Nzambe asalaka makambo na ndenge oyo “etɛngamá”?

“DEUS ESCREVE CERTO POR LINHAS TORTAS” (“NZAMBE AKOMAKA malamu, kasi na milɔngɔ oyo etɛngamá”), oyo ezali lisese moko ya ekólo Brésil. Yango elingi koloba ete Nzambe asalaka ntango nyonso makambo ya malamu mpenza kasi na bantango mosusu moto amonaka yango mabe. Na ndakisa, soki moto azali naino elenge na nzoto makasi akufi, bato mingi balobaka ete, ‘Nzambe abéngi ye na likoló.’ Soki moto moko azali na mbeba na nzoto to azwi likama, basusu balobaka ete, ‘ezali mokano ya Nzambe.’ Lokola bato bamonaka ete ezali foti ya Nzambe ntango bato bazali kokufa, kotungisama, to kokutana na makambo mosusu oyo epesaka mawa, maloba ya motindo wana elimboli ete Nzambe ‘akomaka na ndenge oyo etɛngamá,’ elingi koloba asalaka makambo na ndenge oyo moto akoki koyeba te.

Mpo na nini bato mingi oyo basambelaka bandimaka ete liwa mpe bampasi eutaka epai ya Nzambe? Mingimingi bindimeli yango euti na ndenge mabe oyo bato basosolaka bavɛrsɛ mosusu ya Biblia oyo ekoki kososolama te na lisalisi ya bavɛrsɛ ya zingazinga. Tiká tótalela na mokuse mwa ndambo na bavɛrsɛ yango.

● “Nani azalisi moto [baba] soko [mokufi-matoi] soko na kotala soko [mokufi-miso]? Ezali ngai [Yehova] te?”​—Exode 4:11.

Yango elingi koloba ete bato nyonso oyo bazali konyokwama na mitungisi ndenge na ndenge ya nzoto ezali foti ya Nzambe? Te. Yango eyokani te na bomoto ya Nzambe. Biblia eyebisi biso ete: “Biloko nyonso bizalisi Nzambe bizali malamu.” (1 Timote 4:4) Tokopesa Nzambe foti te soki moto moko abotami mokufi-miso, baba, to mokufi-matoi. Alingaka kaka makambo ya malamu mpo na bikelamu na ye, mpo ete azali Liziba ya “makabo nyonso malamu mpe makabo nyonso mabongi.”​—Yakobo 1:17.

Baboti na biso ya liboso, Adama na Eva, nde baponaki bango moko kotombokela Nzambe na nko mpe babungisaki ezaleli na bango ya kokoka mpe likoki ya kobota bana oyo bazali bato ya kokoka. (Genese 3:1-6, 16, 19; Yobo 14:4) Wana bana na bango bazalaki kobalana mpe kobota bana, mokemoke bizaleli mabe, bakisa mbeba na nzoto, ebandaki komonana epai ya bato. Lokola Yehova moto abandisaki yango te, atikelaki yango nzela esalema. Na bongo, akokaki koloba mpo na ye moko ete ‘azalisaki’ moto baba, mokufi-matoi, mpe mokufi-miso.

● “Oyo [etɛngami] ekoki kosembolama te.”​—Mosakoli 1:15.

Ezali Nzambe nde moto asalaki biloko ya kotɛngama? Te. Mosakoli 7:29 elobi ete: “Nzambe asalaki moto na sembo; nde bayangi myango mingi.” Biblia Contemporary English Version ebongoli vɛrsɛ yango boye: “Tozalaki mpenza sembo ntango Nzambe azalisaki biso, kasi sikoyo tobebisi makanisi na biso.” Na esika ya kobatela mitinda ya sembo ya Nzambe, basi na mibali, mbala mingi, na nko nyonso, baponaki kolanda myango, mayele, mikano, to banzela na bango moko oyo na nsuka ememeli bango mpasi.​—1 Timote 2:14.

Lisusu, ndenge ntoma Paulo alobaki, mpo na lisumu oyo moto asalaki, ‘mokili mobimba ekómaki mpamba.’ (Baloma 8:20) Mpe likambo yango “ekoki kosembolama te” na milende ya moto. Kaka Nzambe nde akolongola makambo nyonso oyo etɛngamá mpe oyo ezali mpamba na mokili.

● “Talá mosala na Nzambe, nani akoki kosembola oyo ye [etɛngisi] yango?”​—Mosakoli 7:13.

Na maloba mosusu, Mokonzi Salomo atuni boye: ‘Nani na kati ya bato akoki kosembola mbeba mpe kozanga kokoka oyo Nzambe atikeli nzela?’ Moko te, mpo ete, soki Nzambe atiki nzela ete makambo yango esalema ezali na ntina.

Yango wana, Salomo asɛngi ete: “Na mokolo na elonga, zalá na esengo; kanisá na mokolo na mpasi, kanisá naino. Nzambe asali moko lokola mosusu ete moto ayeba likambo likoya na nsima na ye te.” (Mosakoli 7:14) Moto asengeli kosepela na mokolo oyo makambo mazali kotambola malamu mpe komonisa esengo na ye na kosaláká makambo ya malamu. Asengeli kotalela mokolo malamu lokola likabo ya Nzambe. Kasi ezali boni soki mokolo eyei na makambo mabe? Moto akosala malamu soki ‘amoni,’ elingi koloba, ayebi, ete Nzambe atiki nzela makama esalema. Mpo na nini asali boye? Salomo alobi: “Ete moto ayeba likambo likoya na nsima na ye te.” Yango elimboli nini?

Likambo oyo ete Nzambe atiki nzela tómona bisengo na bampasi ezali kolamusa makanisi na biso ete tokoki te koyeba makambo oyo makoyela biso lobi. Likama ekoki kokómela moto malamu to moto mabe. Yango eponaka te. Yango esengeli kosalisa biso na kokanga ntina ya kotya elikya, epai na biso moko te, kasi na Nzambe, mpe koyeba ete “Nzambe azali bolingo.” (1 Yoane 4:8) Atako tokoki koyeba makambo mosusu sikoyo te, tokoki kozala na elikya ete nsima wana makambo nyonso makokokisama, makambo oyo Nzambe atiki nzela ekokokisa mokano malamu mpo na baoyo batalelami na yango.

Likambo nyonso oyo Nzambe atikeli yango nzela ekopesa bato ya mitema sembo mpasi libela na libela te. Ntoma Petelo amonisaki yango polele ntango alobelaki minyoko oyo ekómelaki bandimi na eleko na ye, alobaki ete: “Nzambe na ngɔlu nyonso, ye oyo abyangi bino ete bókɔta na nkembo na ye na seko kati na Klisto, ye moko akokokisa bino, akolendisa bino, akopesa bino makasi, esili bino koyoka mpasi mwa ntango moke.”​—1 Petelo 5:10.

Ntango ya kobongisa makambo

Yehova azali kopesa biso makasi ya kokanga motema na mikakatano oyo tozali kokutana na yango sikoyo. Alaki lisusu kozalisa “biloko nyonso biloko na sika.” (Emoniseli 21:5) Ɛɛ, mokano na ye ezali ete mosika te na nzela ya Bokonzi na ye bato oyo bazali konyokwama na mikakatano bakozonga nzoto kolɔngɔnɔ mpe bakufi bakosekwa. Bokonzi yango ekolongola lisusu moto oyo misala na ye etɛngamá, elingi koloba Satana Zabolo. (Yoane 5:28, 29; Baloma 16:20; 1 Bakolinti 15:26; 2 Petelo 3:13) Ekozala lipamboli mpo na bato oyo babangaka Nzambe na mokili mobimba wana ntango oyo Nzambe aponaki mpo na kobongisa makambo ekokoka!

[Maloba mpo na kolimbola eutelo ya bafɔtɔ na lokasa 28]

Yobo azali koyoka nsango ya mpasi na ye/The Doré Bible Illustrations/Dover Publications