Okoki koyanola?

Otangaki na likebi nyonso banimero ya Mosenzeli oyo eutaki kobima? Soki ee, tala soko okoki koyanola na mituna oyo milandi:

◻ Lokola baanzelu batomboki babwakamaki na Tartare, yango elimboli nini mpo na bango? (2 Petelo 2:4)

Bazali lisusu na esika te kati na lisangá mosantu ya Jéhovah mpe uta ntango yango bazali kozwa lisusu pole na Nzambe te. Kasi, bazali kosala mosala na bango na litambwisi ya Satana mpe bazali kino sikawa na boyokani makasi elongo na bato, bazali kosala nyonso mpo na konyokola mibali, basi mpe ata bana. (Emoniseli 12:12, 17). 15/4,lokasa 14.

◻ Mpo na nini ezali ntina ‘na koyina makambo oyo ezali mabe’ na miso na Jéhovah? (Nzembo 97:10)

Baoyo bazali koyina mabe bakolukaka libaku moko te mpo na kosala yango; nzokande, baoyo bazali koyina mabe te, mbala mosusu bakoki mpe kosala yango te kasi nde bakolona mposa yango kati na makanisi​—15/4, lokasa 21.

◻ Toli nini ya moboko ezwami na elakiseli na batalanta oyo Yesu apesaki mpo na baoyo nyonso bazali komiloba ete bazali kolanda Klisto? (Matai 25:14-30)

Basengeli kosenzela ete nakolisa biloko ya Nkolo na bango oyo azali na likoló, na kosanganaka mpenza na mosala ya kosakola. Ezali bobele soko basali ndenge yango nde bakozala na elikya ete bakozwa lokumu epai na Yesu, mpe bakozwa mbano. Na ndenge yango, bakobwakama na molili na libanda te mpe bakobebisama libela te.​1/5, lokasa 9.

◻ Yesu alingaki koloba nini ntango ateyaki bayekoli na ye ete báséngaka na mabondeli na bango: “Kotinda biso na komekama te”? (Matai 6:13.)

Maloba oyo malimboli le ete Jéhovah azali komeka biso. Kasi elakisi ete tokoki kosenga epai na Jehovah ete atika biso te kokwea ntango tomekami mpo na koboya kotosa ye, to mpe topusama na kosala yango te. Tokoki kobondela Tala na biso atambwisa matambe na biso mpo ete tokutaná na lisenginya moko te ya makasi koleka biso. (1 Bakolinti 10:13). 15/5. lokasa 19.

◻ Moklisto akoki kondima ete bazongisa ye mwa ndambo na makila lokola immunoglobuline to albumine?

Lokola bazali kotosa mobeko na Nzambe, baklisto bandimaka te ete bazongisa bango makila na nzoto, ata makila oyo ezali se biloko ya ntina bizwami na makila: lokola plasma, globules rouges, globules blancs to plaquettes. Kasi, ba Témoins de Jéhovah mosusu bandimaki na bolingo na bango moko ete batya bango ndambo moke na ba proteines ya plasma. Tosengeli koyeba ete ndambo moke na ba proteines yango ya plasma elekaka mpenza na nzela ya misisa ya mama oyo azali na zemi kino na misisa ya mwana oyo azali kati na libumu. 1/6, lokasa 30, 31.

◻ Na ndimbola nini Yesu asukolaki makolo ya bayekoli na ye na Elekeli na nsuka oyo asalaki elongo na bango?

Yesu apesaki epai na bayekoli na ye liteya ya komikitisa. Moklisto moko te akoki koluka esika ya liboso mpe kokanisa ete azali na ntina mingi. Banso basengeli kolanda ndakisa na Yesu mpe kozala na mposa ya kosalela bamosusu kozanga elimo ya koponapona ata soko mosala na biso ezali moke mpe ezali kosepelisa biso te, (Yoane 13:12-17).15/6, lokasa 9.

◻ Mpo na nini Bayuda ya Bérée bazalaki kotanga’ Makomami? (Misala 17:11)

Likambo yango elimboli te ete bato wana ya Bérée bazalaki kotya ntembe na liloba na Paulo. kasi bazalaki nde kosala bolukiluki mpo na kozwa elembeteli ete Yesu azalaki solo Masiya. Mingi kati na bango bakómaki bandimi, komonisaka bongo bosembo ya mikano na bango. (Misala 17:12) 15/6. lokasa 18.

◻ “Mokanda na bitumba na Jéhovah’’ ezalaki nini? (Mituya 21:14.)

Ezalaki masolo tokoki kondima na ntina na bitumba oyo Jéhovah asalaki mpo na libota na ye. Mokanda yango efungwamaki mpenzampenza na lisolo ya bolongi na Abrahame na Mabele ya ndaka, liboso na batomboki oyo bazalaki na bibundeli, ndenge yango eyebisami kati na Genese 14. Lisolo na ’’etumba na mokolo monene na Nzambe Mozwi-na-Nguya​—Nyonso” na Armagedon ekozala nsuka na mokanda yango. (Emoniseli 16:14, 16). 1/7, lokasa 20, 22.

◻ Ndenge nini Liloba na Nzambe ezali kosalisa biso na kokanga motema liboso na mpasi?

Biblia elimboli biso mpo na nini Jehovah apesi nzela na mpasi, mpe epesi biso elikya ete etikali moke ekosila (Baloma 5:12: Emoniseli 21:1-5).​—15/7, lokasa 4, 5.

◻ Ndenge nini libota na Jéhovah ekoki lelo oyo ‘kongengisa nkembo na Jéhovah’? (2 Bakolinti 3:18.)

Nkembo na Nzambe ezali kongenga na nzela na “nsango malamu na nkembo na Klisto, ye oyo azali elilingi na Nzambe”. Ba Témoins de Jéhovah bazali komonisa nkembo yango na kolobaka na ntina na nkembo na Jéhovah mpe na nkembo na Bokonzi na ye oyo etambwisami na Mwana na ye (2 Bakolinti 4:4-6).​—15/7. nkasa 15, 16.

◻ Ntango nini moto asengeli kozwa batisimo?

Batisimo ezali litambe oyo moto asengeli kosala soko amipesi mobimba. mpe na motema moko epai na Jehovah, na nzela na Yesu Klisto mpo na kosala mokano na Ye. 1/8, lokasa 14.