Ozali komikundola?

Osepelaki na botángi ya banimero ya Linɔ́ngi ya Mosɛnzɛli oyo eutaki kobima? Na bongo, talá soki okoki koyanola na mituna milandi:

• Nini etindaki bato ya Corée na kosepela na fɛti ya Noele?

Lisapo moko ya kala ya bato ya Corée mpe bikólo misusu, ezalaki kolobela nzambe ya kuku. Bazalaki koloba ete na sanza ya Desɛmbɛ, nzambe yango azalaki koya na makabo mpe azalaki kokɔta na mombonda oyo ebimisaka milinga ya kuku. Lisusu, nsima na Etumba ya Mibale ya mokili mobimba, basoda ya États-Unis bazalaki kopesa makabo mpe biloko mosusu na ndakonzambe mpo na kosunga bato.—15/12, nkasa 4, 5.

• Na kolanda Yisaya 21:8, Nzambe atii nani lokola “mosɛnzɛli” na mikolo na biso?

Baklisto bapakolami na elimo, oyo bazali kosala lokola mosɛnzɛli, bazali kokebisa bato na ndenge bazali komonisa bango ndimbola ya makambo oyo ezali koleka na mokili ete ezali kokokisa bisakweli ya Biblia. Basalisi mpe Bayekoli ya Biblia báyeba mpe báboya mateya mpe misala oyo ezali na Biblia te.—1/1, nkasa 8, 9.

• Ba “Frères Polonais” bazalaki banani?

Ezalaki mwa lingomba moko na Pologne na ekeke ya 16 mpe ya 17, bazalaki kolendisa bato bándima Biblia. Yango wana, baboyaki bindimeli ya mangomba ya ntango wana, lokola Trinite, kobatisa bana mike mpe lifelo ya mɔ́tɔ. Na nsima, banyokolaki bango makasi mpe bapalanganisaki bango na mikili mosusu.—1/1, nkasa 21-23.

• Mpo na nini tosengeli kondima bisakweli ya Biblia na esika ya kondima makambo oyo bato balobaka mpo na kosakola makambo ekoya to bato oyo bayekolaka minzoto?

Tokoki te kondimela bato oyo balobaka ete bazali basakoli, mpamba te balandaka Yehova te balandaka mpe Biblia te. Kaka bisakweli ya Biblia nde ekoki kosalisa yo na koyeba ndenge nini makambo oyo ezali kosalema ezali na boyokani na mokano ya Nzambe mpo ete yo na libota na yo bókoka kozwela yango bolamu ya seko.—15/1, lokasa 3.

• Tángá mwa makambo oyo emonisi ete tozali na mikolo ya nsuka.

Tozali komona makambo oyo ezali kobima banda babwakaki Satana na nse. (Emoniseli 12:9) Tozali na eleko ya “mokonzi” ya nsuka oyo alobelami na Emoniseli 17:9-11. Baklisto bapakolami batikali moke, atako emonani ete bamosusu kati na bango bakozala naino na mabele ntango bolɔzi monene ekobanda.—15/1, nkasa 12, 13.

• Mokanda ya Habakuku ekomamaki ntango nini mpe mpo na nini tosengeli koluka koyeba makambo oyo ezali na mokanda yango?

Mokanda yango ekomamaki soki na mobu 628 L.T.B. Ezali kolobela etumbu oyo Yehova asengelaki kopesa Yuda ya kala mpe Babilone. Ezali mpe kolobela etumbu oyo Nzambe akopesa mokili mabe oyo.—1/2, lokasa 8.

• Na kati ya Biblia, esika nini tokoki komona toli ya mayele oyo mama moko apesi mpo na basi malamu?

Na mokapo ya nsuka ya mokanda ya Masese, elingi koloba mokapo 31 ezali mpenza na toli malamu na likambo yango.—1/2, nkasa 30, 31.

• Mpo na nini tosengeli kozala na botɔndi ete Yehova amonisi biso “makanisi ya Klisto”? (1 Bakolinti 2:16)

Na kati ya Baevanzile, Yehova asalisi biso tóyeba makanisi na Yesu, motema na ye, bizaleli na ye, misala na ye mpe makambo oyo elekaki ntina na bomoi na ye. Yango ekoki kosalisa biso tózala malamu lokola Yesu, mingimingi na ndenge oyo tokotya makanisi na mosala ya kosakola oyo ezali kobikisa bomoi ya bato.—15/2, lokasa 25.

• Nzambe ayokaka mabondeli lelo oyo?

Ɛɛ. Atako Biblia emonisi ete Nzambe ayokaka mabondeli ya bato nyonso te, masolo ya bato mosusu na mikolo na biso emonisi ete mbala mingi, Nzambe ayokaki mabondeli ya bato oyo basɛngaki ete abɔndisa bango to asalisa bango na makambo lokola mikakatano ya libala.—1/3, nkasa 3-7.

• Tokoki kosala nini mpo tózwa nguya ya Nzambe?

Tokoki kosɛnga yango na libondeli, tokoki kozwa nguya ya elimo na Biblia mpe tokoki kolendisama ntango tozali esika moko na bandeko na biso baklisto.—1/3, nkasa 15, 16.

• Ndenge nini baboti bakoki kosalisa bana na bango bálandaka makita malamu?

Bakoki kosalisa bana na bango bálala ata mwa moke liboso bákende na makita mpo bázala na mpɔngi na miso te. Bakoki kosalisa bana na bango bázwaka “banɔti,” na ndakisa, kokoma mwa bilembo na papye mbala nyonso oyo bayoki maloba oyo bamesaná koyoka.—15/3, nkasa 17, 18.

• Ndakisa ya Yobo ekoki koteya biso makambo nini?

Yobo atyaki boninga na ye na Nzambe na esika ya liboso, azalaki na boyokani malamu na bazalani na ye, azalaki sembo epai ya mwasi na ye, azalaki komibanzabanza ete libota na ye ezala malamu na elimo, mpe ayikaki mpiko na bosembo nyonso na ntango ya komekama.—15/3, nkasa 25-27.

• Biblia ezali na makambo ebombami oyo ezali kolimbola bansango oyo eyebisami polele te?

Te. Makambo oyo bazali koloba ete ebombami na Biblia ekoki mpe kozala bongo na mikanda mosusu ya mokili. Makambo oyo bato bazali kokanisa ete ebombami na kati ya Biblia ekozala na ntina te mpamba te na Liebele, ndenge bakomi balɛtrɛ na maniskri moko ekeseni na maniskri mosusu.—1/4, nkasa 30, 31.