Koyekola Biblia ememaka bolamu. Kasi ezalaka ntango nyonso pɛtɛɛ te. Ntango mosusu, okoki komituna soki okokoba koyekola Biblia. Mpo na nini ezali na ntina osala makasi mpo okoba koyekola? Nini ekoki kosalisa yo otika koyekola te ata soki okutani na mikakatano?

1. Mpo na nini koyekola Biblia ezali na ntina?

Biblia elobi ete: “Liloba ya Nzambe ezali na bomoi mpe na nguya.” (Baebre 4:12) Biblia ezali na ntina mpo ezali komonisa makanisi ya Nzambe mpe ndenge oyo alingaka yo. Ekosalisa yo okóma na boyebi, bwanya mpe elikya ya solosolo. Mpe oyo eleki ntina, Biblia ekosalisa yo okóma moninga ya Yehova. Ntango ozali koyekola Biblia, ekokómisa bomoi na yo malamu mpenza.

2. Mpo na nini ezali na ntina koyeba valɛrɛ ya mateya ya Biblia?

Mateya ya Biblia ezali lokola biloko ya motuya mingi. Yango wana Biblia elendisi biso ‘tósomba solo mpe tótɛka yango ata moke te.’ (Masese 23:23) Soki toyebi ete mateya ya Biblia ezali na ntina, tokosala makasi mpo tókoba koyekola ata ntango tokutani na mikakatano.​—Tángá Masese 2:4, 5.

3. Ndenge nini Yehova akoki kosalisa yo okoba koyekola?

Lokola Yehova azali Mozalisi oyo aleki na nguya mpe moninga na yo, alingi kosalisa yo mpo oyeba ye malamu. Akoki kopesa yo “mposa mpe nguya ya kosala yango.” (Tángá Bafilipi 2:13.) Yango wana, akoki kosalisa yo mbala nyonso oyo ozali na mposa ya kokoba koyekola mpe kosalela makambo oyo ozali koyekola. Soki ozali na mposa ya nguya mpo na kolonga mikakatano to botɛmɛli, akopesa yo yango. Sɛngá Yehova mbala na mbala na libondeli asalisa yo okoba koyekola Biblia.​—1 Batesaloniki 5:17.

KƆTÁ NA MOZINDO

4. Tyá boyekoli na yo ya Biblia na esika ya liboso

Na bantango mosusu tozalaka na makambo mingi ya kosala, ekoki komonana ete tozali mpenza te na ntango ya koyekola Biblia. Nini ekoki kosalisa yo? Tángá Bafilipi 1:10, mpe na nsima yanolá na mituna oyo:

• Okanisi nini, makambo nini eleki ntina na bomoi?

• Okoki kosala nini mpo na komonisa ete boyekoli na yo ya Biblia ezali na ntina?

1. Soki otye liboso zɛlo na katini mpe na nsima obakisi mabanga, mabanga mosusu ekozanga esika

2. Kasi soki otye mabanga liboso, zɛlo nyonso ekokɔta. Ndenge moko, soki otye na esika ya liboso “makambo oyo eleki ntina” na bomoi, okosala makambo yango mpe okozala na ntango ya kosala makambo mosusu

Koyekola Biblia ekokisaka bamposa na biso ya elimo, elingi koloba, mposa ya koyeba Nzambe mpe ya kosambela ye. Tángá Matai 5:3, mpe na nsima yanolá na motuna oyo:

• Bolamu nini tokozwa soki totye boyekoli ya Biblia na esika ya liboso na bomoi na biso?

5. Kobá koyekola ata soki batɛmɛli yo

VIDEO: Azwaki mapamboli mpo akobaki koyekola (5:22)

• Na video oyo, baninga mpe bandeko ya Francesco basalaki nini ntango ayebisaki bango makambo oyo azali koyekola?

• Mapamboli nini azwaki mpo akobaki koyekola?

Tángá 2 Timote 2:24, 25, mpe na nsima yanolá na mituna oyo:

• Bandeko na yo ya libota mpe baninga na yo balobaka nini mpo na makambo oyo ozali koyekola?

• Na kotalela bavɛrsɛ oyo, okosala nini ntango moto moko asepeli te mpo ozali koyekola Biblia? Mpo na nini?

6. Tyá motema ete Yehova akosalisa yo

VIDEO: Yehova asalisi biso tóbongola bomoi na biso (3:56)

• Na video yango, bambongwana nini Jim asalaki mpo na kosepelisa Yehova?

• Nini ekamwisi yo na ndakisa na ye?

Tángá Baebre 11:6, mpe na nsima yanolá na mituna oyo:

• Yehova akosala nini mpo na “baoyo bazali koluka ye na mposa makasi,” elingi koloba, baoyo basalaka makasi ya koyeba ye mpe kosepelisa ye?

• Yehova ayokaka ndenge nini ntango amonaka ete ozali kosala milende mpo na koyekola Biblia?

NA MOKUSE

Atako koyekola Biblia ezalaka ntango nyonso pɛtɛɛ te, yango ekosalisa yo osepela na bomoi libela na libela. Kobá kotyela Yehova motema mpe akopambola yo.

Bozongeli

• Mpo na nini mateya ya Biblia ezali na motuya mingi mpo na yo?

• Ndenge nini okoki kotya “makambo oyo eleki ntina” na esika ya liboso a bomoi na yo?

• Mpo na nini osengeli kosɛnga Yehova asalisa yo okoba koyekola Biblia?

MAKANISI MOSUSU

Talá mayele minei oyo esalisi bato mingi básalela ntango na bango malamu.

“Ndenge ya kosalela ntango na yo malamu” (Lamuká! ya 02/2014)

Talá ndenge Yehova asalisaki mwasi moko oyo mobali na ye azalaki koyeba te ntina oyo azalaki kosala makasi ya kosepelisa Nzambe.

Yehova apesaka biso makasi ya komema mokumba na biso (5:05)

Talá bolamu oyo mobali moko azwaki mpo mwasi na ye akobaki koyekola Biblia.

Ezalaki mpasi nandima solo (6:30)

Na bantango mosusu, bato balobaka ete Batatoli ya Yehova bakabolaka bato na mabota na bango. Yango ezali solo?

“Batatoli ya Yehova bapanzaka mabota ya bato to basangisaka yango?” (Lisolo oyo ezali na Internet)

Biso nyonso tozwaka bikateli. Mingi ya bikateli yango ekoki komemela biso bolamu to mpasi. Ekoki mpe kobongisa to kobebisa boninga na biso ná Yehova. Na ndakisa, tokoki kopona esika oyo tokofanda, mosala oyo tokosala mpo na kozwa mwa mbongo, mpe soki tokobala to te. Soki tozali kozwa bikateli ya malamu, tokozala na esengo mpe tokosepelisa Yehova.

1. Ndenge nini Biblia ekoki kosalisa yo ozwa bikateli ya malamu?

Liboso ya kozwa ekateli moko, bondelá Yehova asalisa yo mpe tángá Biblia mpo na komona ndenge atalelaka likambo yango. (Tángá Masese 2:3-6.) Na makambo mosusu, Yehova apesi mobeko ya polele. Soki ezali bongo, ekozala mpenza malamu otosa.

Bongo soki Biblia epesi mobeko moko ya polele te mpo na oyo osengeli kosala? Yehova akotambwisa yo kaka “na nzela oyo osengeli kotambola.” (Yisaya 48:17) Na ndenge nini? Biblia ezali na mitinda ebele oyo ekoki kosalisa yo. Mitinda ya Biblia ezali mateya ya moboko oyo emonisaka makanisi ya Nzambe mpe ndenge oyo atalelaka makambo. Mbala mingi toyebaka ndenge Nzambe atalelaka likambo moko ntango totángi lisolo moko na Biblia. Ntango tomoni ndenge oyo Yehova atalelaka makambo, tokozwa bikateli oyo ekosepelisa ye.

2. Makambo nini osengeli kotalela liboso ya kozwa ekateli?

Biblia elobi ete: “Moto ya ekɛngɛ akanisaka liboso ya kosala likambo.” (Masese 14:15) Yango elingi koloba ete liboso ya kozwa ekateli, tosengeli kokanisa malamu. Ntango ozali kotalela likambo mokomoko, omituna boye: ‘Mitinda nini ya Biblia nakoki kosalela? Ekateli nini ekopesa ngai kimya ya motema? Ekateli oyo nakozwa ekosala basusu nini? Oyo eleki ntina, ekateli yango ekosepelisa Yehova?’​—Kolimbola Mibeko 32:29.

Yehova nde asengeli koyebisa biso oyo ezali malamu mpe oyo ezali mabe. Soki toyebi malamu mibeko mpe mitinda na ye, mpe tozwi ekateli ya kotosa yango tokozala na lisosoli ya malamu. Lisosoli ezali mongongo moko na kati na biso oyo eyebisaka biso oyo ezali malamu mpe oyo ezali mabe. (Baroma 2:14, 15) Lisosoli oyo eteyami ekosalisa biso tózwa bikateli ya malamu.

KƆTÁ NA MOZINDO

3. Salelá makambo oyo Biblia elobi

VIDEO: Tiká mitinda ya Biblia etambwisa yo (5:54)

• Bonsomi ya kopona ezali nini?

• Mpo na nini Yehova apesá biso bonsomi ya kopona?

• Yehova apesá biso nini mpo tózwaka bikateli ya malamu mpenza?

Tángá Baefese 5:15, 16 mpo na komona etinda moko ya Biblia. Mpe na nsima lobelá ndenge okoki ‘kosalela ntango na yo malamu’ mpo na . . .

• kotánga Biblia mbala na mbala.

• kokóma molongani ya malamu, moboti ya malamu, to mwana ya malamu.

• koyanganaka na makita ya lisangá.

4. Teyá lisosoli na yo mpo ozwaka bikateli ya malamu

VIDEO: “Batelá lisosoli ya malamu” (5:13)

• Na video yango, ndeko mwasi asali nini mpo na koteya lisosoli na ye mpe mpo na kozwa ekateli oyo ekosepelisa Yehova?

Mpo na nini tosengeli te kosɛnga basusu bázwa bikateli na esika na biso? Tángá Baebre 5:14, mpe na nsima yanolá na mituna oyo:

• Atako ekoki kozala pɛtɛɛ kosɛnga basusu bázwa ekateli na esika na biso, biso moko tosengeli kozala na likoki ya kokesenisa nini?

• Nini ekoki kosalisa yo oteya lisosoli na yo mpo ozwaka bikateli ya malamu?

5. Tosá lisosoli ya basusu

Bato nyonso bazwaka bikateli ndenge moko te. Ndenge nini tokoki komonisa ete totosaka lisosoli ya basusu? Tózwa bandakisa mibale:

Ndakisa 1: Ndeko mwasi moko oyo alingaka kosala monzɛlɛ makasi akei na lisangá oyo bandeko basi mingi babɛtaka libaku soki bamoni ndeko mwasi asali monzɛlɛ ya bongo.

Tángá Baroma 15:1 mpe 1 Bakorinti 10:23, 24, mpe na nsima yanolá na mituna oyo:

• Na kotalela bavɛrsɛ yango, ndeko mwasi yango akoki kozwa ekateli nini? Okosala nini soki ozali elongo na moto moko oyo lisosoli na ye epekisi ye kosala likambo oyo lisosoli na yo epekisi yo te?

Ndakisa 2: Ndeko mobali moko ayebi ete Biblia epekisi te komɛla masanga, kasi ye amɛlaka na ye masanga te. Babengisi ye na fɛti to esika moko oyo bandeko mosusu bazali komɛla masanga.

Tángá Mosakoli 7:16 mpe Baroma 14:1, 10, mpe na nsima yanolá na mituna oyo:

• Na kotalela bavɛrsɛ oyo, ndeko mobali yango akoki kozwa ekateli nini? Okosala nini soki omoni moto moko azali kosala makambo oyo lisosoli na yo epekisi yo?

Makambo oyo okoki kosala mpo na kozwa bikateli ya malamu

1. Sɛngá Yehova asalisa yo oyeba oyo okosala.​—Yakobo 1:5.

2. Salá bolukiluki na Biblia mpe na mikanda na biso mpo na koyeba mitinda oyo okosalela. Okoki mpe kosolola na ndeko moko oyo akɔmɛli na elimo.

3. Talá soki ekateli yango ekobɛtisa lisosoli na yo mpe ya basusu libaku to te.

NA MOKUSE

Tokozwa bikateli ya malamu soki toluki koyeba ndenge oyo Yehova atalelaka likambo moko mpe soki bikateli yango ekosalisa basusu to ekopesa bango mpasi.

Bozongeli

• Okoki kosala nini mpo na kozwa bikateli oyo esepelisaka Yehova?

• Ndenge nini okoki koteya lisosoli na yo?

• Ndenge nini okoki komonisa ete otosaka lisosoli ya basusu?

MAKANISI MOSUSU

Okoki kosala nini mpo na kozwa bikateli oyo ekokómisa boninga na yo ná Yehova makasi?

“Bikateli na yo ekumisa Nzambe” (Linɔ́ngi ya Mosɛnzɛli ya 15/04/2011)

Luká koyeba makambo mingi mpo na ndenge oyo Yehova apesaka biso toli.

Yehova akambaka basaleli na ye (9:50)

Luká koyeba makambo oyo esalisaki mobali moko azwa ekateli moko ya monene.

Yehova alaki kopesa nyonso oyo ezali malamu (5:46)

Luká koyeba ndenge oyo okosepelisa Yehova ntango apesi mobeko moko ya polele te na likambo moko boye.

“Osengeli kaka komona naino mobeko ya Biblia?” (Linɔ́ngi ya Mosɛnzɛli ya 01/12/2003)