“Elembo longwa na Likoló”

Lisese moko ya kala lilobi ete: “Wana likoló lizalia motane na butu, basali na masuwa bakosepela, soki likoló limonani motane na ntɔngɔ́ basali na masuwa bazwi likebisi.” Lelo oyo, ba satellites, ba ordinateurs mpo na koyeba bomati ya molunge to ya mpio, masini ebengami ete Doppler radar, mpe myango misusu ya sianse mizali kosalelama mpo na koluka koyeba soki mbula ekobeta te, to soki moi to malili ekozala. Mbala mingi bilembo yango bizali kokokana na lisese oyo liyebisami awa na likoló.

Bakonzi na mangomba bayini na Yesu Klisto basengaki ye mokolo moko “elembo longwa na likoló,” likambo moko ya kokamwa oyo likomonisa ete azalaki Masiya. Alobaki na bango ete: “Na ntango na mpokwa bokolobaka: ‘Lola ekozala malamu mpo ete likoló ezali motane.’ Mpe na ntɔngɔ́ ete: ‘Mbula lelo mpo ete likoló ezali motane mpe ezali koyinda.’ Boyebi kososola bilongi na likoló nde bokoki kososola bilembo na ntango te. Libota mabe mpe na pite, bazali koluka elembo nde bakozwa elembo te bobele elembo ya Yona.”​—Matai 16:1-4.

Bayini na Yesu bayebaki kososola bilembo ya likoló kasi bazalaki na makoki te ya kokanga ntina ya makambo ya elimo. Na ndakisa, nini ezalaki “elembo ya Yona”? Nsima ya kolekisa mikolo misato kati na libumu ya mbisi monene, Yona, mosakoli na Nzambe, asakolaki na Ninive mpe akómaki bongo elembo mpo na engumba monene wana ya Asulia. Bato ya eleko na Yesu bazalaki na “elembo ya Yona” wana Klisto alekisaki mikolo misato kati na nkunda mpe asekwisamaki. Bayekoli na ye basakolaki bosolo ya likambo wana, mpe na yango Yesu azalaki elembo ya ntango wana.​—Matai 12:39-41.

Na libaku mosusu, bayekoli na Yesu batunaki ye “elembo” ya “kozala” na ye na nguya kati na Bokonzi na mikolo mizali koya. Kati na eyano na ye, apesaki elembo moko oyo esangisi makambo mingi, lokola bitumba minene, koningana monene ya mabelé, nzala mpe kosakolama kati na mokili mobimba ya Bokonzi ya Nzambe oyo esili kotyama.​—Matai 24:3-14.

Ozali kososola elembo ya kozala kozanga komonana ya Klisto lokola Mokonzii kati na likoló? Makambo mazali na kati ya elembo yango mazali kokokana na libota oyo. (Matai 24:34) Mpe ezali boni mpo na mikolo mizali koya? Biblia emonisi te bobele ete nsuka ya biloko na ntango oyo ebɛlɛmi, kasi ezali kosakola lisusu boyei ya mokolo ya sika oyo Nzambe alakaki, oyo mosika te ekotanela mpe ekongɛngisa bato.​—2 Petelo 3:13.