Tosengeli kozala na motema molai na mosala na biso ya kosakola
1. Ndenge nini Yehova amoniselaka bato motema molai?
1 Nzambe azalaka mpenza motema molai epai ya bato. (Kob. 34:6; Nz. 106:41-45; 2 Pe. 3:9) Lolenge ya libosoliboso oyo amonisaka motema molai ezali na nzela ya mosala ya kosakola oyo ezali kosalema na mokili mobimba. Esili koleka mbula pene na 2 000 banda Yehova abendaka bato ya mitema sembo epai na ye; atako bongo azali kokoba kobenda bato. (Yoa. 6:44) Ndenge nini tokoki komekola motema molai ya Yehova na mosala na biso ya kosakola?
2. Ndenge nini tokoki komonisa motema molai ntango tozali kosakola na teritware na biso?
2 Mosala ya ndako na ndako: Tomekolaka motema molai ya Yehova na ndenge tosakolaka “kozanga kotika” na teritware oyo bato babandi naino kosepela na solo te. (Mis. 5:42) Tomonisaka motema molai na ndenge toyikaka mpiko ntango bato baboyaka koyoka biso, batyolaka biso mpe batɛmɛlaka mosala na biso ya kosakola. (Mrk. 13:12, 13) Tomonisaka mpe motema molai na ndenge tokobaka kosala milende mpo na kosopa mai na mboto ya solo, ata soki ezali mpasi kokuta bato oyo basepeli na solo na bandako.
3. Mpo na nini esengeli kozala na motema molai ntango tozali kozongela bato mpe koyekola na bango Biblia?
3 Bato oyo toyekolaka na bango Biblia: Mpo molona ekola, esɛngaka komonisa motema molai. Tokoki kosopela yango mai mpe kolongola matiti mabe, kasi tokoki te kokolisa yango mbangumbangu. (Yak. 5:7) Ndenge moko mpe, moto akolaka na elimo mokemoke. (Mrk. 4:28) Ekoki kozala mpasi mpo bato oyo toyekolaka na bango Biblia bátika mateya ya mangomba ya lokuta to mimeseno oyo eyokani te na Makomami. Tosengeli te koluka kokolisa bango mbangumbangu na elimo mpe kotya bango mpanzi likoló mpo bábongola bizaleli na bango. Esengeli kozala na motema molai mpo na kotikela elimo ya Nzambe ntango oyo esengeli mpo esimba motema ya moyekoli.—1 Ko. 3:6, 7.
4. Ndenge nini motema molai ekoki kosalisa biso tólonga kopesa litatoli epai ya bandeko na biso oyo bazali Batatoli te?
4 Bandeko na biso oyo bazali Batatoli te: Atako tozalaka na mposa makasi ete bandeko na biso oyo bazali Batatoli te báyekola solo, tokomonisa ete tozali na motema molai soki tozeli ntango oyo ebongi mpo na koteya bango bindimeli na biso mpe soki tokebi ete tóteya bango mateya ebele ebele te na mbala moko. (Mos. 3:1, 7) Lisusu, tósalaka ete bizaleli na biso ya malamu eteya bango, mpe tólukaka mabaku ya koyebisa bango bindimeli na biso, na boboto mpe na limemya makasi. (1 Pe. 3:1, 15) Ya solo, soki tomonisi motema molai na mosala na biso ya kosakola, mosala na biso ekobota mbuma mingi mpe ekosepelisa Tata na biso ya likoló.