Yesu bomoi na ye mpe mosala na ye

Lisese na talanta

Likolo na ngomba ya Olive, Yesu alandi kosolola elongo na bayekoli na ye na kosalelaka lisese mosusu, ya mibale kati na masese misato oyo malandani. Mwa mikolo liboso, na mboka Yeriko, alobelaki lisese ya palata mpo na komonisa ete Bokonzi na Nzambe ekoya noki te. Na komonisáká bokokani mingi, lisese oyo apesi sikawa esakoli makambo oyo makosalema na ntango na kozonga na ye, ntango akozwa bokonzi. Ezali komonisa polele ete, ntango nyonso oyo bakozala na mabelé, bayekoli na ye basengeli kosala mpo na kokolisa “bozwi na ye”.

Yesu abandi lisese yango boye: “Ezali (elingi koloba makambo mazali na boyokani na Bokonzi) lokola moto oyo alingaki kotambola mobembo, abiangi baombo na ye mpe apesi bango biloko na ye.” Moto yango ezali Yesu oyo, liboso na kosala mobembo, na likoló, apesi biloko to bozwi na ye epai na baombo na ye bayekoli baoyo emonani ete bazali basangani na Bokonzi ya likoló. Biloko yango ezali ya mosuni te, kasi emonisi elanga kati na yango Yesu akonaki mpo na kobota bayekoli mingi.

Yesu apesi biloko to bozwi na ye epai na baombo na ye liboso mwa moke ete azonga na likoló. Na lolenge nini? Apesi bango etinda ya kolanda kosala kati na elanga yango na kosakoláká nsango na Bokonzi kino nsuka na mokili. Lokola alobi yango: “Na moko apesi talanta mitano, na mosusu mibale mpe na mosusu moko, epai na moto na moto engebene makoki na ye mpe akei mobembo.”

Talanta mwambe bozwi to biloko na Klisto ekabolami bongo engebene nguya to makoki na elimo, na baombo, baoyo bamonisi kelasi ndenge na ndenge na bayekoli. Emonani ete na ekeke ya liboso, kelasi oyo ezwaki talanta mitano ezalaki bantoma Yesu alobi lisusu ete baombo oyo bazwaki talanta mitano mpe talanta mibale, babotisi moko na moko mbala mibale na oyo bazwaki na kosakoláká Bokonzi mpe na kozalisáká bayekoli. Nzokande, moombo oyo azwaki talanta moko atimolaki libulu mpe abombaki yango kati na mabelé.

Abakisi ete: “Nsima na ntango molai, nkolo na baombo yango azongi mpe abongisi makambo na bango elongo.” Ezalaki na ekeke ya ntuku mibale, elingi koloba mibu soko 1 900, nde Klisto azongaki mpo na kobongisa makambo elongo na bango, ee. “nsima na ntango molai”. Yesu alimboli lisusu ete:

“Ye oyo azwaki talanta mitano ayei liboso wana ememi ye talanta mosusu mitano, alobi ete: ’Nkolo, opesaki ngai talanta mitano, tala nazwi talanta mosusu mitano.’ Nkolo na ye alobi na ye ete: ‘Malamu, moombo malamu mpe na sembo! Ozalaki sembo na makambo mike, nakotia yo likoló na mingi. lngela na esengo ya nkolo na yo.’ ” Bobele bongo, moombo oyo azwaki talanta mibale asalelaki yango mpe azwaki talanta mosusu mibale, mpe azwaki lokumu ndenge moko mpe mbano ndenge moko.

Kasi ndenge nini baombo yango na sembo, baingelaki kati na esengo ya Nkolo na bango? Esengo ya Nkolo, Yesu Klisto, ezalaki ya kozwa libula na Bokonzi ntango akendaki “mobembo” na likolo. epai na Tata na ye. Mpo na baombo na sembo ya ntango na biso, bazali koyoka esengo monene lokola bapesameli mikumba mingi oyo ezali na boyokani na Bokonzi, mpe ntango basilisi mosala na bango na mabelé bazali na esengo monene ya kosekwa mpo na kokota kati na Bokonzi ya likoló. Kasi tokoloba boni mpo na moombo ya misato?

Na koimaima alobi ete: ’’Nkolo, nayebaki ete yo ozali moto na makasi. Nabangaki, nakei mpe nabombi talanta na yo kati na mabelé. Tala, ozali na eloko na yo.” Moombo yango aboyaki mpenza kosala na nko, mpe kosakola kozalisa bayekoli, kati na elanga. Ezali mpo na ntina yango nkolo abiangi ye “moombo mabe mpe na goigoi’’, mpe azweli ye ekateli: “Boye, bobotola ye talanta yango . . . Bobwaka mpe moombo na mpamba kino molili na libanda; wana bileli bizali mpe kokatakata na mino.” Wana babwakamaki na libanda, basangani na kelasi ya moombo yango mabe bazali na esengo moko te na elimo.

Likambo yango ezali liteya makasi mpo na baoyo nyonso bazali komiloba ete bazali kolanda Klisto. Soki balingi kozwa lokumu, mpe kozwa mbano mpe babwakama na molili na libanda te to kobebisama libela te, basengeli kosala mpo na kokolisa biloko to bozwi ya Nkolo na bango oyo azali na likoló, na kosanganáká mpenza na mosala ya kosakola. Ozali kosalela makoki na yo na molende nyonso mpo na kosala bongo? Matai 25:14-30.

◆ Lisese oyo mosusu ezali koteya biso nini?

◆ Baombo bazali banani, mpe biloko to bozwi nini bapesi bango?

◆ Ntango nini nkolo azongi mpo na kotanga mosolo, mpe likambo nini akuti?

◆ Ndenge nini moombo na sembo aingeli na esengo, mpe nini ekómeli moombo mabe?