Mapamboli ya Yehova ekómisaka biso bazwi

¹ Soki moto akómi na mbongo mingi, mbala mingi bato balobaka ete abongi. Yango wana bato mingi bamonaka ete bato oyo bazali na mbongo baleki bato nyonso na esengo. Nzokande, bato oyo bakanisaka ete moto akoki kosomba bolamu na mbongo bazali mpenza komikosa. (Mos. 5:12) Bato oyo “bazali na mposa ya kokóma bazwi” na makambo ya mosuni, esengo na bango ezalaka ya ntango molai te. (1 Tim. 6:9) Kasi, basaleli ya Yehova bazali mpenza bato ya esengo mpe bazali na bozwi koleka bato mosusu nyonso. (Mas. 10:22; Emon. 2:9) Na ndenge nini?

² Makambo oyo ezali komonisa bozwi na biso: Tokangi ntina ya makambo ebele ya elimo mpe tozali na boyebi ya Liloba ya Nzambe, Biblia. Na nzela ya ebongiseli na ye oyo ezali awa na mabele, Yehova azali ntango nyonso koteya biso makambo oyo etali ye moko mpe makambo oyo etali Mwana na ye, makambo oyo ekomemela biso bolamu ya seko. Boyebi ya solosolo oyo tozali kozwa ezali kopesa biso likoki ya kobɛlɛma na Yehova mpe ya kokóma baninga na ye ya motema. (Yak. 4:8) Lokola tozali kokesenisa malamu na mabe mpe tozali kotosa mibeko ya Nzambe, yango ezali kobatela biso na maladi mosusu mpe na makama mingi. Tozali kosepela na oyo tozali na yango mpe tozali na kimya na makanisi, mpamba te tozali na elikya ete Yehova akopesa biso biloko oyo tozali na yango mposa mpo na kobikela.​—Mat. 6:33.

³ Tozali na kimya mpe na bomoko na bandeko na biso ya elimo mpo tozali kokolisa mbuma ya elimo ya Nzambe. Lokola tozali na bolingo makasi kati na biso, tozali mpe na bomoko, na bongo soki tokutani na bampasi, tokokanisa soki moke te ete Nzambe asundoli biso to mpe bandeko na biso basundoli biso.​—Gal. 6:10.

⁴ Bomoi na biso ezali mpenza na ntina mpe ezali na mokano. Totalelaka mosala ya kosakola nsango malamu na mokili mobimba lokola libaku moko malamu. Tozalaka ntango nyonso na esengo soki tozali kosalisa bato mosusu ete bákóma baninga ya Nzambe mpe básalela ye na bomoko elongo na biso. Mosala na biso ya kosakola ezali na motuya mingi mpo ekumisaka Yehova mpe esalaka ete tósepela na ndenge tozali kosala yango mpo na kosantisama ya nkombo na ye. Tozalaka na makanisi ya malamu, lokola toyebi ete etikali moke elikya na biso mpo na mikolo oyo ezali koya ekokisama.

⁵ Tómonisa botɔndi: Tiká ete ntango nyonso tómonisaka botɔndi mpo na mapamboli ya Yehova oyo ezali kosala ete tózala mpenza bato oyo baleki bato nyonso na bozwi awa na mabele. (Mas. 22:4) Soki tozali kozwa ntango mokolo na mokolo mpo na komanyola likoló na oyo tozali na yango, yango ekosala ete tótɔnda Yehova mpo na bolingo na ye mpe tólanda ntango nyonso kosambela bobele ye.