Yesu,bomoi na ye mpe mosala na ye

Lisese ya elambo ya libala

Na masese mibale, Yesu amonisaki polele bakomeli mpe banganga minene, mpe balingi ete baboma ye. Kasi Yesu asilisaki naino koloba na ntina na bango te. Apesi bango lisese mosusu. Tala yango oyo:

“Bokonzi ya likolo ezali lokola mokonzi oyo abongisaki elambo ya libala mpo na mwana na ye. Atindaki baombo na ye ete babenga baoyo babyangamaki na elambo ya libala nde balingaki koya te.”

Jéhovah Nzambe ye nde Mokonzi oyo azali kobongisa elambo ya libala mpo na Mwana na ye, Yesu Klisto. Na yango, mwasi na Klisto, oyo asalami na bayekoli 144 000 bapakolami, akosangana na ye elongo na likoló. Bato ya Mokonzi nde Bayisraele baoyo bazwaki likoki ya kokoma ’’bokonzi ya banganga”, na ntango bakɔtaki na kondimana na Mobeko na mobu 1513 liboso ya ntango na biso. Ezali bongo na ntango wana nde libyangami mpo na elambo ya libala epesamaki epai na bango.

Kasi, kobenga ya liboso oyo esalamaki na baoyo babyangamaki na elambo ya libala eyokanaki te libiso ya automne (ntango ya bambula) oyo ya mobu 29 ya ntango na biso, na ntango oyo Yesu mpe bayekoli na ye (baombo ya mokonzi) babandaki mosala na bango ya kosakola Bokonzi. Kasi. Bayisraele ya mosuni baoyo babyangamaki na baombo na mobu 29 ya ntango na biso kino mobu 33, balingaki na bango koya te. Na yango Nzambe apesaki likoki mosusu na libota oyo na babyangami na elambo ya libala, Yango nde Yesu alimboli na maloba oyo:

“Lisusu atindaki baombo mosusu ete. Loba na baoyo babyangami ete, Tala bilei na ngai bisili kokoka, nabomi, ngombe na ngai mpe bana na ngombe ya mafuta, nyonso ebongi; boya na elambo ya libala.’’ Libyangami oyo na mibale mpe ya nsuka, lisalemaki na Pantekote ya mobu 33 na ntango elimo santu esopamaki likoló na bayekoli na Yesu, mpe kino mobu 36 ya ntango na biso,

Nzokande, na ntango wana lisusu, mingi na Bayisraele baboyaki libyangami yango. Yesu alimboli: “Kasi batyoli liloba yango mpe bakei moko na elanga na ye mpenza, mosusu na mombongo na ye. Bamosusu basimbi baombo na ye, basaleli bango nsoni mpe babomi bango.” Abakisi: “Mokonzi ayoki nkanda mingi mpe atindi basoda na ye mpe babebisi babomi yango mpe bazikisi mboka na bango.” Yango nde esalamaki na mobu 70 ya ntango na biso, ntango Yelusaleme ebebisamaki na Baloma mpe ete babomi oyo na lisese babomamaki.

Yesu alimboli oyo elekaki liboso ete bato yango babomama: “Alobi na baombo na ye ete, Elambo ya libala ekoki nde baoyo babyangami babongi te. Bokenda na kokabwana na nzela mpe bobyanga banani bakozwa bino kati na elambo ya libala.” Baombo basalaki bongo, mpe “ndako na elambo ya libala etondaki na bato oyo bafandaki na mesa”.

Mokumba oyo ya koyanganisa bato na banzela, na libanda ya engumba, ebandaki na mobu 36 ya ntango na biso. corneille, kapitene na liboke moko na basoda ya Roma mpe libota na ye, bazalaki bapakano ya liboso baoyo bakatami nganga te bayanganisamaki. Koyanganisama wana ya bapakano, baoyo nyonso bazwaki esika na babyangami oyo baboyaki, elandanaki kino na ekeke na ntuku mibale.

Ezali na boumeli ya ekeke ya ntuku mibale nde ndako ya elambo ya libala etondaki na bato. Lisusu Yesu ayebisi oyo ekosalama na nsima: “Ebimi mokonzi kotala babyangami, amoni moto oyo alataki elamba ya libala te. Alobi ete: ‘Moninga oingeli awa na nzela nini na kozanga elamba ya libala?’ Ayebi kozongisa liloba te. Bongo mokonzi alobi na basali na ye: ‘Bokanga ye makolo, mpe maboko, bobwaka ye na molili ya libanda; wana bileli mpe kokatakata mino ekozala.”’

Moto oyo azangi elamba ya libala emonisi baklisto ya lokuta ya boklisto ya mokili oyo, eyebani te na Nzambe lokola Bayisraele ya elimo. Ata na lolenge moko te Nzambe apakoli bango na elimo santu na ye mpo ete bakoma basangoli na Bokonzi. Basili bongo kobwakama libanda kati na molili epai kuna bakobebisama.

Yesu asukisi lisese na ye boye: “Mpamba te mingi babyangami, nde motuya moke baponami.” Ee, mingi na Bayisraele ya mosuni babyangamaki mpo na kokoma basangani ya mwasi na Klisto, kasi bobele moke kati na bango nde baponamaki. Mingi na ba 144 000 baoyo babyangami na elembo, baoyo bakozwa mbano na bango na likoló, bauti nde na bapakano. Matai 22:1-14; Exode 19:1-6; Emoniseli 14:1-3.

◆ Banani bazalaki bato ya liboso kobyangama na elambo ya libala, mpe ntango nini bazwaki libyangami na bango?

◆ Ntango nini libengi na babyangami na elambo ya libala eyokanaki mpo na mbala ya yambo, mpe banani bazwamaki lokola baombo mpo na kosala yango?

◆ Ntango nini libyangami ya mibale epesamaki, mpe nsima na yango, nani abyangamaki?

◆ Moto oyo azangi elamba ya libala azali komonisa nani?

◆ Banani babyangami mingi, mpe banani baponami na motuya moke?