Yesu, bomoi na ye mpe mosala na ye

Bamonisami polele na nzela na masese ya vinyo

KATI na temple, Yesu auti kobulunganisa makanisi ya bakonzi na mangomba, oyo balingaki koyeba soko na nguya nini azali kosala makambo na ye. Naino balongwe na mobulungano wana te, Yesu atuni bango: “Bokanisi nini mpo na makambo oyo?”. Mpe na nzela na lisese, amonisi motindo nini na bato bango bazalaki.

Yesu alobi: “Moto moko azalaki na bana mibale, ekei ye epai na oyo ya liboso, alobi ete: ‘Mwana, kende lelo kosala mosala na elanga na vinyo. Azongisaki monoko; alobi ete: ‘Nakei, nde akendaki te’. Eyei ye epai na oyo ya mibale, alobi bobele bongo. Ye azongi liloba; alobi ete: ‘Nalingi te, nde nsima abongoli motema mpe akei’. Nani kati na bango mibale asali mokano ya tata na ye?”

Banguna na ye bayanoli, “oyo na nsima”.

Bongo Yesu apesi bango ndimbola oyo: “Nazali koloba na bino solo ete, bakongoli na mpako mpe basi na pite, bakoingela na Bokonzi na Nzambe liboso na bino.” Ya solo, bakɔngɔli na mpako mpe basi na pite bazalaki koboya kosalela Nzambe liboso. Mpe nsima, lokola mwana ya mibale. babongolaki mitema mpe bakomaki kosalela ye. Na kokesena, bobele lokola mwana wana ya liboso, bakonzi ya mangomba bazalaki koloba ete bango bazali kosalela Nzambe; nzokande Yesu alobi: (Yoane Mobatisi) ayei epai na bino na nzela ya boyengebene nde bondimi ye te. Kasi bakongoli na mpako mpe basi na pite bandimi ye. Mpe wana emoni bino yango, bobongoli mitema te mpo na kondima ye.”

Na nsima, Yesu amonisi ete mabe ya bakonzi wana ya mangomba ezali bobele mpo ete bazali kosalela Nzambe te, kasi lisusu mpo bazali mpenza bato na lofundo. Yesu alandisi: “Nkolo na ndako akonaki elanga na vinyo, mpe azingeli yango na lopango, mpe atimoli ekamwelo na vinyo kati na yango mpe atongi ndako molai, mpe atiki yango epai na basali mpe akei na mokili mosusu. Ebelemi elaka na mbuma, atindi baombo na ye epai na basali ete bakamela mbuma na ye. Nde basali basimbi baombo na ye mpe babeti moko, mpe babomi mosusu, mpe babwakeli mosusu mabanga. Lisusu atindi baombo mosusu koleka baoyo na liboso na motuya, mpe basali bango motindo moko.”

“Baombo” nde basakoli oyo Jéhovah Nzambe, ye “Nkolo na ndako” atindaki epai na “basali” na ‘’vinyo”. Basali yango nde, bakonzi minene ya mboka Yisraele, “vinyo” na Nzambe ezalaki kati na Biblia.

Yesu alimboli ete: lokola “basali” banyokoli mpe babomi “baombo”, mokolo na vinyo asali lisusu eloko moko: “Nsima, atindi mwana na ye epai na bango, ye ete: ‘Bakotosa mwana na ngai’. Nde emoni basali mwana, balobani kati na bango ete, oyo azali mosangoli na libula. Yakani toboma ye mpe tozwa libula na ye. Bakangi ye, mpe babwaki ye libanda na elanga mpe babomi ye.”

Kolobaka sikawa epai na bakonzi ya mangomba Yesu atuni bango: “Bongo wana ekoya nkolo na elanga, akosala basali yango nini?”

Bayanoli: “Akoboma bango. Bongo akopesa elanga wana na basali mosusu. Bango nde bakopesa ye mbuma na ye na ntango ekoki.”

Na kozanga koyeba, bakonzi wana ya mangomba bamipeseli etumbo bango mpenza. lokola bango mpe kati na molongo na Bayisraele oyo bazalaki “basali” kati na libota na Yisraele, elanga ya “vinyo” na Jéhovah. Mbuma oyo Jehovah azali kozela epai na basali yango, ezali nde kondima epai na mwana na ye, Masiya ya solo. Lokola babotisaki mbuma yango te, Yesu akebisi bango na maloba oyo: “Botangi naino kati na makomi (na Nzembo 118:22, 23) te ete: ‘Libanga liboyaki balongi, esili kokóma motó na nsuka. Likambo oyo esalami na Jéhovah, mpe ezali eloko na kokamwa na miso na biso’? Bongo nazali koloba na bino ete: Bokonzi na Nzambe ekolongwa na bino mpe ekopesama na libota likobimisa mbuma na yango. Moto oyo akokwea likoló na libanga oyo akopasuka; mpe soki libanga oyo ekweli moto moko, ekonika ye.”

Banganga minene mpe bakomeli basosoli sikawa ete Yesu azali koloba mpo na bango, mpe balingi koboma ye, mosangoli na libula oyo akoki. Yango libota na Yisraele likobongisama kozwa libaku malamu ya koyangela na Bokonzi na Nzambe, nde libota mosusu ya basali na vinyo’ likosalema; yango likobota mbuma.

Lokola bakonzi wana ya mangomba bazalaki kobanga bato, baoyo bandimi Yesu lokola mosakoli, bamekaki koboma ye na ntango wana te.Matai 21:28-46; Malako 12:1-12; Luka 20:9-19; Yisaya 5:1-7.

◆ Bana wana mibale na lisese ya liboso ya Yesu. bazali komonisa banani?

◆ Na lisese ya mibale “mokolo na ndako” “vinyo”. “basali”, “baombo”, mpe ‘mosangoli na libula” bazali banani?

◆ Nini ekokómela basali na elanga na vinyo, nani akokitana bango?