Liyangani ya mokolo moko ya mbala oyo

Liyangani ya mokolo moko ya mobu ya mosala 2008 ekozala na motó ya likambo: “Biso tozali lima, Yehova azali Moyemi-mbɛki,” ekouta na Yisaya 64:8. Toli ya Makomami oyo tokoyoka na liyangani yango ekosalisa biso tósepela lisusu mingi na bwanya, bosembo, nguya, mpe bolingo ya Yehova, Moyemi-mbɛki Monene.

Mokɛngɛli ya zongazonga akosala lisukulu oyo elobi: “Tózala bambɛki ya lokumu na mosala ya kosakola.” Lisukulu yango ekomonisa ndenge bato oyo bazwi lipamboli ya koyeba mateya ya solo mpe koyebisa yango na basusu, bazali se kokóma mingi. Lisukulu oyo elobi: “Komanyola ekobatela yo,” ekomonisa ndenge oyo komanyola likoló ya mitinda ya sembo ya Yehova ebatelaka biso. Molobi mopaya akosala masukulu oyo elobi: “Tiká ‘kolanda ebongiseli ya makambo ya ntango oyo’” mpe “Tiká Moyemi-mbɛki Monene abongisa yo.” Baboti mpe bilenge bakolendisama na masukulu oyo elobi: “Bilenge oyo bazali na motuya na miso ya Yehova” mpe “Mokumba monene oyo baboti bazali na yango na kobongisama ya bana.” Tokosepela koyoka mpe kolanda bilakiseli mpe mituna-lisolo, oyo ekomonisa makambo oyo bandeko basalaka na mosala ya kosakola. Baoyo balingi kozwa batisimo mpo na komonisa ete bamipesi na Nzambe, basengeli koyebisa yango nokinoki epai ya mokɛngɛli-mokambi. Kobosana te komema Linɔ́ngi ya Mosɛnzɛli oyo ebongisami mpo na pɔsɔ ya liyangani ya mokolo moko.

Moyemi-mbɛki Monene akokisaka nyonso oyo akani kosala. Kasi, mokomoko na biso nde asengeli kopona soki akondima ete Nzambe abongisa ye to te. Baoyo bandimaka na bwanya mpenza ete Yehova abongisa bango na nzela ya mitinda mpe malako na ye, ndenge moyemi-mbɛki abongisaka pɔtɔpɔtɔ ya mabelé, bangɛngaka, bapɛtolamaka, mpe bakómaka mbɛki ya ntina. Ntango totosaka malako ya Yehova, tokumisaka bokonzi na ye mpe yango epesaka biso mapamboli mingi.