Ntango tokutani na moto oyo alobaka monɔkɔ mosusu

 1. Mpo na nini lelo oyo masangá basengeli mpenza koyokana ntango bazali kosakola na teritware moko?

¹ Na mokili mobimba, basakoli ya Bokonzi bakómi kokutana mingi na bato oyo bazali kosepela na solo kasi balobaka monɔkɔ oyo ekeseni na oyo bango basalelaka na makita ya lisangá. Mpo na kosalisa bato yango na elimo, babiro ya filiale mingi ezali komona malamu kosala bituluku to masangá ya minɔkɔ mosusu. Na bisika oyo bato balobaka minɔkɔ mingi, ekoki kokóma ete masangá ya minɔkɔ ekeseni esakola na teritware moko. Ndenge nini masangá yango bakoki koyokana mpo mosala ya kosakola esalema na molɔngɔ?​—⁠1 Kol. 14:⁠33.

 2. Ntango tozali kosakola ndako na ndako, ndenge nini tokoki kosala na boyokani na etuluku to lisangá ya monɔkɔ mosusu oyo esakolaka mpe na teritware yango?

² Koyokana malamu: Ntango mosakoli azali kopesa litatoli ya libaku malamu to kosakola na balabala, asengeli kokakatana te kosolola na bato nyonso oyo akutani na bango, ata mpe baoyo balobaka monɔkɔ mosusu, mpe kopesa bango mikanda na monɔkɔ oyo basepeli na yango. Nzokande, soki azali kosakola ndako na ndako na teritware oyo epesami mpe na lisangá to na etuluku oyo esalelaka monɔkɔ mosusu, asengeli mingi mpenza kosakola na bandako ya bato oyo balobaka monɔkɔ oyo lisangá na bango esalelaka na makita. Ntango masangá ekeseni ezali kosakola na teritware moko, ezali na ntina mingi bábongisa badosye na bango ya teritware malamu. Mokɛngɛli na mosala ya kosakola asengeli kosolola malamu na bakɛngɛli na mosala ya kosakola ya masangá mosusu wana mpe kobongisa makambo na ndenge oyo bango nyonso bamoni ete ekozala malamu. (Mas. 11:14) Kasi, soki na mosala ya ndako na ndako, mosakoli akutani na moto oyo alobaka monɔkɔ mosusu mpe ezali na lisangá moko te oyo esalelaka monɔkɔ yango pene wana, mosakoli akosala makasi apesa ye litatoli mpe akokoba kosalisa ye.

 3. Tosengeli kosala nini soki tokutani na basakoli ya etuluku to lisangá ya monɔkɔ mosusu bazali kosakola na teritware oyo biso mpe tozali kosakola?

³ Tozali kosala mosala kaka moko: Tosengeli kosala nini soki tokutani na basakoli ya lisangá mosusu bazali kosakola na teritware oyo biso mpe tozali kosakola? Lokola tozali baklisto mpe tolinganaka, monɔkɔ ekoki te kokabola biso; tokomibanzabanza libosoliboso mpo na bolamu ya bato ya teritware yango. (Yoa. 13:​34, 35) Na bongo, bandeko oyo bazali kokamba mosala bakoki koyokana mpo basakoli ya lisangá moko bákende naino kosakola na teritware mosusu. Na ndenge yango, bakomonisa ete bazali na bolingo mpe na makambo makasimakasi te.​—⁠Yak. 3:​17, 18.

 4. Esakweli nini ezali kokokisama lelo oyo?

⁴ Biblia esakolaki ete bato ya minɔkɔ ndenge na ndenge bakoyoka nsango malamu. (Emon. 14:​6, 7) Soki masangá ya minɔkɔ ekeseni ezali mpenza kosala na boyokani, basakoli na yango bakokende kokutana te na teritware moko mpe bato mingi bakoyoka nsango malamu, bakisá mpe bato oyo balobaka monɔkɔ mosusu.​—⁠Ef. 4:⁠16.