Yesu, bomoi na ye mpe mosala na ye

Baseka na mayele mpe baseka bilema

YESU ayanoli na motuna ya bantoma na ye oyo batunaki ye elembo ya kozonga na ye kati na nguya ya Bokonzi. Sikawa, azali kolimbola bango makambo mosusu ya elembo yango na nzela na masese to bililingi misato.

Baoyo bakozala na bomoi na ntango ya kozonga na ye bakomona kokokisama ya moko moko na masese wana. Abandaki oyo ya liboso na maloba oyo ete: “Bongo bokonzi na likoló ezali lokola baseka zomi baoyo bakamataki miinda na bango mpe bakendaki kozwana na mobali na libala. Mitano na bango bazalaki bilema mpe mitano na mayele.”

Na liloba “bokonzi na likoló ezali lokola baseka zomi”, Yesu alingi koloba te ete ndambo na bato oyo bakozwa libula ya Bokonzi na likoló bazali bilema mpe ete ndambo mosusu bazali mayele! Te, alingi koloba ete na likambo etali Bokonzi ya likoló, ezali na mitindo mibale na bato, to mpe makambo oyo matali Bokonzi makomonana na ndenge mibale ekeseni.

Baseka zomi bazali komonisa baklisto nyonso oyo bazali komiloba ete bazali kati na Bokonzi ya likoló. Ezali na Pantekote ya mobu 33 ya ntango na biso nde lisangá na boklisto elakamaki na libala elongo na Mobali na libala akembisami, Yesu Klisto oyo asili kosekwa. Kasi libala esengelaki kosalema na likoló nsima na bikeke mingi, na eleko moko oyo eyebisamaki sikisiki te.

Kati na lisese, baseka zomi babimi mpo na koyamba mobali na libala mpe kosangana na molongo ya bato bayei na libala. Ntango akokóma, bakongengisa nzela na miinda na bango, kopésáká bongo lokumu epai na mobali na libala, wana ekomema ye mwasi na ye kati na ndako ebongisami mpo na ye. Nzokande, Yesu alimboli ete: ’’‘Bilema bakamataki miinda na bango nde bakamati mafuta na bango elongo te. Nde bango na mayele bakamati mafuta kati na milangi esika moko na miinda na bango. Eumeli mobali na libala, bango nyonso bayoki mpongi mpe balali.”

Koumela mingi ya mobali na libala emonisi ete kozonga na Klisto lokola Mokonzi oyo azali koyangela ekozala mosika mpenza. Na yango, Yesu azwaki kiti ya bokonzi na 1914. Na boumeli ya bulu molai oyo ezalaki liboso na likambo yango, baseka nyonso balalaki. Kasi ezali mpo na yango te nde bakweisami. Baseka bilema bakweisami mpo ete bazalaki na mafuta te kati na milangi na bango. Yesu alimboli ndenge nini baseka balamusamaki na mpongi liboso na kozonga ya mobali na libala.

“Kati na butu, mongongo eyokani ete: ‘Tala mobali na libala! Bobima mpo na kozwana na ye.’ Bongo, baseka yango nyonso balongwi na mpongi mpe babongisi miinda na bango. Baoyo bilema balobi na baoyo na mayele ete: ‘Pesa biso ndambo na mafuta na bino, mpamba te miinda na biso mizali kozimana’. Nde bango na mayele bazongisi liloba ete: ‘Te, soko ete ekokoka mpo na biso mpe mpo na bino te. Bokenda epai na batekisi mpe bosomba mpo na bino mpenza.”’

Mafuta ezali eloko oyo ezali kopesa nzela epai na baklisto ya solo na kongenga lokola miinda, elingi koloba Liloba na Nzambe, liloba oyo bazali kosimba, kasi mpe elimo santu, oyo ezali kosalisa bango na kokanga ntina ya Liloba yango. Mafuta ya elimo ezali kopesa nzela na baseka yango ya mayele na kopalanganisa kongenga mpo na koyamba mobali na libala kati na nzela oyo bato batandami kino na elambo ya libala. Kasi kelasi ya baseka bilema, bango bazali na mafuta ya elimo te kati na milangi na bango. Na nsima, Yesu ayebisaki likambo oyo esengelaki kobima:

“Ekei bango (baseka bilema) kosomba (mafuta), mobali na libala ayei mpe baseka oyo bamilengelaki baingeli esika moko na ye kino libala mpe ekuke ekangami. Na nsima, baseka mosusu bayei mpe balobi ete: ‘Nkolo, nkolo, fungwela biso!’ Nde ye azongisi monoko ete: Nayebi bino te.’“ Nsima na kozonga ya Klisto kati na Bokonzi na ye ya likoló. baklisto ya solo bapakolami, kelasi na baseka ya mayele, bandimaki libaku kitoko oyo bazalaki na yango ya kopalanganisa kongenga kati na mokili oyo ya molili, mpo na kokumisa Mobali na libala na bozongi na ye. Kasi baklisto oyo bamonisamaki na baseka bilema bazalaki pene te mpo na koyamba ye na masanzoli. Yango wana, ntango ngonga ekokaki, Klisto aboyaki kofungolela bango ekuke ya elambo ya libala kati na likoló. Atiki bango na libanda, kati na molili makasi ya mokili oyo, mpo ete bakufa elongo na bato mosusu oyo bazali kotiola mibeko. Yesu asukisi na maloba oyo: “Bongo bokengelaka mpo ete boyebi mokolo soko ntango te.”Matai 25:1-13.

◆ Baseka zomi bazali elilingi ya banani?

◆ Ntango nini elaka ya libala elongo na mobali na libala epesamaki kasi ayaki ntango nini mpo na komema mwasi na ye na elambo ya libala?

◆ Mafuta elakisi nini, mpe baseka na mayele oyo bazali na yango bakoki kosala nini?

◆ Elambo na libala ekosalema wapi?

◆ Mbano nini kitoko baseka bilema bazwi yango te, mpe esukeli bango boni?