Mabele ekokufa mokolo mosusu?

▪ Bato mosusu bazalaki kokanisa ete mabele ekokufa na mokolo ya 21 Ɔkɔtɔbɛ 2011. Kasi ekufaki te. Harold Camping, pastɛrɛ moko oyo ateyaka na radio na États-Unis, asakolaki mpe ete Nzambe akosambisa mokili na mokolo ya 21 Mai 2011. Alobaki ete koningana makasi ya mabele ekosalema na mokili mobimba, mpe sanza mitano na nsima, na mokolo ya 21 Ɔkɔtɔbɛ, mabele ekolimwa. Kasi nyonso wana ekokisamaki te.

Mabele ekokufa ata mokolo moko te. Nzambe, oyo asalá mabele, akopesa nzela te ete mabele ekufa. Liloba na ye elobi boye: “Otɛlɛmisi mabele makasi, mpo etikala kaka bongo.”​—Nzembo 119:90.

Bato mosusu oyo batángaka Biblia balobaka ete mabele oyo ekozika na mɔtɔ. Mpo na kondimisa likanisi na bango, basalelaka maloba oyo ezali na 2 Petro 3:7, 10: “Na nzela ya liloba yango kaka likoló ná mabele oyo ezali sikoyo ebombami mpo na mɔtɔ mpe ezali kobatelama mpo na kozela mokolo ya kosambisama mpe ya kobebisa bato oyo batyolaka Nzambe. . . . Nzokande mokolo ya Yehova ekoya lokola moyibi mpe na mokolo yango likoló ekoleka na lokito makasi, kasi biloko na yango lokola ekokóma mɔtɔ makasi ekosilela, mpe mabele mpe misala oyo ezali wana ekomonana polele.” Maloba wana ya ntoma Petro elimboli nde ete mabele ekozika na mɔtɔ na ndenge ya solo?

Te, ezali bongo te. Mpo na nini? Mpamba te mpo na koyeba malamu ndimbola ya vɛrsɛ yango, esengeli kokokanisa maloba oyo Petro alobaki na mokanda na ye ná maloba mosusu oyo ezali na Biblia. Soki tozwi maloba oyo ezali na mokanda yango kaka ndenge ezali, yango ekomonisa ete baplanɛti ná bamiliare ya minzoto mpe biloko mosusu oyo ezali kuna na likoló, mpe mabele, yango nyonso ekozika na mɔtɔ, kaka mpo mwa ndambo ya bato mabe bafandi awa na mabele. Okoki nde kobebisa zɛlo nyonso oyo ezali pembeni ya ebale kaka mpo osepeli te na mbuma moko ya zɛlo oyo omoni kuna? Ekozala na ntina te! Na yango, Yehova akobebisa te biloko nyonso oyo akelá na likoló mpe awa na nse kaka mpo bikelamu na ye mosusu batombokelaki ye.

Longola yango, likanisi ya ndenge wana eyokani te na maloba oyo ya Yesu Kristo: “Esengo na bato ya ezaleli ya boboto, mpo bakozwa libula ya mabele.” (Matai 5:5; Nzembo 37:29) Tata oyo alingaka libota na ye akoki nde kotongela bango ndako moko ya kitoko mpe na nsima atumba yango? (Nzembo 115:16) Ekoki kosalema te! Yehova azali Mozalisi, mpe Tata ya bolingo.​—Nzembo 103:13; 1 Yoane 4:8.

Petro asaleli liloba “mabele” na ndenge ya elilingi, alingi kolobela nde bato: mpe na vɛrsɛ oyo alobeli nde bato mabe. Simbá ete Petro akokanisi likambo yango na mpela ya ntango ya Noa. (2 Petro 3:5, 6) Na mpela ya Noa, kaka bato mabe nde babomamaki; mabele yango moko ekufaki te, mpe Noa moto ya sembo ná libota na ye babikaki. Ndenge moko mpe, maloba “likoló” oyo Petro asaleli ezali mpe ya elilingi. Awa, maloba “likoló” elimboli boyangeli ya bato mabe. Na yango, bato oyo bakobongwana te bakokufa, ndenge moko mpe baguvɛrnema nyonso ya mokili ekobebisama, mpe Bokonzi ya Nzambe nde ekozwa esika na yango.​—Danyele 2:44.

Na yango, mabele ekokufa mokolo mosusu? Te. Mabele ya elilingi, elingi koloba bato mabe, nde bakobomama. Mabele yango moko mpe bato oyo babangaka Nzambe bakotikala libela na libela.​—Masese 2:21, 22.