Elimo ya botomboki ekómi mingi na mokili​—Biblia elobi nini?

Bato ya mobulu bazali kobimisa bitumba ya makasi na ekólo Haïti. Mobulu makasi ezali kosalela na Afrique du Sud, na Mexique mpe na bamboka mosusu ya Amérique latine. Ata na bisika oyo mobulu ekiti mwa moke, bansango ya makambo ya mabe oyo ezali kosalema ezali kobangisa mpe kotungisa bato mingi.

Biblia elobi nini mpo na elimo ya botomboki oyo ezali komonana lelo na mokili?

Biblia esakolaki ete koboya kotosa mibeko ekozala moko ya bilembo ya “nsuka ya mokili.” (Matai 24:3) Ntango azalaki kolobela makambo oyo ekomonana na elembo yango, Yesu alobaki boye:

• “Lokola kobuka mibeko ekokóma mingi, bolingo ya bato mingi ekokita.”​—Matai 24:12.

Biblia esakolaki mpe ete “na mikolo ya nsuka” bato bakozala bato “oyo bazangi komipekisa, bato ya nko, oyo balingaka makambo ya malamu te.” (2 Timote 3:1-5) Bizaleli mabe lokola wana, ezali moko ya makambo oyo etindaka bato mingi bákóma batomboki.

Kasi elikya ezali. Biblia elaki ete mosika te bato oyo babukaka mibeko bakozala lisusu te.

• “Etikali kaka mwa ntango moke, bato mabe bakozala lisusu te; Okotala esika oyo bazalaki, mpe bakozala lisusu wana te. Kasi bato ya komikitisa bakozwa mabele, mpe bakosepela mpenza na kimya mingi.”​—Nzembo 37:10, 11.

Luká koyeba makambo mosusu oyo etali elikya oyo Biblia epesi, mpe talá mpo na nini okoki kondima ete makambo oyo tozali komona lelo ezali kokokisa bisakweli ya Biblia. Tángá masolo oyo elandi:

“Elikya ya solosolo mpo na mikolo ezali koya”

“Elembo ya “mikolo ya nsuka,” to ‘ntango ya suka’ ezali nini?”

“Biblia esakolaki makambo oyo bato bazali kokanisa mpe kosala lelo oyo?”