Okoki mpenza kozala na esengo

EZALAKA mpasi mpo moto azala na esengo ya solosolo. Ezali bongo mpo ete bato mingi balukaka yango na ndenge oyo ebongi te. Nzokande, ekozala mpasi mingi te soki bazali na moninga moko oyo akoki kosalisa bango.

Biblia ekoki kosalisa moto mpo azala na esengo ya solosolo. Na ndakisa, tótalela mokanda ya Nzembo. Mokanda yango ezali na banzembo 150 oyo ezali kokumisa Yehova. Mokonzi Davidi akomaki soki katikati ya banzembo yango. Nzokande, likambo oyo ezali na ntina koleka koyeba bankombo ya bato oyo bakomaki mokanda yango, ezali ete Yehova nde apesaki bango elimo santu mpo bákoma yango. Lokola ezali bongo, tokoki mpenza kondima ete mokanda yango ezali na batoli euti na Nzambe mpe ezali kolakisa ndenge ya kozala na esengo.

Bato oyo bakomaki mokanda ya Nzembo bayebaki ete mpo moto azala na esengo, asengeli kozala na boyokani malamu na Nzambe. Moko na bango akomaki boye: “Esengo ezali na moto oyo akobangaka [Yehova].” (Nzembo 112:1) Moto moko te na mokili, azala moninga to ndeko; mpe eloko moko te, ezala bozwi to makambo minene oyo moto akoki kosala, ekoki kopesa esengo oyo ekokani na esengo ya kozala “bato oyo [Yehova] azali Nzambe na bango.” (Nzembo 144:15) Bomoi ya basaleli mingi ya Nzambe lelo oyo ezali komonisa yango.

Tozali na ndakisa ya Susanne oyo azali na mbula koleka 40.a Alobi boye: “Bato mingi lelo oyo bakɔtaka na masangá to na moziki ya bato oyo bazali na bango makanisi mpe mikano moko. Nzokande, bamimonaka te ete bazali baninga ya moto nyonso na etuluku yango. Kasi, na lisangá ya Yehova ezali bongo te. Lokola biso nyonso tolingaka Yehova, biso na biso mpe tolinganaka. Ata soki nakei na mboka nini, soki nazali na kati ya basaleli ya Yehova, nakomitungisa na eloko moko te. Boninga wana epesaka mpenza esengo. Kaka Batatoli ya Yehova nde bakoki koloba ete bazali mpenza baninga na bato oyo bazali na bango loposo moko te, ekólo moko te, mpe mimeseno ndenge moko te. Nakoki mpenza koloba ete kozala na lisangá ya Yehova epesaka esengo.”

Maree, mwana-mboka Écosse, amonaki mpe ete kozala moninga ya Yehova epesaka esengo. Alobi boye: “Liboso nayekola Biblia, nazalaki kotala bafilme ya makambo ya nsɔmɔ. Na butu, nazalaki kolala na ekulusu na mabɔkɔ mpo nazalaki kobanga bilima oyo nazalaki kotala na bafilme yango. Nsima ya koyekola Biblia, natikaki kotala bafilme yango. Lokola nakómi moninga ya Yehova, nabangaka lisusu te na butu. Nazali na esengo mpo nazali kosalela Nzambe oyo azali na nguya koleka bilima oyo nazalaki komona na bafilme yango.”

Kotyela Yehova motema epesaka esengo

Tokoki kotya ntembe te ete Yehova azali na nguya nyonso mpe na bwanya ezangi nsuka. Lokola Davidi ayebaki ete akoki kotyela Yehova motema mpe ete Yehova akoki kobatela ye, akomaki boye: ‘Mapamboli ezali na moto oyo atye elikya epai ya [Yehova].’​—Nzembo 40:4.

Maria alobi boye: “Makambo oyo nakutanaki na yango na Espagne mpe na bisika mosusu endimisi ngai ete kosala makambo oyo Yehova azali kosɛnga, ata soki motema na biso ezali kotinda biso tósala na ndenge na biso, ebotaka kaka mbuma ya malamu. Kosala bongo epesaka esengo mpo makambo nyonso oyo Yehova asɛngaka ezalaka kaka malamu.”

Andreas, nkulutu moko oyo asalaki na mikili mingi ya Mpoto, amonaki mpe ete kotyela Yehova motema ezali likambo ya malamu. Alobi boye: “Ntango nazalaki kokola, yaya na ngai ya mobali oyo azali Motatoli te azalaki kolendisa ngai nasala mosala oyo ekopesa ngai mbongo mingi. Asepelaki ata moke te ntango naponaki mosala ya ntango nyonso mpe naboyaki mosala oyo bakobanda kofuta ngai ata soki nazwi pansiɔ. Na mosala ya ntango nyonso, nazangaka eloko te, mpe Yehova asaleli ngai makambo oyo mpo na bato mosusu, esukaka kaka na ndɔtɔ.”

Na 1993, babengisaki Felix na biro ya Batatoli ya Yehova ya ekólo Allemagne mpo na kopesa mabɔkɔ na mosala ya kotonga Betele. Ntango basilisaki kotonga, basɛngaki ye akóma kosala na Betele. Asalaki nini? Alobi boye: “Nandimaki, kasi na mitema mibale. Kasi, nsima ya mbula soki zomi oyo nalekisi awa, namoni mpenza ete Yehova ayokaki mabondeli na ngai. Ayebaki nini ebongi na ngai. Lokola natyelaki ye motema mobimba mpe natikaki ye atambwisa ngai, napesaki ye nzela alakisa ngai makambo oyo alingi nasala.”

Susanne, oyo tolobelaki liboso, azalaki na mposa ya kosala mosala ya mobongisi-nzela ya sanza na sanza. Yango wana azalaki koluka mosala oyo ekobanda kozwa ye ndambo ya mokolo; kasi, mosala ya ndenge wana ezalaki komonana te. Nsima ya koluka mbula mobimba, atikaki makambo nyonso na mabɔkɔ ya Yehova. Alobi boye: “Nasɛngaki mosala ya mobongisi-nzela ya sanza na sanza. Nabombaki mbongo oyo ekokaki kosalisa ngai na boumeli ya sanza mobimba. Sanza yango ezalaki na mapamboli mpenza! Mosala ya kosakola ezalaki kopesa ngai esengo mingi, kasi nazalaki kaka kozwa mosala te; atako bongo, Yehova asundolaki ngai te. Na mokolo ya nsuka ya sanza yango, nazwaki mosala. Nandimaki ete nakoki mpenza kotyela Yehova motema! Likambo wana oyo nakutanaki na yango na ebandeli ya mosala ya mobongisi-nzela esalisi ngai nazala na bomoi ya malamu mpe ya esengo.”

Koyoka batoli ya Nzambe epesaka esengo

Mokonzi Davidi asalaki mabunga ya minene. Na bantango mosusu ezalaki kosɛnga ete bápesa ye toli. Davidi azalaki kondima batoli yango; bongo biso?

Aida, ndeko mwasi moko oyo afandaka na France, asalaki libunga moko monene. Alobi boye: “Nazalaki na mposa mosusu te, kaka nabongisa makambo ná Yehova.” Yango wana, akutanaki na bankulutu mpo básalisa ye. Lelo oyo, nsima ya kolekisa mbula 14 na mosala ya ntango nyonso, alobi boye: “Nayokaka esengo mpenza mpo nayebi ete Yehova alimbisá ngai.”

Koyoka batoli ya Yehova ekoki kopekisa biso tósala mabunga. Judith alobi boye: “Ntango nazalaki na mbula 20, nazalaki kosala esika moko na mobali moko oyo azali moto ya Allemagne; mobali yango akómaki kosala makambo ndenge na ndenge mpo ngai nasepela na ye. Bato bazalaki kopesa ye limemya, azalaki na mosala ya malamu, azalaki mpe na mwasi na ye. Nakómaki na mitema mibale: motema mosusu natosa mobeko ya Yehova, motema mosusu nalinga moto wana. Nayebisaki baboti na ngai likambo yango. Tata na ngai ayebisaki ngai polele makambo oyo Yehova azali kosɛnga ngai. Kasi, na motema na ngai, nazalaki koluka komilongisa. Na boumeli ya bapɔsɔ mingi, mama azalaki kosolola na ngai mpokwa nyonso mpo na komonisa ngai ete kotosa mibeko ya Nzambe ebatelaka biso. Mokemoke, motema na ngai ekómaki kozonga epai ya Yehova. Nazali na esengo mingi mpo na disipilini mpe batoli na ye; nasali mosala ya mobongisi-nzela ya sanza na sanza bambula mingi mpe nazali na mobali oyo alingaka ngai mpenza mpe alingaka Yehova.”

Bandakisa yango emonisi ete maloba ya Davidi ezali solo ete: “Esengo na ye oyo alimbisami mabunga na ye, ye oyo masumu na ye mazipami. Esengo na ye oyo [Yehova] atángeli ye mabe te.”​—Nzembo 32:1, 2.

Komonisela basusu boboto epesaka esengo

Davidi akomaki boye: “Mapamboli mazali epai na ye oyo akobanza babola; [Yehova] akobikisa ye na mokolo mabe. [Yehova] akobatela ye mpe akobikisa ye na bomoi. Akopambwama kati na mokili.” (Nzembo 41:1, 2) Boboto oyo Davidi amoniselaki Mefibosete oyo azalaki ebɔsɔnɔ emonisi ndenge oyo tosengeli kotalelaka babola.​—2 Samwele 9:1-13.

Marlies, oyo azali na mosala ya misionɛrɛ banda mbula 47, ateyaka bato oyo bakimá bitumba na Afrika, Azia, mpe Mpoto ya Ɛsti. Alobi boye: “Bato yango bazali na mikakatano mingi mpe bamonaka ete bato mosusu balingaka bango te. Kosalisa bato ya ndenge wana bámona ete bazali na ntina na miso ya Nzambe, epesaka esengo mingi.”

Marina oyo azali na mbula koleka mwa moke 40, akomi boye: “Lokola nazali monzemba, nayebi ntina ya kozala na baninga oyo bakanisaka ngai. Yango wana, ngai mpe nabengaka bato mosusu na telefone to nakomelaka bango mikanda mpo na kolendisa bango. Bato mingi basepelaka na yango. Kosalisa basusu epesaka esengo.”

Dimitar, ndeko moko oyo azali na mbula soki 25, alobi boye: “Mama na ngai abɔkɔlá ngai ye moko. Ntango nazalaki mwana moke, pɔsɔ na pɔsɔ, motambwisi ya Boyekoli ya Mokanda na etuluku na biso azalaki kobima na ngai na mosala ya kosakola. Nazalaka na botɔndi mingi mpo na motema molai na ye. Nayebi ete amonaki mpasi mpo na kosalisa ngai.” Lokola ndeko moko asalisaki Dimitar, lelo oyo ye mpe asalisaka bato mosusu. Alobi boye: “Sanza nyonso, nasalaka makasi nabima na mosala ya kosakola ata na elenge moko mpe na mokóló moko.”

Mokanda ya Nzembo elobeli mpe makambo mosusu oyo epesaka esengo. Moko na yango ezali kotyela nguya ya Yehova motema; Biblia elobi boye: “Esengo ezali na baoyo bazali na nguya na bango epai na [Yehova].”​—Nzembo 84:5.

Corinna akoki komonisa ete likambo yango ezali solo. Akendeki kosakola na mboka moko oyo basakoli bazalaki mingi te. Alobi boye: “Nasengelaki koyekola monɔkɔ ya sika mpe mimeseno ya sika. Namonaki lokola nde nazali lisusu awa na mabelé te. Likanisi ya koteya na mboka mopaya ekómaki kobangisa ngai. Nabondelaki Yehova, mpe apesaki ngai makasi mpo na kosakola na mboka yango. Na nsima, namesanaki na teritware yango. Nakómaki koyekola Biblia na bato mingi, mpe makambo nyonso wana esalisaka ngai tii lelo. Nyonso wana eteyi ngai ete na nguya ya Yehova, tokoki kolonga ata mokakatano ya ndenge nini.”

Tomoni mpenza ete ezali na makambo mingi oyo epesaka esengo; na ndakisa, kozala moninga ya Yehova mpe ya basaleli na ye, kotyela Yehova motema mobimba, koyoka batoli na ye mpe komonisela bato mosusu boboto. Soki tozali kotambola na banzela ya Yehova mpe tozali kotosa mibeko na ye, akopambola biso mpe tokozala na esengo mingi.​—Nzembo 89:15; 106:3; 112:1; 128:1, 2.

[Maloba na nse ya lokasa]

[Elilingi na lokasa 12]

Maria

[Elilingi na lokasa 13]

Maree

[Elilingi na lokasa 13]

Susanne ná Andreas

[Elilingi na lokasa 15]

Corinna

[Elilingi na lokasa 15]

Dimitar