Mituna ya batángi

▪ Ndai ezali “maloba ya kozwa na lisɛki te oyo moto alobi na miso ya bato to alaki ete akosala likambo moko boye, mbala mingi mpo na kobelela Nzambe . . . lokola motatoli to tɛmwɛ.” Moto akoki koloba to kokoma yango.

Bato mosusu bakanisaka ete ezali mabe kolapa ndai mpo Yesu alobaki: “Bólapa ndai te . . . Tiká liloba na bino Ɛɛ ezala Ɛɛ, Te na bino, Te; mpo maloba oyo ebakisami likoló na oyo wana euti na moto mabe.” (Mat. 5:33-37) Na ntembe te, Yesu ayebaki ete Mibeko ya Moize esɛngaki kolapa mwa bandai, mpe basaleli ya sembo ya Nzambe bazalaki kolapa bandai. (Eba. 14:22, 23; Kob. 22:10, 11) Ayebaki mpe ete Yehova ye moko azalaki kolapa ndai. (Ebr. 6:13-17) Na yango, Yesu alingaki te koloba ete tosengeli soki moke te kolapa ndai. Kutu, akebisaki bato bálapaka te ndai na makambo ezangi ntina to na ndenge oyo ebongi te. Tosengeli ntango nyonso kokokisa makambo oyo tolobi ete tokosala, mpo ezali likambo oyo Yehova alingi tósala.

Kasi, okosala nini soki basɛngi yo olapa ndai? Ya liboso, omindimisa ete okokoka kosala makambo oyo olaki ete okosala. Soki omoni ete okokoka te, ekozala malamu olapa ndai te. Liloba ya Nzambe ekebisi biso boye: “Malamu osala elako te na esika osala yango mpe okokisa yango te.” (Mos. 5:5) Ya mibale, talelá mitinda ya Biblia oyo elobeli ndai, mpe na nsima salá makambo na boyokani na lisosoli na yo oyo eteyami. Wapi mwa mitinda yango ya Biblia?

Mwa bandai oyo eyokani na mokano ya Nzambe. Na ndakisa, Batatoli ya Yehova basalaka elako na ntango ya libala. Bilako ezali lolenge moko ya ndai. Liboso ya Nzambe mpe ya batɛmwɛ, mobali ya libala mpe mwasi ya libala balakanaka ete bakolingana, bakosepelisana, bakopesana limemya mpe bakosala yango ‘ntango nyonso oyo bakozala na bomoi elongo awa na mabele.’ (Babalani mosusu bakoki te koloba maloba oyo ndenge ezali na ntango ya libala, kasi basalaka kaka elako liboso ya Nzambe.) Na nsima bakómaka mwasi ná mobali, mpe basengeli kofanda esika moko bomoi na bango mobimba. (Eba. 2:24; 1 Ko. 7:39) Elako ya libala ebongi mpe eyokani na mokano ya Nzambe.

Mwa bandai oyo eyokani te na mokano ya Nzambe. Mokristo ya solosolo asengeli te kolapa ndai, na ndakisa, mpo na kobundela ekólo to kowangana kondima na ye epai ya Nzambe. Kosala bongo ezali kobuka mibeko ya Nzambe. Bakristo bazali “bato ya mokili te,” yango wana bakoki te komikɔtisa na kowelana mpe na bitumba.​—Yoa. 15:19; Yis. 2:4; Yak. 1:27.

Mwa bandai oyo etaleli lisosoli ya moto. Na bantango mosusu, tosengeli kotalela malamumalamu ndai oyo tolingi kolapa na kotalela toli oyo Yesu apesaki ya ‘kozongisela Kaisala biloko ya Kaisala, kasi ya Nzambe biloko ya Nzambe.’​—Luka 20:25.

Na ndakisa, kanisá ete mokristo moko alingi kozwa mokanda ya kozala mwana-mboka to passeport mpe bayebisi ye ete ekosɛnga alapa ndai ya bosembo. Soki na mboka yango, kolapa ndai ya bosembo ezali elako ya kosala likambo moko oyo ebuki mibeko ya Nzambe, lisosoli na ye oyo eteyami na Biblia ekopesa ye te nzela ya kolapa ndai yango. Guvɛrnema ekoki kopesa ye nzela ya kobongola mwa moke maloba yango mpo lisosoli na ye epesa ye nzela ya kosala yango.

Kolapa ndai ya bosembo oyo babongoli mwa moke maloba na yango ekoki koyokana na etinda oyo ezwami na Baroma 13:1, oyo elobi: “Tiká molimo nyonso eyokelaka bakonzi oyo bazali liboso.” Yango wana, mokristo akoki komona ete ezali mabe te kolapa ndai ya kosala likambo moko oyo Nzambe asɛngaka bakristo básala.

Ezali mpe na ntina mingi otosa lisosoli na yo oyo eteyami na Biblia soki ozali komituna mpo na kosalela eloko moko to kosala jɛstɛ moko ntango ozali kolapa ndai. Na ntango ya kala, Baroma mpe Basikitia bazalaki kolapa ndai na mipanga, mpo na kosɛnga nguya epai ya nzambe ya bitumba mpe komonisa ete moto yango asengeli kotyelama motema. Bagrɛki bazalaki kotombola lobɔkɔ na likoló ntango bazalaki kolapa ndai. Na yango, bazalaki kondima ete ezali na nguya ya nzambe moko oyo elandelaka na likebi makambo oyo bato bazali koloba mpe kosala mpe epai ya nani bato basengeli kozongisa monɔkɔ.

Na ntembe te, mosaleli ya Yehova asengeli te kolapa ndai liboso ya bɛndɛlɛ to eloko nyonso mosusu oyo ezali na boyokani na losambo ya lokuta. Kasi okosala nini soki basɛngi yo na tribinale otya lobɔkɔ likoló ya Biblia mpe olapa ndai ya kopesa litatoli ya sembo? Soki basɛngi yo bongo, okoki kopona kosala bongo, mpo Makomami elobeli bato ya sembo oyo basalaki jɛstɛ ntango bazalaki kolapa ndai. (Eba. 24:2, 3, 9; 47:29-31) Ezali na ntina obosana te ete soki ozali kolapa ndai, yebá ete ozali kosala yango liboso ya Nzambe mpe ete okoloba makambo ya solo. Osengeli komibongisa liboso mpo na koyanola na bosembo mpenza na mituna nyonso oyo bakoki kotuna yo.

Lokola tozwaka na motuya mingi boyokani na biso ná Yehova, tosengeli kobondela na motema mobimba mpe kotalela ndai nyonso oyo basɛngi biso tólapa, komindimisa ete ekotungisa lisosoli na biso te to ekobuka te mitinda ya Biblia. Soki oponi kolapa ndai, osengeli kokokisa yango.​—1 Pe. 2:12.