Liloba ya Nzambe ezali na litomba mpo na koteya
1. Motó ya likambo ya liyangani ya zongazonga ya mobu ya mosala 2014 ezali nini, mpe tokozwa eyano na motuna nini na liyangani yango?
1 Yehova, ‘Molakisi na biso Monene,’ azali moteyi oyo aleki malamu na molɔ́ngɔ́ mobimba. (Yis. 30:20, 21) Kasi, ndenge nini Yehova ateyaka biso? Apesi biso buku oyo eleki babuku nyonso: Biblia, Liloba na ye oyo ekomamaki na litambwisi ya elimo ya Nzambe. Ndenge nini mateya ya Nzambe ekoki kosalisa biso na nzoto, na makanisi, na mayoki mpe na elimo? Tokozwa eyano na motuna wana na liyangani ya zongazonga oyo ekosalema na mobu ya mosala 2014. Motó ya likambo ya liyangani yango ezali “Liloba ya Nzambe ezali na litomba mpo na koteya,” mpe euti na 2 Timote 3:16.
2. Makanisi ya ntina ya liyangani ekomonisama polele na mituna nini?
2 Luká koyeba makanisi ya ntina oyo: Biyano na mituna oyo elandi ekomonisa polele makanisi ya ntina ya liyangani:
Mateya ya Nzambe esalaka nini na bomoi na biso? (Yis. 48:17, 18)
Soki tolingi kobongisa makambo mosusu na bomoi na biso mpo na kosalela Yehova na mosala ya ntango nyonso, tokoki kondimisama na likambo nini? (Mal. 3:10)
Tosengeli kosala nini soki tokutani na “mateya ya bopaya”? (Ebr. 13:9)
Ndenge nini tokoki komekola Yesu na “ndenge na ye ya koteya”? (Mat. 7:28, 29)
Mpo na nini bandeko oyo bateyaka na lisangá basengeli mpe komiteyaka bango moko? (Rom. 2:21)
Liloba ya Nzambe ezali na litomba na makambo nini? (2 Tim. 3:16)
‘Koningisama’ ya bikólo ezali komemela bato makambo nini? (Hag. 2:6, 7)
Yehova ayebi ete tokoki kosala nini? (Ef. 5:1)
Mpo na nini tosengeli kosala makasi mpo tótikala na kati ya mateya ya Yehova? (Luka 13:24)
3. Mpo na nini ezali na ntina ete tóyangana mpe tólanda na likebi mpenza liyangani ya zongazonga?
3 Na 2 Timote mokapo 3, liboso mpenza ntoma Paulo akoma maloba oyo esimbi motó ya likambo ya liyangani oyo, alobelaki ntango ya mpasi oyo ekozala na mikolo ya nsuka. Akomaki boye: “Bato mabe mpe bakosi bakosala lisusu mabe koleka, bakokosa bato mpe bango moko bakokosama.” (2 Tim. 3:13) Mpo tókosama te, ezali mpenza na ntina ete tóyoka mateya ya Nzambe mpe tósalela yango! Yango wana, tózala na ekateli ya koyangana mpe ya kolanda na likebi mpenza liyangani oyo ebongisami na ntango oyo ebongi.