Yesu ateyi biso

Na ntina na avenire ya bato

Yesu alakaki bato bomoi na likoló?

Ɛɛ, alakaki! Ye moko asekwaki mpe amataki na likoló, mpo na kozala elongo na Tata na ye. Kasi, liboso ya liwa mpe lisekwa na ye, ayebisaki bantoma na ye ya sembo 11 boye: “Na ndako ya Tata na ngai bisika ya kofanda ezali mingi. . . . Nazali kokende kobongisela bino esika.” (Yoane 14:2) Nzokande, bato oyo bakozwa libaku yango bazali mingi te. Yesu amonisaki yango ntango alobaki na bayekoli na ye boye: “Bóbanga te, etonga moke, mpamba te Tata na bino andimi kopesa bino bokonzi.”​—Luka 12:32.

“Etonga moke” bakosala nini kuna na likoló?

Tata alingi ete etuluku moke yango ya bato bázala na kati ya guvernɛma ya likoló elongo na Yesu. Ndenge nini toyebi yango? Nsima ya lisekwa na ye, Yesu ayebisaki ntoma Yoane ete bato mosusu ya sembo bakozala bakonzi mpo na “koyangela mabelé.” (Emoniseli 1:1; 5:9, 10) Yango ezali nsango malamu. Bato bazalaka na mposa makasi ya guvernɛma ya malamu. Guvernɛma yango ya Yesu ekokokisa makambo nini? Yesu alobaki boye: “Na bozalisi lisusu, ntango Mwana ya moto akofanda na kiti ya bokonzi na ye ya nkembo, bino baoyo bolandaki ngai bokofanda mpe na bakiti ya bokonzi zomi na mibale.” (Matai 19:28) Boyangeli ya Yesu elongo ná bayekoli na ye ekopesa nzela na “bozalisi lisusu,” to mpe kozongisama ya makambo kitoko oyo mobali ná mwasi ya liboso bazalaki na yango liboso básala lisumu.

Elikya nini Yesu apesaki bato mosusu?

Na bokeseni na Yesu oyo akelamá mpo na kofanda na likoló, bato bakelamá mpo báfanda awa na mabelé. (Nzembo 115:16) Yango wana, Yesu alobaki boye: “Bino bozali bato ya bitúká ya nse; ngai nazali moto ya bitúká ya likoló.” (Yoane 8:23) Yesu alobelaki bomoi kitoko oyo bato bakozala na yango awa na mabelé. Mokolo moko alobaki boye: “Esengo na bato ya elimo ya boboto, mpo bakozwa libula ya mabelé.” (Matai 5:5) Azalaki kokanisa maloba ya nzembo oyo elobi: “Bato ya bopolo bakosangola mokili, bakosepela mpe na kimya ya solo. Bayengebene bakosangola mokili mpe bakofanda wana libela.”​—Nzembo 37:11, 29.

Na yango, kaka bato ya “etonga moke” te, oyo bakokende na likoló, nde bakozwa bomoi ya seko. Yesu alobelaki mpe elikya oyo epesami na bamilio ya bato na mokili mobimba. Alobaki boye: “Nzambe alingaki mokili mingi na boye ete apesaki Mwana na ye mobotami-se-moko, mpo moto nyonso oyo azali komonisa kondima na kati na ye abomama te kasi azala na bomoi ya seko.”​—Yoane 3:16.

Ndenge nini Nzambe akosilisa bampasi ya bato?

Yesu alobelaki kosikolama na makambo mibale oyo enyokolaka bato; alobaki boye: “Sikoyo kosambisama ya mokili oyo ezali kosalema; sikoyo moyangeli ya mokili oyo akobwakama libándá.” (Yoane 12:31) Ya liboso, bato mabe oyo banyokolaka baninga bakosambisama mpe bakobomama. Ya mibale, Satana akokangama mpe akobungisa lisusu bato nzela te.

Ezali boni mpo na bato oyo bakufá kozanga koyeba Nzambe mpe Yesu mpe komonisa kondima na bango? Yesu ayebisaki moyibi moko oyo azalaki pene na ye boye: “Okozala elongo na ngai na Paladiso.” (Luka 23:43) Moto yango, ná bamilio ya bato mosusu, bakozwa libaku ya koyeba Nzambe ntango Yesu akosekwisa bato na paladiso awa na mabelé. Na ntango yango, moto yango akozwa libaku ya kozala na kati ya bato ya komikitisa mpe ya sembo oyo bakozwa bomoi ya seko awa na mabelé.​—Misala 24:15.

Mpo na koyeba makambo mosusu, talá mokapo 3 mpe 7 ya buku Biblia eteyaka mpenza nini?a

[Maloba na nse ya lokasa]

[Elilingi na lokasa 23]

“Bayengebene bakosangola mokili mpe bakofanda wana libela.”​—Nzembo 37:29