kondima mabondeli na biso.

Mabondeli oyo makondimama mazali maye mauti na motema na peto, oyo masalemi na mikano malamu mpe matindami epai na Nzambe lokola asɛngi yango ye moko, na nzela na Yesu Klisto. (Yoane 14:6, 14) Kasi ata baoyo bazali kobondela na kotósáká masɛngami wana, bazali mbala mosusu na liyoki ete mabondeli na bango mayokami te. Mpo na nini mabondeli mosusu ya basaleli na Nzambe makondimamaka mbala moko te?

Jéhovah ayebi ntango nini ebongi mpo na kondima mabondeli. Ata soki mwana asengi velo, mbala mosusu tata na ye akosombela ye yango te wana ekómi ye naino te na mbula oyo asengeli kopusa yango na makoki nyonso ya komibatela. Likambo oyo lizali mpe kosalelama mpo na mabondeli mosusu oyo masalemi na baoyo balingi Nzambe. Lokola ayebi eloko ezali malamu mpo na bango, azali kopesa bango oyo bazali na yango mposa, na ntango eleki malamu.

Lisusu, Jéhovah akopesaka mpenza te epai na basaleli na ye, biloko nyonso oyo bazali kosenga kati na mabondeli na bango. Lokola bazangi kokoka, basaleli na ye bakoki kosɛnga ata biloko oyo bikozala malamu te mpo na bango. Tata na bango atondi na bolingo akopesa bango te eloko oyo ekoki kozala likámá mpo na bango, mpamba te ye azali Mopesi na “makabo nyonso malamu mpe makabo nyonso mabongi.” (Yakobo 1:17) Bobele bongo, Nzambe akoki kopesa to koboya kopesa eloko oyo, emonani na ye ete, ezali na ntina te. (Tala 2 Bakolinti 12:7-10.) Akoyanolaka na mabondeli oyo mayokani na mokano na ye mpe na mwango asili kotya mpo na libota na ye.​—1 Yoane 5:14, 15.

Yesu “ayokamaki”

Yesu Klisto azalaki moto na kosala mabondeli mingi. (Matai 6:9-13; Yoane 17:1-26) Andimisamaki mpenza ete, Tata na ye na likoló azalaki koyoka ye mpe azalaki kondima mabondeli na ye. Mokolo moko alobaki ete: “Tata, . . . nayebi ete okoyokaka ngai ntango nyonso.” (Yoane 11:41, 42) Kasi Yesu alɛmbaki te na nsuka ya bomoi na ye awa na mabelé? Angangáki boye te ete: “ Ɛ Nzambe na ngai, Ɛ nzambe na ngai, mpo na nini otiki ngai?”​—Matai 27:46.

Na maloba wana, Yesu akokisaki mpenza esakweli moko na ntina na liwa na ye. (Nzembo 22:1) Mbala mosusu Yesu asalelaki maloba wana na ndimbola na yango ya polele, oyo elingi koloba ete Jéhovah alongolaki libateli na ye epai na Mwana na ye mpe apesaki nzela ete akufa na liwa ya mpasi mpe na nsoni, ete bosembo na ye botyama na komekama. Botaleli malamu ya makambo oyo malekaki na mokolo ya nsuka na bomoi na Yesu awa na mabelé, emonisi ete Nzambe ayokaki mabondeli na ye.

Na butu oyo bakangaki ye, Yesu abondelaki na elanga ya Getesemane. Abondelaki Nzambe mbala misato, ete: “Tata na ngai, soki ekoki, tika ete kɔpɔ oyo elongwa na ngai.” (Matai 26: 39, 42, 44) Yesu akakátanaki te likoló na likambo litali kopesa bomoi na ye lokola mbeka na lisiko mpo na bato oyo bakondima ye. Te, kasi mpo ete liwa oyo asengelaki kokufa likoló na nzete na mpasi, lokola motuki, ekokaki kotyola nkombo na Nzambe, emonani ete Yesu azalaki nde komitungisa mpo na lokumu ya Tata na ye, oyo ye alingaki mingi. Jéhovah ayokaki libondeli na Yesu?

Bambula mingi na nsima, ntóma Paulo akomaki ete: “Na mikolo na bomoi na ye, [Klisto] atombolaki mabondeli mpe malɔmbɔ na kongánga makasi mpe na mpisoli epai na ye oyo ayebi kobikisa ye na kufa mpe ayokami mpo na kotósa na ye malamu.” (Baebele 5:7; Luka 22:42, 44 ) Bongo, na butu oyo ezalaki liboso na liwa na ye, Yesu “ayokamaki” wana azalaki na mawa makasi. Kasi lolenge nini?

Jéhovah atindaki anzelu oyo “abimelaki ye [Yesu] mpe akembisaki ye.” (Luka 22:43) Wana akembisamaki, Yesu alongaki liwa likoló na nzeté na mpasi. Emonani ete, na ntango wana, Jéhovah andimisaki ye ete liwa na ye likoló na nzeté ekoyeisa nsoni te likoló na nkombo na Nzambe, kasi ekozala nde esaleli oyo ekokumisa nkombo yango. Ya solo, liwa na Yesu esikoli Bayuda longwa na kolakelama mabe na Mibeko, mpe efungwelaki bango nzela ya kobika na etumba ya liwa oyo ezalaki mpenza bozito likoló na bango.​—Bagalatia 3:11-13.

Mikolo misato na nsima, Jéhovah asekwisaki Yesu mpe asukolaki ye longwa na bifundeli nyonso na kotuka, na kotómbóláká ye na etelemelo moko monene kuna na likoló. (Bafilipi 2:7-11) Oyo nde eyano kitoko na libondeli oyo Yesu asalaki na ntina na “kɔpɔ oyo”! Jéhovah andimaki libondeli yango na motindo oyo ye moko alingaki. Mpe Yesu azwaki mapamboli kitoko, mpo ete alobaki na Tata na ye ya likoló, ete: “Mokano na ngai esalema te, kasi bobele mokano na yo.”​—Luka 22:42.

Lolenge nini Jéhovah azali kondima mabondeli na mikolo na biso

Na ndakisa na Yesu, baoyo bazali koluka kosepelisa Jéhovah lelo, basengeli ntango nyonso kosɛnga ete mokano na Nzambe mosalema. Basengeli komindimisa ete Jéhovah akoyanola na mabondeli na bango na motindo oyo ekozala na litomba mpo na bango. Ya solo, ‘ayebi kosala kati na biso makambo maleki nyonso ezali biso kolɔmba soko kobanza.’​—Baefese 3:20.

Elenge mwasi moko moklisto, oyo azalaki ko fanda esika moko na baboti na ye oyo bazalaki bandimi te, amonaki solo ya mokapo oyo ya Makomami. Mokolo moko, azwaki mokanda moutaki na biro ya la Société Watch Tower mpe batunaki ye na kotalela kati na libondeli, lisɛngi ya sipesiale oyo balɔmbaki ye ete andima koponama lokola misionere. Atako alingaki mpenza kofanda esika moko na baboti na ye mpo na kosalisa bango ete bakóma baklisto, elenge wana atunaki Nzambe kati na libondeli na ye, ete “Mokano na yo ezali nini? Esengeli na ngai kondima libyangi oyo kozanga kotalela mposa ya baboti na ngai baoyo bandimi yango te, to esengeli na ngai kofanda elongo na baboti na ngai mpo na kosalisa bango?” Ntango nyonso oya azalaki kobondela, lisosoli na ye ezalaki koloba na ye ete andima libyangi. Asukisaki ete, wana ezalaki eyano na Jéhovah.

Nzambe apesaki mwasi yango makasi ete asimba ekateli na ye. Na ntango batunaki ye ete akenda na esanga ya Awaji, na Japon, baboti na ye basepelaki te mpe bamekaki kobongola makanisi na ye. Kasi, na ntango mama na ye amonaki ete alongaki te, azwaki ekateli ya koyekola Biblia mpo na komeka koyeba ntina oyo mwana na bango aponi likambo motindo wana. Sanza misato na nsima, baboti na ye bakendaki kotala ye. Na komonáká lolenge oyo ba Témoins de Jéhovah mosusu bazalaki kosunga ye, tata na ye akamwaki mpenza mpe, ntango azalaki ye moko, alelaki. Mikolo mingi te na nsima, ye mpe abandaki koyekola Biblia. Na nsima, tata mpe mama ya elenge mwasi wana bazwaki batisimo mpe bakómaki basaleli na sembo na Jéhovah. Nzambe apambolaki moklisto mwasi wana mingi koleka. Boye te?

Mabondeli na bango mayokami

Ozali komikundola lisusu maloba ya mwasi oyo alobelami na ebandeli ya lisoló ya liboso? Azalaki komona lokola ete mabondeli na ye mandimami te. Kasi, akangaki ntina na nsima ete Nzambe azalaki kondima mabondeli na ye. Akomaki makambo na ntina oyo ye azalaki kotya kati na mabondeli na ye. Mokolo mosusu afungolaki carnet na ye mpe amonaki ete Jéhovah ayokaki mabondeli mingi oyo ye asalaki, ata oyo ye azalaki koyeba lisusu te! Asosolaki bongo ete Nzambe azalaki kobatela ye mpe azalaki kondima mabondeli na ye na bolingo, na motindo oyo ekokaki kozala na litomba mpo na ye.

Soki tozali na mayoki ete mabondeli na biso mandimami na Nzambe te, tomituna boye: “Nazali nde na boyokani malamu elongo na Jéhovah, Ye oyo ‘akoyokaka mabondeli’? Soki te, nazali nde kosala oyo esengeli mpo na koyeba ye mpe kokóma moko na basaleli na ye bamipesi?” Nzambe akondimaka mabondeli ya baoyo balingi ye mpe bazali kosala mokano na ye. Bato yango bazali ‘kolendendela kati na mabondeli’ mpe bayokami lokola Yesu ayokamaki. (Baloma 12:12) Na bongo, ‘tozipola mitema na biso’ liboso na Jéhovah. (Nzembo 62:8) Boye mabondeli na biso makoyokama.

Lelo, bamilió na bato bakobondelaka mpo na likambo moko ya sikisiki. Mpe Nzambe akoyokaka mabondeli na bango. Totala mpo na nini tokoki kondimisama ete mabondeli yango makondimama mpenza.