Luká koyeba likambo malamu — Watchtower MIKANDA OYO EZALI NA INTERNET

Mokakatano

Mbala mingi, bato bakaniselaka baninga mabe mpo báyebi likambo moko malamu te. Tótalela mwa bandakisa:

Bapatrɔ mingi bakanisaka ete basi bakokaka te kosala misala ya mabɔkɔ to ya tekiniki, oyo esɛngi makasi mpe mayele mingi.
Na ntango ya kala, na Mpoto bazalaki kokosela Bayuda makambo ete bazali kotya pwazɔ na maziba ya mai mpe bazali kopalanganisa maladi mabe. Ntango Banazi bazalaki kotambwisa makambo, bazalaki koboma Bayuda. Bazalaki kokosela Bayuda makambo ete soki nkita ya Allemagne ebebi ezali mpo na Bayuda. Makambo yango nyonso esalaki ete bato báyina Bayuda tii lelo oyo.
Bato mingi bakanisaka ete moto oyo azali baba, to oyo akufá miso to matoi, to mpe ebɔsɔnɔ, azali moto ya nkanda to moto mabe.

Bato bandimaka makambo wana mpo mbala mosusu bamonaka makambo oyo etindaka bango bákanisela baninga mabe. Mpe bamonaka ete soki oboyi makanisi na bango ezali mpo oyebi makambo te.

Toli ya Biblia

“Ezali malamu te ete molimo ezanga boyebi.”—MASESE 19:2.

Elingi koloba nini? Soki toyebi likambo malamu te, tokozwa bikateli ya mabe. Soki tondimi bilobaloba, tokokanisela mpe bato mabe.

Ntina ya koyeba likambo malamu

Soki toyebi mpenza ndenge bato mosusu bazalaka, tokondima te makambo ya lokuta oyo bato mosusu bakoki koloba mpo na bango. Mpe ntango toyebi ete makambo mabe oyo bato balobaka mpo na bato moko boye ezali lokuta, tokondima nokinoki te makambo oyo tokoyoka mpo na bato yango.

Makambo oyo esalemaki: Jovica (Na sudi ya mpoto)

Jovica, oyo tolobelaki na ebandeli ya masolo oyo, akolá na esika oyo azali koyoka bato ya mboka na ye, bansango, mpe baprogramɛ ya televizyo ezali koloba mabe mpo na bato moko boye, oyo bazali mingi te. Alobi ete: “Nakómaki kokanisela bato yango mabe, mpe koyina bango makasi, nazalaki kokanisa ezali malamu nayoka ndenge wana.

“Nzokande, ntango nakómaki soda, nasengelaki kaka kofanda mpe kosala na bato yango mpo bazalaki mpe basoda. Nsima ya mikolo, nayebaki bango malamu. Nabandaki kutu koyekola monɔkɔ na bango mpe koyoka banzembo ya mboka na bango. Nakómaki kosepela kofanda na bango mpe nabongolaki ndenge na ngai ya kotalela bango. Kasi nayebi ete makanisi mabe ekoki kozongela ngai. Yango wana, naboyaka koyoka bansango nyonso oyo ezali kolobela bato yango mabe. Lisusu, natalaka te bafilme ná bateyatre oyo ezali kotyola bato yango. Nayebi ete kokanisela moto mabe ekoki komema nkanda mpe koyina.”

Oyo okoki kosala

Bato bakoki koloba ete bato moko boye bazali na bizaleli mabe; kasi kobosana te ete bato yango nyonso te nde bazali na bizaleli wana ya mabe.
Kobosana te, ntango mosusu oyebi bato yango malamu te.
Luká koyeba makambo na bango malamu epai ya bato oyo bayebi bango malamumalamu.