Bato na gabao—balukaki kimya
ENGUMBA oyo ozali komona awa na likoló, na nsongé ya ngomba, ezali na esika oyo mboka Gabao na kala etongamaki, soko na bakilometele zomi na nord ya Yelusaleme.
Mbala mosusu oyebi ete mboka Gabao ezwaki lokumu na mwa ntango moke nsima wana Yosua akɔtisaki Yisraele na Mokili na ndaká mpe wana alóngaki etumba na Yeriko. Bakanana oyo bazalaki kofanda na Gabao bakangaki ntina ete bakokaki kobunda na Yisraele te, baoyo bamonanaki ete bazwaki lisungi ya Nzambe. Basalaki nini? Kosaleláká mayele, bato na Gabao batindaki bantóma baoyo bamonisaki ete bautaki mosika. Milende yango misalemaki mpo na koluka kimya milóngaki, mpamba te Yisraele basalaki kondimana elongo na bango. Wana mayele na bango mayebanaki, bato na Gabao bakómaki bakati na nkoni mpe batóki na mai.
Nzambe akokaki te kopamela libota wana lilukaki kimya. Asungaki Yosua na ntango akɔtɛlaki bato na Gabao, baoyo babundisamaki na bakonzi mitano. Jéhovah asalaki nkutu likamwisi na kosaláká ete pole eumela na mokolo oyo etumba esalemaki.—Yosua 9:3-27; 10:1-14.
Na ngomba yango, bakundoli na biloko na kala bamonaki libulu moko mozindo to etimá, oyo etimolamaki kati na mabangá. Bato na Gabao bazalaki kokita na makolo mpo na kotóka mai kati na esika wana ezalaki na nsé na mabelé. Ezali nde “etimá na Gabao” oyo elobelami na 2 Samwele 2:13? Bakundoli na biloko na kala bamonaki lisusu mobénga motimolamaki kati na mabangá mpe ebele na biloko oyo bisalelamaki mpo na kosala vinyo. Ee, emonani lokola ete Gabao ezalaki mboka oyo bazalaki kosala vinyo mingi.
Na eleko na Davidi, hema, to tabernakle ya Nzambe ya solo ezalaki kati na engumba oyo. Mokonzi Salomo ayaki awa mpo na kopesa mbeka. Jéhovah amonanaki na ye kati na ndɔtɔ mpe alakaki ye “motema na bwanya mpe na mayele,” mpe bozwi. (1 Mikonzi 3:4-14; 2 Ntango 1:3) Lisoló oyo tozali kokuta na lokasa 12 kino lokasa 17 na nimero oyo, emonisi ete, na nsima, bakitani ya bafandi ya Gabao bazwaki mikumba minene kati na libota na Nzambe. Oyebi lolenge oyo yango esalemaki?
[Eutelo ya bafɔtɔ na lokasa 32]
Pictorial Archive (Near Eastern History) Est.