Basaleli na misala bazali kokokisa mosala moko monene
1 “Basili komonisa lisusu [ete bazali mibali oyo bamipesi solo epai na Nzambe, bazali komonisa] kondima na bango na kosanganáká na molende nyonso na mosala ya Bokonzi mpe na kosalisáká bato mosusu ete bámilendisa kati na kondima.” Maloba oyo etaleli basaleli na misala ezwami na buku Lisanga mpo na kokokisa mosala ya Nzambe, na nkasa 57 mpe 58. Na ntembe te, ndakisa ya elimo ya bandeko na biso basaleli na misala ebongi mpenza komekolama. Kosala elongo na bango mpe na bankulutu ezali kosala ete “nzoto mobimba ekola, mpo na kolendisama na yango moko na bolingo.”—Ef. 4:16, NW.
2 Basaleli na misala bazali kokokisa mosala moko ya ntina kati na lisangá. Kanisá naino misala nyonso oyo basalaka! Batalelaka kɔnti, mikanda, bazulunalo, baabonema mpe bateritware; balakisaka bato bisika ya kofanda, basimbaka mikro, basalisaka mpo Ndako ya Bokonzi ezala pɛto. Bazali kosala mikumba na Eteyelo ya mosala ya Teokrasi mpe na Likita ya mosala. Basusu kati na bango bakoki mpe kosala masukulu ya bato nyonso to kotambwisa makita mosusu ya lisangá. Lokola binama ya nzoto, basaleli na misala bazali kokokisa misala ya ntina mingi mpo na biso.—1 Kol. 12:12-26.
3 Wana basaleli na misala bazali kosala na bomoko na bankulutu lokola binama ya nzoto moko na limemya mpe na boyokani, yango elendisaka bandeko mosusu ete básala mpe bongo. (Kols. 2:19) Na kokokisáká na bosembo nyonso mikumba na bango pɔsɔ na pɔsɔ mpe wana bazali kosepela na bandeko, yango ezali kopesa nzela ete lisangá ekola na elimo.
4 Ndenge nini tokoki komonisa botɔndi epai na basaleli na misala mpo na mosala makasi oyo bazali kosala? Tosengeli koyeba malamu mikumba na bango mpe kondima kosala elongo na bango soki bazali na mposa ya lisungi na biso. Na maloba to na misala tokoki komonisa bango ete tozali kosepela na mosala na bango. (Mas. 15:23) Baoyo bazali kosala mingi mpo na bolamu na biso ebongi ete tópesa bango botɔndi.—1 Tes. 5:12, 13.
5 Liloba ya Nzambe ezali komonisa mosala oyo basaleli na misala basengeli kosala mpe masɛngami oyo basengeli kokokisa. (1 Tim. 3:8-10, 12, 13) Mosala mosantu oyo bazali kosala ezali na ntina mingi mpo ete lisangá etambola malamu. Mibali motindo oyo babongi ete tókoba kolendisaka bango, mpamba te bango nyonso “bazali kosala mosala na Nkolo ntango nyonso.”—1 Kol. 15:58.