LITEYA 34
Ndenge oyo okoki komonisa Yehova ete olingaka ye!
Bolingo na yo mpo na Yehova ekómi makasi koleka ntango obandaki koyekola Biblia? Okolinga kokómisa lisusu boninga na yo ná ye makasi? Soki ezali bongo, kobosana te ete soki Yehova amoni ete ozali kolinga ye mingi, ye mpe akolinga yo mingi mpe akosalisa yo. Ndenge nini okoki komonisa Yehova ete olingaka ye?
1. Ndenge nini tokoki komonisa Yehova ete tolingaka ye?
Tomonisaka ete tolingaka Yehova ntango tozali kotosa ye. (Tángá 1 Yoane 5:3.) Yehova atindaka moto na makasi te atosa ye. Kutu, atiki moto na moto apona soki akotosa ye to te. Mpo na nini? Mpo Yehova alingi ete ‘tótosa ye na motema.’ (Baroma 6:17) Na maloba mosusu, alingi otosa ye mpo olingaka ye, kasi te mpo ezali mobeko. Eteni 3 mpe 4 ya buku oyo ebongisami mpo na kosalisa yo osala makambo oyo esepelisaka Yehova mpe oboya oyo esepelisaka ye te, mpo na komonisa ye ete olingaka ye.
2. Mpo na nini ekoki kozala mpasi komonisa Yehova ete tolingaka ye?
Biblia elobi: “Bampasi ya moto ya sembo ezali mingi.” (Nzembo 34:19) Na ndakisa: Biso nyonso tobundaka mpo na kosala oyo ezali malamu, tokoki kokutana na mikakatano ya mbongo, makambo ya kozanga bosembo, mpe mikakatano mosusu. Ntango tozali kokutana na mikakatano, ekómaka mbala mosusu mpasi tósala oyo Yehova asɛngi biso, mpamba te kosala mabe ezalaka pɛtɛɛ. Kasi ntango ozali kosala makambo oyo Yehova asɛngi yo, okomonisa ete olingaka ye koleka eloko mosusu nyonso mpe ete ozali sembo epai na ye. Ye mpe akozala sembo epai na yo, mpe akosundola yo ata moke te.—Tángá Nzembo 4:3.
KƆTÁ NA MOZINDO
Luká koyeba mpo na nini Yehova asepelaka ntango otosaka ye, mpe nini ekoki kosalisa yo otikala sembo epai na ye.
3. Satana afundi mpe yo
Mokanda ya Yobo emonisi ete Satana afundaki kaka Yobo te, kasi mpe bato nyonso oyo balingi kosalela Yehova. Tángá Yobo 1:1, 6–2:10, mpe na nsima yanolá na mituna oyo:
Satana alobaki ete Yobo atosaka Yehova mpo na nini? —Talá Yobo 1:9-11.
Likambo nini Satana alobaki mpo na bato nyonso, oyo etali mpe yo?—Talá Yobo 2:4.
Tángá Yobo 27:5b, mpe na nsima yanolá na motuna oyo:
Yobo asalaki nini mpo na komonisa ete alingaka mpenza Yehova?
Yobo amonisaki ete alingaka Yehova na ndenge atikalaki sembo epai na ye
Tomonisaka ete tolingaka Yehova na ndenge totikalaka sembo epai na ye
4. Sepelisá motema ya Yehova
Tángá Masese 27:11, mpe na nsima yanolá na mituna oyo:
Yehova ayokaka ndenge nini ntango ozali na bwanya mpe ozali kotosa ye? Mpo na nini?
5. Okoki kozala sembo epai ya Yehova
Bolingo na biso mpo na Yehova etindaka biso tóyebisa basusu makambo na ye. Lokola tozalaka sembo epai na ye, tosakwelaka basusu ata ntango oyo kosala yango ezali pɛtɛɛ te. Talá VIDEO, mpe na nsima yanolá na mituna oyo elandi.
Esilá kokómela yo omona ete ezali mpasi koyebisa basusu makambo ya Yehova?
Na video yango, nini esalisaki Grayson atika kobanga?
Ezalaka mpasi te tózala sembo epai ya Yehova ntango tozali kolinga oyo ye alingaka mpe koyina oyo ye ayinaka. Tángá Nzembo 97:10, mpe na nsima yanolá na mituna oyo:
Na makambo oyo oyekoli, wapi mwa makambo oyo Yehova alingaka? Wapi mwa makambo oyo ayinaka?
Ndenge nini okoki koyekola kolinga oyo ezali malamu mpe koyina oyo ezali mabe?
6. Kotosa Yehova ememelaka biso bolamu
Kotosa Yehova ezalaka ntango nyonso likambo ya malamu koleka. Tángá Yisaya 48:17, 18, mpe na nsima yanolá na mituna oyo:
Okanisi ete tokoki kotya motema ete Yehova ayebaka ntango nyonso oyo eleki malamu mpo na biso? Mpo na nini?
Makambo oyo oyekoli mpo na Yehova Nzambe ya solo, esalisi yo na nini?
SOKI MOTO ALOBI NA YO: “Nakoki mpenza kosepelisa Nzambe na makambo oyo nasalaka?”
Vɛrsɛ nini okoki kosalela mpo na komonisa ye ete makambo oyo tosalaka ekoki kosepelisa Nzambe to koyokisa ye mawa?
NA MOKUSE
Tomonisaka ete tolingaka Yehova ntango totosaka ye mpe totikalaka sembo ata na ntango ya mikakatano.
Bozongeli
Ndakisa ya Yobo eteyi yo nini?
Ndenge nini okomonisa ete olingaka Yehova?
Nini ekosalisa yo otikala sembo epai ya Yehova?
MAKANISI MOSUSU
Talá oyo okoki kosala mpo na kotikala sembo epai ya Yehova mpe na lisangá.
Luká koyeba makambo mosusu mpo na makambo oyo Satana afundaka na yango bato.
“Yobo abateli bosembo na ye” (Biblia—ezali na nsango nini? eteni 6)
Talá mpe ndenge bilenge bakoki komonisa ete balingaka Yehova.
Ndenge nini elenge oyo baninga na ye bazali kotya ye mbamba asala likambo moko ya mabe akoki kotikala sembo epai ya Nzambe?