¹⁸ Na yango, bakobaki mobembo, kaka bango mibale na nzela molai wana oyo ezalaki komema na Beteleme. Bato mosusu balobi ete mbala mosusu mobembo yango esalaki pɔsɔ mobimba. Kasi, lokola bazalaki bango mibale, na ntembe te balendisanaki na mpasi oyo bazalaki na yango.

²¹ Nsukansuka, basi yango mibale bakómaki na Beteleme, mboka oyo ezalaki na ntaka ya kilomɛtrɛ soki 10 na sudi ya Yerusaleme. Emonani ete Naomi ná libota na ye bayebanaki mingi na mwa engumba yango, mpo mboka eninganaki ntango bayokaki ete Naomi azongi. Basi ya mboka bazalaki kotalatala ye mpe koloba ete: “Oyo nde Naomi?” Na ntembe te, azalaki lisusu te ndenge azalaki liboso akende na Moabe; elongi na ye mpe molato na ye emonisaki ete anyokwamaki mpe akutanaki na bampasi na boumeli ya bambula.​—Ruta 1:19.