Na mabaku mosusu, Bayisalaele bakokaki kopesa makabo oyo bango moko basepeli kopesa, ezala moke to mingi. Na ndakisa, ntango Mokonzi Davidi akanaki kotongela Yehova tempelo, Bayisalaele bapesaki “wolo na talanta nkóto mitano.”a (1 Ntango 29:7) Tókokanisa motángo yango na oyo Yesu amonaki ntango azalaki awa na mabelé. Amonaki “mwasi moko mobola oyo akufelá mobali azali kotya . . . mbongo mibale ya bibende oyo ezalaki na motuya moke mpenza,” na bibombelo ya mosolo na tempelo. Mbongo oyo atyaki ezalaki na valɛrɛ nini? Ezalaki moke mpenza mpe ekokaki ata te lifuti ya mokolo moko ya mosala. Kasi, Yesu alobaki ete Nzambe andimaki mbongo yango.​—Luka 21:1-4.