Mituna ya Batángi

Na Bafilipi 2:9, Paulo alobaki na ntina na Yesu ete: “Nzambe anɛtɔli ye mingi mpe apesi ye nkombo koleka nkombo mosusu nyonso.” Nkombo yango ya sika nini? Mpe soki Yesu akokani na Yehova te, lolenge nini nkombo ya Yesu eleki nkombo mosusu nyonso?

Bafilipi 2:8, 9 elobi ete: “Ezwami ye na motindo na moto, amisɔkisi mpe atosi kino kufa, ee, kino kufa [likoló na nzeté ya mpasi, NW]. Yango wana Nzambe anɛtɔli ye mingi mpe apesi ye nkombo koleka nkombo mosusu nyonso.”

Mokapo oyo elingi koloba te ete lokola bobele Yehova nde azali na nkombo oyo eleki mpenza nkombo mosusu nyonso, Yesu asengeli kozala bobele Yehova. Lokola makambo mazali kati na Bafilipi na mokapo 2 mazali komonisa yango, Yesu azwaki nkombo na ye oyo enɛtɔlami mingi nsima ya lisekwa na ye. Liboso, azalaki na yango te. Epai mosusu, uta kala Yehova azali likoló na bikelamu binso, mpe etɛlɛmɛlo na ye ebongwanaka soko moke te. Likambo oyo ete Yesu azwaki nkombo oyo etombwani koleka nkombo oyo azalaki na yango liboso na mosala na ye awa na mabelé emonisi ete azali Yehova te. Ntango Paulo alobaki ete Yesu apesamelaki nkombo oyo eleki nkombo mosusu nyonso, alingaki koloba ete sikawa, Yesu azwi nkombo oyo etombwani koleka nkombo ya bikelamu nyonso ya Nzambe.

Nkombo ya Yesu oyo eleki nkombo mosusu nyonso ezali nini? Yisaya 9:6 ezali kopesa biso nzela ya kozwa eyano. Kosakoláká na ntina na koya ya Yesu Masiya, mokapo yango molobi ete: “Bokonzi ekozala likoló na lipeka na ye, nkombo na ye akobyangama ete, Mosungi na kokamwa, Nzambe na nguya, Tata na seko, Nkolo na kimya.” Awa, “nkombo” ya Yesu ezali na boyokani na etɛlɛmɛlo na ye monene, oyo ezali mpe lolenge tozali kososola “nkombo [oyo eleki] nkombo mosusu nyonso” oyo elobelami kati na Bafilipi 2:9. Mabɔ́lɔ́ngɔ́ nyonso mapesami etindá ya kongumbama liboso na Yesu mpo na kondima etɛlɛmɛlo monene ya bokonzi oyo Yehova apesi ye​—etɛlɛmɛlo ya bokonzi eleki monene oyo epesamá naino na ekelamu moko te. Liloba “mosusu” oyo ezwami kati na libongoli wana emonani sikisiki te kati na Makomami ya Greke, kasi nde likanisi na yango liyokani kati na mokapo wana. “Nkombo” ya Yesu eleki nkombo na ye moko te kasi nde eleki nkombo ya bikelamu mosusu nyonso.

Oyo nde esengo tozali na yango wana tozali kosangana elongo na baanzelu ya sembo mpo na kongumba mabɔ́lɔ́ngɔ́ na biso lokola elembo ete tondimi nkombo ya Yesu! Tosalaka yango wana tozali kotosa Yesu na etɛlɛmɛlo eleki monene mpe ya nguya oyo Yehova asili kopesa ye​—“mpo na nkembo na Nzambe Tata.”​—Bafilipi 2:11; Matai 28:18.