Bozalisi ya sika!

SALOMO, mokonzi ya mayele, alobaki mokolo mosusu ete: “Likambo na sika lizali te na nse na moi.” (Mosakoli 1:9) Ya solo, yango elobeli mokili oyo tofandi, kasi ezali boni mpo na ebongiseli monene ya Jehovah mpo na kozalisama ya elimo? Kati na ebongiseli yango, ezali na moto moko aleki Salomo na monene, oyo alekaki bato nyonso kino lelo, akomaki eloko ya sika oyo eleki monene. Lolenge nini yango esalemaki?

Na mobu 29 ya ntango na biso, Yesu, moto ya kokoka, akendaki epai na Yoane mpo na kobatisama na ebale Yordani. “Esili Yesu kobatisama, abimi nokinoki na mai; mpe tala makolo mafungwani, mpe amoni elimo na Nzambe kokitela ye lokola ebenga. Mpe mongongo moyokami longwa na makolo ete: ‘Oyo azali Mwana molingami na ngai; ngai nandimi ye.’” (Matai 3:16, 17, MN) Bongo, moto Klisto Yesu azalaki ekelamu ya liboso kati na bozalisi ya sika, oyo apakolamaki mpo na kosala mokano ya Nzambe. Na nsima, na nzela ya liwa na ye lokola mbeka, Yesu akomaki Moyokanisi ya kondima-na ya sika kati na Nzambe mpe etuluku ya bato oyo baponamaki. Mokomoko na bango asili kokoma “bozalisi ya sika,” abotami na elimo ya Nzambe mpo na elikya ya likolo, mpo na koyangela elongo na Yesu kati na Bokonzi na ye ya likolo.​—2 Bakolinti 5:17; 1 Timote 2:5, 6; Baebele 9:15.

Na boumeli ya bikeke, bapakolami wana, baklisto babotami na elimo bayanganisamaki na bomoko elongo na Klisto lokola lisanga ya boklisto ya solo, oyo ezali yango moko bozalisi ya sika. Nzambe abyangi bango longwa na mokili oyo mpo na mokano moko, lokola ntoma Petelo alobaki yango ete: “Bino bozali ˈlibota lipanami, bonganga na bokonzi, libota mosantu, bato balakami mpo na kosala libota ya ntina mingi, ete bosakola misala malamuˈ na ye oyo abyangaki bino longwa na molili mpo na kokɔta na pole na ye na kokamwa.” (1 Petelo 2:9, MN) Lokola Klisto Yesu, ekelamu ya liboso na bozalisi ya sika na Nzambe, bozalisi mosusu wana ya sika, ezali na mokumba ya liboso ya kosakola nsango malamu. (Luka 4:18, 19) Moko na moko kati na basangani na yango, baoyo bazali bongo na motuya ya 144 000, asengeli “kolata bomoto na sika oyo bozalisami na mokano na Nzambe kati na boyengebene mpe na bosembo ya solo.” (Baefese 4:24, MN; Emoniseli 14:1, 3) Esengeli na bango ete balona “mbuma ya elimo,” oyo elobelami na Bagalatia 5:22, 23, mpe kokokisa mokumba na bango ya kopesa bilei na bosembo nyonso.​—1 Bakolinti 4:2; 9:16.

Ezali boni mpo na bozalisi yango ya sika na mikolo na biso? Na mobu 1914, lokola yango emonisamaki na manaka ya Biblia, maloba ya Emoniseli 11:15 makokanaki, ete: “Bokonzi ya mokili oyo esili kokoma bokonzi ya Nkolo na biso [Jehovah] mpe ya Klisto na ye, mpe akozala mokonzi libela na libela.” Mosala ya liboso ya Klisto lokola Mokonzi oyo auti kotyama sika, ezalaki bongo ya kobengana Satana mpe bilimu mabe na ye longwa na likolo mpo na kobwaka bango na zingazinga ya mabele. Yango ebimisaki “mawa mpo na mabele,” na lolenge ya Etumba ya Liboso ya mokili mobimba mpe bampasi oyo eutaki na yango.​—Emoniseli 12:9, 12, 17.

Yango ezalaki mpe likebisi mpo na batikali ya bozalisi ya sika awa na mabele ete basengelaki kosala mpo na kokokisama ya esakweli oyo na Yesu ete: “Nsango malamu oyo na bokonzi [bosili kotyama] ekosakolama na mokili mobimba, lokola litatoli na mabota nyonso; mpe bongo nsuka ekoya.” “Nsuka” yango ezali nini? Yesu alandi kopesa ndimbola ete: “Ekozala na bolozi monene lokola oyo emonani naino te uta ebandeli ya mokili kino sikawa, mpe ekobima lisusu te. Ee, soki mikolo yango miyeisamaki mokuse te, mbele moto moko te akobika; nde mikolo yango miyeisami mokuse mpo na baponami.”​—Matai 24:3-14, 21, 22, MN.

Elimo ya Jehovah epusaki bapakolami wana ya bozalisi na ye ya sika ete bamipesa mingi kati na mosala monene ya kosakola na motindo esalemaki naino te awa na mabele. Kobanda na mwa bankoto na 1919, motuya ya basakoli na Bokonzi wana ya molende ekomaki soko 50 000 na katikati ya bambula 1930. Lokola yango esakolamaki, “lokito na bango loyokani na mokili mobimba, maloba na bango kino na nsuka ya mokili.”​—Baloma 10:18.

Ezali bobele batikali ya bozalisi ya sika nde basengeli koyanganisama mpo na lobiko? Te, mpamba te esakweli elobaki ete baanzelu ya Nzambe bakosimba mipepe ya bolozi monene kino nsuka na koyanganisama bobele te ya Bayisraele ya elimo oyo bakokende na likolo; kasi mpe ya bato mosusu, “ebele monene, oyo moto te akoki kotanga motuya na bango; bauti na mabota nyonso, na mikili nyonso, na bikolo nyonso, mpe na minoko nyonso.” Nsuka na bango ekozala nini? Ee, bakobika na “bolozi monene” mpo na kozwa bomoi ya seko kati na paradis awa na mabele!​—Emoniseli 7:1-4, 9, 14.

Na esengo nyonso, ebele monene wana, baoyo bauti soko na mikili 229, basili kokoma Batemwe ya molende pene na 4.500.000. Mingi mosusu bazali koya, lokola yango emonisami na motuya ya bayangani 11 431 171 na Ekaniseli ya liwa na Yesu na le 17 avril ya mobu oyo mouti koleka. Kati na bamili6 nyonso wana, bobele 8 683 baoyo bazali koyambola ete bazali batikali ya bozalisi ya sika awa na mabele, nde balyaki limpa mpe bamelaki vinyo na Ekaniseli. Baoyo bazali kati na etuluku oyo moke bakokaki te, bango moko, kokokisa mosala monene ya kosakola oyo mozali kosalema na mikolo na biso. Bamilio na bato oyo basali ebele monene bazali kosala sikawa elongo na bango kati na mosala yango. (Sofoni 3:9) Lisusu, basangani mosusu ya ebele monene oyo bazali na makoki, bazali kosala sikawa na babiro mpe basusu bazali kokokisa mikumba misusu na kosalisaka bapakolami ya College central ya Yisraele ya elimo, lokola Banetinime oyo bazalaki Bayisraele te, bazalaki kosala elongo na banganga mpo na kotonga lisusu lopango ya Yelusaleme.​—Nehemya 3:22-26.

Kozalisama ya “makolo ya sika mpe mabele ya sika”

Oyo nde esengo ezwami na koyanganisama wana! Ezali lokola Jehovah ayebisaki ete: “Tala nazali kozalisa makolo ya sika mpe mabele ya sika; mpe makambo ya liboso makokanisama te, makoya mpe na motema te. Kasi bosepela mpe bozala na esengo libela na ntina na oyo ezali ngai kozalisa. Mpo ete nazali kotonga Yelusaleme mpo na kopesa esengo mpe bato na ye bakozala mpo na kosepelisa. Mpe nakooka esengo kati na Yelusaleme mpe nakosepela kati na bato na ngai; mpe mongongo na kolela mokoyokana lisusu te kati na yango, to konganga na mpasi te.” (Yisaya 65:17-19) Makolo ya sika oyo makozalisama na Jehovah, masangisi Klisto Yesu mpe ba 144 000 ya bozalisi ya sika oyo basili kosekwisama, baoyo basombamaki kati na bato na boumeli ya bikeke 19 oyo bisili koleka. Boyangeli wana ezali mpenza na nkembo monene koleka bikonzi nyonso oyo bisila koyangela na Yelusaleme awa na mabele, ata na mikolo ya Salomo. Yango esangisi Yelusaleme ya Sika, mboka ya likolo, oyo emonisami na bonzenga na kongenga na yango kati na Emoniseli mokapo 21.

Yelusaleme ya Sika ezali mwasi ya elimo ya Klisto, bayekoli na ye bapakolami 144 000, baoyo bakolanda Mobali na bango na libala na likolo nsima na liwa na bango mpe lisekwa na bango kati na elimo. Bamonisami na Emoniseli 21:1-4 lokola ete bazali “kokita longwa na likold epai na Nzambe,” yango elimboli ete azali kosalela bango mpo na kopesa mapamboli epai na bato awa na mabele. Na motindo wana nde esakweli oyo ekokani, ete: “Tala! Efandelo na Nzambe ezali esika moko na bato. Akofanda na bango esika moko, mpe bango bakozala bato na ye, mpe Nzambe ye mpenza akozala na bango elongo. Akolongola mpisoli nyonso na miso na bango, mpe kufa ekozala lisusu te, na mawa, na kolela, na mpasi, lisusu mpe te; mpo ete makambo na liboso masili koleka.”

Tosengeli mpenza kozala na botondi mpo na makolo ya sika oyo Nzambe asili kosala! Na kokesena na biyangeli ya ntango mokuse mpe ya mabe oyo bizali konyokola bato uta kala, boyangeli wana bobongisami na Nzambe bokoumela libela. Bozalisi ya sika mpe bakitani na yango na elimo, ebele monene, bazali kosepela na elaka oyo ya Nzambe, ete: “Jehovah alobi ete, ˈlokola ekoumela makolo ya sika mpe mabele ya sika oyo nakosala, bakitani na bino mpe nkombo ya libota na bino ekoumela bongo.ˈ”​—Yisaya 66:22, MN.

“Mabele ya sika” masili kobanda na bakitani wana ya bapakolami ya bozalisi ya sika. Ezali libota ya sika ya bato oyo bakobangaka Nzambe awa na mabele. Koyina, mabe, mobulu, kanyaka, mpe pite oyo ezali lelo na mokili, esengi mpenza ete mbongwana monene esalema mpo na kozwa libota ya sika ya bato awa na mabele, na litambwisi ya makolo ya sika ya boboto. Wana ezali bongo mokano ya Jehovah. Lokola azalisaki makolo ya sika, bobele bongo azali kozalisa mabele ya sika na koyanganisaka ebele monene lokola moboko ya libota ya mokili ya sika mpe ya kimya. Bobele libota wana ya bato nde ekobika “na bolozi monene.”​—Emoniseli 7:14.

Tokoki komizela na likambo nini nsima na bolozi monene? Kolobaka epai na bantoma na ye, bato ya liboso kati na baoyo basali makolo ya sika oyo makoyangela mabele ya sika, Yesu apesaki elaka ete: “Nazali koloba na bino solo ete, na ntango ya kozalisama ya sika, wana Mwana na moto akofanda na kiti na ye ya bokonzi na nkembo, bino baoyo bolandaki ngai, bokofanda mpe na kiti zomi na mibale ya bokonzi.” (Matai 19:28, MN) Ba 144 000 nyonso ya Yelusaleme ya Sika bakozala elongo na Yesu mpo na kosambisa bato. Bolingo ekozwa esika ya moimi mpe koyina oyo ezali lelo lokola moboko oyo libota na bato litongami likolo na yango. Kokabwana na ntina na bikolo, na ntina na mposo, mpe koswana kati na mikili ekolongolama. Mokemoke, balingami na biso oyo basila kokufa, bakozongisama na bomoi na nzela ya lisekwa. Bamiliare mingi ya bato wana ya sembo bakozala libota moko monene, ya bomoko, oyo ekopesamela bomoi ya seko na mabele oyo makobongwana paradis.

Yango ekozala Ndoto mpamba te soko makanisi mpamba te. Ekozala nde bozalisi ya libela​—“tozali kozela makolo ya sika mpe mabele ya sika, epai boyengebene ekofanda kati na yango”! (2 Petelo 3:13, MN) Ya solo, oyo ezali elikya moko kitoko, elaka kitoko epesamaki na ye oyo alobaki ete, “Tala: Nazali kozalisa biloko nyonso, biloko ya sika,” mpe oyo abakisaki maloba oyo mazali kolendisa kondima ete: “Maloba oyo mazali sembo mpe solo.”​—Emoniseli 21:5.