²⁰ Nzambe ayebisaki Yona ete ayoki mawa mpo mwa molona oyo ekolaki na butu moko mpamba ekufaki, molona oyo ye alonaki te mpe akolisaki te. Na nsima, Nzambe abakisaki ete: “Bongo ngai, nasengeli nde koyokela Ninive engumba oyo monene mawa te, engumba oyo ezali na bato koleka nkóto nkama moko na ntuku mibale (120 000) oyo bayebi ata moke te kokesenisa lobɔkɔ na bango ya mobali ná lobɔkɔ na bango ya mwasi, bakisa mpe ebele ya banyama ya mboka?”​—Yona 4:10, 11.c

21. (a) Ndakisa nini Yehova asalelaki mpo na koteya Yona? (b) Ndenge nini lisolo ya Yona ekoki kosalisa biso tómitalela?

²¹ Omoni liteya monene oyo Yehova alingaki kopesa na ndakisa wana? Yona asalaki eloko moko te mpo na kokolisa molona wana. Nzokande, Yehova nde apesaki bato ya Ninive bomoi mpe azalaki kobatela bango ndenge asalaka mpo na bikelamu na ye nyonso awa na mabele. Ndenge nini Yona akokaki kopesa mwa molona wana motuya mingi koleka bato 120 000 ya Ninive, ná bibwɛlɛ na bango nyonso? Ezali nde mpo Yona akómaki kokanisa kaka bolamu na ye? Emonani polele ete ayokaki mawa mpo na mwa molona wana kaka mpo ezalaki kobatela ye na moi. Nkanda oyo ayokaki mpo na Ninive ezalaki kaka mpo azalaki koluka matomba na ye moko, kobatela lokumu na ye, mpe mpo bato bándima ete azalaki na elonga. Lisolo ya Yona ekoki kosalisa biso tómitalela. Nani kati na biso ekómelá ye te akóma koluka naino kaka bolamu na ye moko? Tosengeli kopesa Yehova matɔndi ndenge azali koteya biso na motema molai nyonso ete tótika koluka kaka matomba na biso mpe tómonisaka motema mawa, ndenge ye asalaka!