“Motatoli ya sembo kati na mapata”

BANDA kalakala bato oyo bakomaka maloba ya ntɔki mpe baoyo basalaka banzembo bakumisaka kitoko ya sanza. Na ndakisa, loyembo moko oyo epemami na Nzambe elobeli mwasi moko oyo azali “kitoko lokola sanza.” (Loyembo ya Salomo 6:10) Lisusu, mokomi moko ya nzembo alobaki ete sanza ezali “motatoli ya sembo kati na mapata.” (Nzembo 89:37, NW) Maloba yango elimboli nini?

Sanza ebalukaka zingazinga ya mabelé na boumeli ya mikolo soki 27. Lokola likambo yango ebongwanaka te, tokoki koloba ete sanza ezali sembo. Nzokande, ekoki kozala ete mokomi ya nzembo azalaki kokanisa likambo mosusu ya ntina mingi ntango alobaki maloba wana. Abengaki sanza “motatoli ya sembo” na nzembo moko oyo ezalaki esakweli mpo na Bokonzi oyo Yesu ateyaki bayekoli na ye babondelaka ete eya.​—Matai 6:9, 10.

Bambula koleka 3 000, Yehova Nzambe asalaki kondimana ya Bokonzi ná Davidi, mokonzi ya Yisalaele. (2 Samwele 7:12-16) Mokano ya kondimana yango ezalaki ya kopesa Yesu Klisto, mokitani ya Davidi, lotomo ya kofanda na kiti ya bokonzi mpo na libela. (Yisaya 9:7; Luka 1:32, 33) Mpo na kiti ya bokonzi ya “mwana” ya Davidi, mokomi ya nzembo ayembaki boye: “Lokola sanza, yango ekopikama makasi mpo na ntango oyo etyami ndelo te, mpe lokola motatoli ya sembo kati na mapata.”​—Nzembo 89:36, 37, NW.

Sanza, ‘engɛngiseli monene ya butu,’ ebongi mpenza mpo na kokundwela biso kiti ya bokonzi ya Klisto oyo ekoumela libela na libela. (Genese 1:16, NW) Danyele 7:14 elobi boye: “Nguya na ye ezali nguya ya lobiko na lobiko, ekosila te, mpe bokonzi na ye ekobebisama te.” Sanza ezali motatoli oyo ekundwelaka biso Bokonzi yango mpe mapamboli oyo ekomemela bato.

[Maloba mpo na kolimbola eutelo ya bafɔtɔ na lokasa ]

Sanza: Fɔtɔ ya NASA