Ozali komikundola?

Otalelaki na likebi nyonso banimero ya Linɔ́ngi ya Mosɛnzɛli oyo eutaki kobima? Okoki kosepela komikundola makambo malandi:

◻ Engebene Matai 11:28, lolenge nini moto akoki ‘koya epai na Yesu’?

Yesu alobaki ete: “Soko nani alingi koya nsima na ngai, tiká ete amiboya ye moko mpe atombola [nzeté na ye ya mpasi, NW] mpe abila ngai.” (Matai 16:24) Na yango, koya epai na Yesu elimboli kotya mokano na yo moko na nsima ya mokano ya Nzambe mpe ya Klisto, kondima mokumba ya boklisto, kosala bongo kozanga kotika.​—15/8, lokasa 17.

◻ Mpo na nini bobele “bato moke” nde bazali komona ‘nzela ya moke’ oyo Yesu alobelaki kati na Matai 7:13, 14?

Nzela ya moke eyeisami nkaká mpo na mibeko mpe malako ya Nzambe. Na yango, esengeli kobenda bobele ye oyo azali mpenza na mposa ya sembo ya koyokanisa bomoi na ye na mibeko ya Nzambe. Atako ‘nzela ya moke’ emonani lokola ete etondi na bipekiseli, ezali nde kopesa moto bonsomi na makambo nyonso ya ntina mingi. Bandelo na yango etyami na lisalisi ya “mobeko mobongi, mobeko ya bonsomi.” (Yakobo 1:25)​—1/9, lokasa 5.

◻ Lolenge nini tokoki kolóna bososoli?

Bososoli eyaka bobele mpamba te to yango moko te. Kasi na lisalisi ya ezaleli ya motema pɛtɛɛ, na libondeli, na milende makasi, na boninga malamu, na boyekoli Biblia mpe bomanyoli likoló na yango, tokoki kolóna bososoli.​—1/9, lokasa 21.

◻ Lolenge nini zúwa ya moto ekoki kopusa ye na kosala malamu?

Ekoki kopusa moto ete abatela molingami na ye na makambo ya mabe. Lisusu, bato bakoki komonisa zúwa ya malamu mpo na Yehova mpe mpo na losambo na ye. (1 Mikonzi 19:10)​—15/9, nkasa 8, 9.

◻ Liloba oyo ezwami kati na Genese 50:23 oyo elobi na ntina na bankɔ́kɔ ya Yosefe ete: “Babotamaki na mabɔlɔngɔ na Yosefe” elimboli nini?

Yango ekokaki bobele kolimbola ete Yosefe andimaki bana yango lokola bakitani na ye. Ekoki lisusu komonisa ete azalaki kosakana elongo na bana yango na bolingo nyonso, komemáká bango na mabɔlɔngɔ na ye. Lelo mpe ekozala malamu ete batata bámonisa epai na bana na bango bolingo motindo wana.​—15/9, lokasa 20, 21.

◻ Mpo na kosala libala mpe libota ya esengo, likambo nini ezali na ntina mingi?

Mpo na kozwa matomba kitoko wana, babalani basengeli ntango nyonso kotya Nzambe na esika ya liboso. Na kosaláká bongo, babalani bamekaka kokangama ntango nyonso elongo mpe basilisaka mikakatano na bango na kosaleláká batoli oyo ezwami na Liloba ya Nzambe. Na yango, bapɛngolaka lolenge nyonso ya mpasi na motema oyo eyaka mpo na kozanga kotalela mokano na ye. (Nzembo 19:7-11)​—1/10, lokasa 11.

◻ Mpo na nini elimo ya etingya kati na bobángi Nzambe ezali na ntina mingi lelo?

Elimo ya etingya kati na bobángi Nzambe ezali mpenza kati na mosala oyo tosalaka na molimo na biso mobimba mpo na Yehova. Epɛngolaka mpe esalisaka basaleli ya Nzambe ete bátɛmɛla masenginya ya Zábolo oyo epusaka bango na ‘kolɛmba mpe kokwea kati na milimo na bango.’ (Baebele 12:3) Ebatelaka bango na ezaleli ezangi litomba, ya komikɔtisa na mokili mpe elimo na yango ya komipesa mingi na biloko ya mosuni, ebatelaka elimo na bango kati na makambo ya likoló​—“bomoi ya solo.” (1 Timoté 6:19)​—1/10, lokasa 28.

◻ Kati na lisese ya bampate mpe bantaba, ntango nini Yesu akofanda na kiti na ye ya bokonzi mpe mpo na nini? (Matai 25:31-33)

Lisese yango emonisi ye te ete afandi na ndimbola oyo ete akomi Mokonzi. Kasi afandi nde lokola Mosambisi. Kosambisa yango ekosalema te na boumeli ya eleko molai ya bambula mingi. Nzokande, lisese yango ezali kolobela mikolo mizali koya na ntango Yesu, na boumeli ya ntango moko ya mokuse, akokweisa etumbu likoló na mabota.​—15/10 nkasa 22, 23.

◻ “Libota” oyo Yesu azalaki kolobela mbala na mbala ezalaki nini?

Yesu asalelaki liloba “libota oyo” mpo na kolobela ebele ya bato oyo bazalaki na eleko na ye, mpe “bakambi bakufi miso” na bango oyo basalaki libota ya Bayuda. (Matai 11:16; 15:14; 24:34)​—1/11, lokasa 14.

◻ Kati na kokokisama ya nsuka ya esakweli ya Yesu oyo ezwami na Matai 24:34-39, liloba “libota oyo” ekotalela banani?

Emonani ete Yesu alobeli bato oyo bazali na mabelé mpe bazali komona elembo ya kozala ya Klisto kasi bazali kosembola bizaleli na bango te.​—1/11, nkasa 19, 31.

◻ Lolenge nini ebongiseli ya mboka na kobombama mpe bipekiseli na yango epesaki matomba epai na bato kati na Yisalaele ya kala?

Ekɔtisaki kati na Bayisalaele likanisi oyo basengelaki kopɛngola ezaleli ya bopɔtu to ya kotalela bomoi lokola eloko mpamba. Emonisaki mpe ntina ya komonisa motema mawa wana basengelaki kosala bongo. (Yakobo 2:13)​—15/11, lokasa 14.

◻ Mboka na kobombama ya solo ezali nini?

Ezali bongo ebongiseli oyo Nzambe asali mpo na kobatela biso na liwa mpo ete tobukaki mobeko na ye na ntina etali ezalela ya bulɛɛ ya makila. (Genese 9:6)​—15/11, lokasa 17.

◻ Lolenge nini bondeko ya boklisto ekoki kosunga biso ete “tózwa nguya ya sika”? (Yisaya 40:31)

Kati na bandeko na biso mibali mpe basi baklisto, ekoki kozala na baoyo bazali kokutana na mikakatano mpe komekama motindo wana mpe ekoki kozala ete bazali kotungisama na mayoki motindo moko na oyo ya yo. (1 Petelo 5:9) Ezali likambo ya kopesa elikya mpe ya kolendisa kondima na koyeba ete mikakatano oyo tozali kokutana na yango ezali kokómela mpe bato mingi mpe lisusu mayoki na biso ezali bobele epai na biso moko te.​—1/12, nkasa 15, 16.