Basalaki mokano ya Yehova

Malia aponi “oyo malamu”

NTANGO Yesu azalaki awa na mabelé, bonkɔkɔ ya balabi epekisaki basi Bayuda makambo mingi. Mpo na yango, bazalaki na makasi ya koyekola Mibeko te. Kutu, Mishnah elobi ete bato mosusu bazalaki koloba ete: “Soki tata moko alakisi mwana na ye ya mwasi Mibeko ezali lokola ateyi ye kindumba.”​—Sotah 3:4.

Yango wana, na ekeke ya liboso basi mingi ya Yudea bakɔtaki mpenza kelasi te. Buku moko (The Anchor Bible Dictionary) elobi ete: “Longola bana mike, eloko moko te elakisi ete liboso Yesu abanda mosala na ye ya koteya, basi Bayuda bazwaki ndingisa ya kozala bayekoli ya moteyi moko monene, ya kosala mibembo elongo na molakisi yango, to koteya bato mosusu.” Mpo na kokitisa lisusu basi malamumalamu, bakonzi mosusu ya lingomba babimisaki mobeko ete mobali akoki te kosolola na mwasi na miso ya bato nyonso!

Yesu alandaki makanisi wana te, yango eutaki na Nzambe te. Ateyaki basi na mibali, mpe na kati ya bayekoli na ye basi mpe bazalaki. (Luka 8:1-3) Mokolo moko, Malata na Malia babéngisaki Yesu na ndako na bango. (Luka 10:38) Basi yango mibale bazalaki bandeko ya Lasalo, mpe bango nyonso misato bazalaki bayekoli mpe baninga mpenza ya Yesu. (Yoane 11:5) Ekoki kozala ete libota yango eyebanaki mingi, soki totaleli ebele ya bato oyo bayaki kobɔndisa Malata na Malia ntango Lasalo akufaki. Atako ezali bongo to te, likambo oyo esalemaki na ndako na bango ntango bayambaki Yesu epesaki liteya moko monene ezala mpo na bango to mpo na biso.

Alandi mateya na mokolo ya Yesu

Na ntembe te, Malata na Malia balingaki básalela Yesu feti moko monene, mpe ekoki kozala ete bazalaki na makoki ya kosala yango. (Talá Yoane 12:1-3.) Kasi, ntango mopaya na bango akómaki, Malia “afandaki epai na makolo na Nkolo koyoka maloba na ye.” (Luka 10:39) Mibeko ya bonkɔkɔ ekokaki kopekisa Yesu te koteya mwasi ya sembo wana oyo azalaki na mposa ya koyoka mateya! Tokoki komona na makanisi Malia afandi liboso ya Yesu, lokola mwanakelasi oyo atii likebi na ye nyonso na mateya ya Molakisi na ye.​—Talá Deteronome 33:3; Misala 22:3.

Malata asalaki lokola Malia te, ye “azalaki kotungisama mpo na mosala mingi.” Lokola azalaki kolamba elubu ya malonga, azalaki mpenza na misala mingi. Mosika te, Malata ayokaki nkanda na ndenge oyo ndeko na ye atikelaki ye misala nyonso mpe akendaki na ye kofanda na makolo ya Yesu! Malata akataki Yesu maloba, ntango mosusu asɛngaki ata nzela te, alobaki ete: “Nkolo, ezali na miso na yo likambo te ete ndeko na ngai atiki ngai kosala mosala ngai moko? Lobá na ye ete aya kosunga ngai.”​—Luka 10:40.

Likambo Malata asɛngaki ezalaki mabe te. Soki totali malamu kolamba bilei ya bato ebele ezali mosala monene, mpe ebongi te kotika mokumba wana nyonso se na moto moko. Kasi, Yesu alandaki maloba na ye mpo na kopesa liteya moko monene. Alobaki ete: “Malata, Malata, ozali na motema na likoló mpe ozali kotungisama na ntina na makambo mingi, nde bobele likambo moko esɛngami. Malia aponi oyo malamu, mpe ekobɔtɔlama na ye te.”​—Luka 10:41, 42.

Yesu alobaki te ete Malata azalaki kosepela na makambo ya elimo te. Nzokande, ayebaki ete Malata azali mwasi oyo amipesaki mingi na losambo.a Na ntembe te, ezali ezaleli wana nde epusaki ye abéngisa Yesu na ndako na ye. Nzokande, na ndenge oyo Yesu asembolaki Malata na maloba makasi te, amonisaki ete lokola azalaki komitungisa mpo na kolamba bilei, azali kolekisa libaku moko monene ya koteyama na Mwana na Nzambe ye moko.

Ya solo, mbala mosusu mimeseno ya ntango wana ekokaki kolongisa likanisi ete mwasi ya lokumu azalaki komonana malamumalamu na makoki na ye ya kosala misala ya ndako. Kasi maloba ya Yesu emonisaki ete basi, ndenge moko na mibali, bakoki kofanda na makolo ya Mwana ya Nzambe mpe koyoka maloba ya bomoi! (Yoane 4:7-15; Misala 5:14) Na yango, elingaki kozala malamu koleka soki Malata alambaki bilei mingi te, to nzungu moko kaka, soki alingaki ete yango epesa ye libaku ya kofanda na makolo ya Nkolo na ye mpe koyoka mateya na ye.​—Talá Matai 6:25.

Liteya mpo na biso

Lelo oyo, basi na mibali bazali na kati ya bato oyo bazali kondima ndenge Yesu azali kobénga moto nyonso “akamata mai na bomoi lokola likabo.” (Emoniseli 22:17) Na bolingo nyonso, bamosusu, bakokani mpenza na Malata, bazali kosala nyonso oyo bakoki mpo na kokokisa bamposa ya bandeko na bango bandimi. Bamipesaka mpo na kosalela baninga mpe bakangaka mabɔkɔ te soki esengeli, mpe Yehova alaki kopesa bango libonza mpo na misala oyo bazali kosala na bolingo nyonso. (Baebele 6:10; 13:16) Tokoki koloba mpo na bamosusu ete bakokani mingi na Malia. Bazali na kimya mpe bamipesi mingi na makambo ya elimo. Mposa na bango ya komanyola Liloba ya Nzambe esalisaka bango bázala na kondima makasi.​—Baefese 3:17-19.

Basi ya mitindo yango bazali kokokisa mosala ya ntina mingi na kati ya lisangá ya boklisto. Nzokande, mpo na kosukisa, bato nyonso basengeli ‘kopona oyo malamu,’ elingi koloba kotya makambo ya elimo na esika ya liboso. Soki tokoyeba makambo maleki ntina, Yehova akondima biso mpe akopambola biso.​—Bafilipi 1:9-11.

[Maloba na nse ya lokasa]