Basalaki Mokano ya Yehova

Bolimbisi ememi na lobiko

BANA zomi ya Yakobo oyo bakutanaki na ministre-mokonzi ya Ezipito bazalaki kobomba sɛkɛlɛ moko ya mabe oyo moto mosusu ayebaki yango te. Bambula mingi liboso, batɛkisaki ndeko na bango Yosefe na boombo, bayokanaki mpe bakosaki tata na bango ete nyama ya zamba nde ebomi ye.​—Genese 37:18-35.

Nsima ya mbula soko 20, nzala makasi epusaki mibali yango zomi báya na Ezipito kosomba bilei. Kasi makambo esalemaki ndenge bakanisaki te. Ministre-mokonzi oyo azalaki mpe kosɛnzɛla bilei, alobaki na bango ete bazali banɔ́ngi. Atyaki moko na bango na bɔlɔkɔ mpe asɛngaki baoyo mosusu ete bázonga na mboka na bango mpe báya na leki na bango ya nsuka, Benyamina. Ntango basalaki bongo, ministre-mokonzi asalaki mayele moko mpo akanga Benyamina.​—Genese 42:1–44:12.

Yuda, moko na bana ya Yakobo aboyaki. Alobaki ete, ‘Soki totiki Benyamina awa bongo biso tozongi, tata na biso akokufa.’ Na nsima, likambo moko esalemaki oyo, ezala Yuda to baninga na ye ya mobembo bakokaki kokanisa yango te. Nsima ya kosɛnga na bato nyonso bábima libándá bobele bana ya Yakobo bátikala, ministre-mokonzi alelaki na mongongo makasi. Ntango atikaki kolela, alobaki ete: “Ngai nazali Yosefe.”​—Genese 44:18–45:3.

Motema mawa mpe kosikolama

Yosefe atunaki bandeko na ye ete: “Tata na ngai [azali naino na bomoi, NW]?” Bapesaki eyano te. Ɛɛ, bandeko ya Yosefe bazangaki likambo ya koloba. Basengelaki kosepela to koyoka nsɔmɔ? Mpamba te elekaki mbula 20 batɛkisaki ndeko na bango na boombo. Yosefe akokaki kotya bango na bɔlɔkɔ, kozongisa bango kozanga bilei, to mpe koboma bango! Bandeko ya Yosefe bakokaki “kozongisela ye [eyano] te, mpo ete bazalaki na nsɔmɔ liboso na ye.”​—Genese 45:3.

Mosika te, Yosefe akitisaki mibali wana motema. Alobaki ete: “[Bóya pene, NW] na ngai nabondeli bino, mpe [bayaki, NW]. Alobaki mpe ete, Ngai nazali ndeko na bino Yosefe, oyo bino botɛkisaki na Ezipito. Kasi [bómitungisa, NW] te mpo ete Nzambe atindaki ngai liboso na bino mpo na kobikisa bomoi na bato.”​—Genese 45:4, 5.

Yosefe ayokelaki bango mawa na ntina. Amonaki liboso bilembeteli ete bandeko na ye babongolá motema. Na ndakisa, ntango Yosefe afundaki bango ete bazali banɔ́ngi, ayokaki bango na bango kolobana ete: “Solo tokiti na ntina na ndeko na biso . . . Yango wana mawa oyo ekiteli biso.” (Genese 42:21) Lisusu, Yuda andimaki kokóma moombo na esika ya Benyamina mpo ete elenge yango azonga epai ya tata na ye.​—Genese 44:33, 34.

Na bongo, Yosefe azalaki na ntina malamu ya koyokela bango mawa. Mpe ayebaki ete soki asali bongo, libota na ye mobimba ekobika. Na nsima, Yosefe ayebisaki bandeko na ye bázonga epai ya tata na bango, Yakobo, mpe báloba na ye ete: “Mwana na yo Yosefe alobi boye ete, Nzambe azalisi ngai nkolo na Ezipito mobimba. Kitá epai na ngai mpe umela te. Okofanda na mokili na Gosene, mpe okozala penepene na ngai, yo mpe bana na yo mpe bana na bana na yo mpe bitonga na yo na bampate mpe na bangɔmbɛ mpe biloko na yo nyonso, mpe ngai nakoleisa yo kuna.”​—Genese 45:9-11.

Yosefe Monene

Yesu Klisto akoki kobéngama Yosefe Monene, mpamba te makambo mingi ekokani kati ya bato yango mibale. Ndenge moko na Yosefe, Yesu anyokwamaki na mabɔkɔ ya bandeko na ye, bakitani ya Abalayama. (Talá na Misala 2:14, 29, 37.) Kasi, bomoi ya bato yango mibale ebongwanaki na lolenge ya kokamwa. Yosefe alongwaki na boombo mpe akómaki ministre-mokonzi, moto ya mibale nsima ya Falo. Bobele bongo, Yehova asekwisaki Yesu na liwa mpe atombolaki ye na “lobɔkɔ na Nzambe na mobali.”​—Misala 2:33; Bafilipi 2:9-11.

Lokola azalaki ministre-mokonzi, Yosefe akokaki kopesa bato nyonso bilei oyo bazalaki koya kosomba na Ezipito. Lelo oyo, awa na mabelé Yosefe Monene azali na kelasi ya moombo ya sembo mpe ya mayele na nzela na ye azali kopesa bilei ya elimo “na elaka na yango.” (Matai 24:45-47; Luka 12:42-44) Ɛɛ, baoyo bazali koya epai na Yesu “bakoyoka nzala lisusu te, soko mposa na mai lisusu te . . . Mpo ete mwana na mpate oyo na kati na kiti na bokonzi akobatela bango, mpe akokamba bango epai na mitó na mai na bomoi.”​—Emoniseli 7:16, 17.

Liteya mpo na biso

Yosefe apesi ndakisa monene ya motema mawa. Soki asalelaki bosembo na kozanga mawa, mbɛlɛ apesaki bato oyo batɛkisaki ye na boombo etumbu. Epai mosusu, esengo mbɛlɛ epusaki ye na kokanga miso na libunga na bango. Yosefe asalaki bongo te. Kasi, amekaki bango mpo na kotala soki babongoli motema. Na yango, ntango amonaki ete mawa na bango ezalaki mpenza ya solosolo, alimbisaki bango.

Tokoki komekola Yosefe. Ntango moto moko asaleli biso mabe mpe abongoli mpenza motema, tosengeli kolimbisa ye. Kasi, tosengeli te kotika mayoki ekanga biso miso liboso ya mabunga minene. Tosengeli mpe kopesa nzela te ete nkanda ekanga biso miso liboso ya misala oyo emonisi kobongola motema ya solosolo. Tiká ete ‘tóyikanaka mpiko, tólimbisanaka.’ (Bakolose 3:13) Soki tokosala bongo, tokomekola Nzambe na biso, Yehova, oyo ‘alimbisaka noki.’​—Nzembo 86:5; Mika 7:18, 19, NW.