Mituna ya batángi

Na Nehemia 8:10, bayebisaki Bayuda ete ‘bálya mafuta’; nzokande, na Levitike 3:17, Mibeko elobaki ete: “Bólya mafuta te.” Ndenge nini tokoki koyokanisa makanisi yango?

Na Liebele, liloba oyo ebongolami na “mafuta” na Nehemia 8:10 ekeseni na liloba oyo ebongolami na “mafuta” na Levitike 3:17. Liloba ya Liebele hélèv, oyo ebongolami na “mafuta” na Levitike 3:17, elimbolaka mafuta oyo ezalaka na nzoto ya nyama to ya moto. (Lev. 3:3; Bas. 3:22) Bavɛrsɛ oyo ezali liboso mpe nsima ya vɛrsɛ 17 emonisi ete Bayisalaele basengelaki te kolya biteni ya mafuta oyo ezingaki misɔpɔ mpe bangei ya banyama oyo ezalaki kopesama lokola mbeka to mpe mafuta oyo ezalaki na mokɔngɔ mpamba te “mafuta nyonso mazali na [Yehova].” (Lev. 3:14-16) Na yango, basengelaki te kolya mafuta ya banyama oyo esengelaki kopesama lokola mbeka epai ya Yehova.

Nzokande, liloba oyo ebongolami na “mafuta” na Nehemia 8:10 ezali mash·man·nim’, mpe esalelami kaka na esika wana na Makomami ya Liebele mobimba. Liloba yango euti na verbe sha·men’, oyo elimboli “kozala na mafuta, kokóma mafutamafuta.” Likanisi ya liboso oyo maloba oyo euti na verbe yango emonisaka ezali ya kobonga to kozala malamu. (Talá mpe Yisaya 25:6.) Moko na maloba oyo euti na verbe yango ezali she’men, oyo mbala mingi ebongolamaka na “mafuta,” na ndakisa na maloba “mafuta ya olive.” (Det. 8:8, NW; Lev. 24:2, NW) Ndenge oyo Nehemia 8:10 esaleli yango, emonani ete liloba mash·man·nim’ elimboli biloko oyo elambami na mafuta mingi mpe ekoki kozala misuni oyo ezali na mwa mafuta, kasi te biteni minene ya mafuta.

Atako Mibeko epekisaki Bayisalaele kolya biteni ya mafuta ya nyama, bakokaki kolya bilei kitoko, elingi koloba misuni oyo ezali na mwa mafuta. Bilei mosusu, na ndakisa bagato oyo esalami na masango, ezalaki kokalingama na mafuta ya nyama te, kasi na mafuta mosusu, mbala mingi mafuta ya olive. (Lev. 2:7) Yango wana, buku Étude perspicace des Écritures elobi ete biloko ya “mafuta” na vɛrsɛ wana “elimboli misuni, oyo ekauká te, kasi misuni mpe biteni mosusu ya nyama oyo ebomami sika, oyo bazalaki kolamba na mafuta.”

Baklisto bayebi ete Mibeko ya Moize nde epekisaki kolya mafuta. Nzambe asɛngisi bango te ete bátosa Mibeko, mpe makambo oyo esɛngamaki mpo na bambeka ya banyama.​—Lom. 3:20; 7:4, 6; 10:4; Kols. 2:16, 17.