Yesu bomoi na ye mpe mosala na ye

Awangani Yesu na lopango ya nganga monene

NSIMA wana batiki Yesu na elanga Getesemane mpe bakimi elongo na bantoma mosusu, Petelo mpe Yoane batelemi. Mbala mosusu bakómi wana ntango bakotisi Yesu epai na Anne. Ntango atindi Yesu epai na nganga monene Kaife. Petelo mpe Yoane bazali kolanda na mosika, emonani ete bazali na mposa ya komona nini ekokomela Nkolo na bango, nde bazali kobanga kotya bomoi na bango na likámá.

Wana bakómi na lopango monene ya Kaife, Yoane alongi na kokóta na libanda, mpo ete ayebani na nganga monene. Petelo, ye, atikali na porte. Kasi, mosika te Yoane azongi mpe alobi na mwasi mokengeli na ekuke ete akotisa Petelo.

Lokola mpio ezali mingi sikawa, baombo mpe basali ya nganga monene bapelisi móto na nkóni. Petelo asangani elongo na bango mpo na koyotola móto kozeláká nsuka na kosambisama na Yesu. Wana, na mwa polele ya móto, mosaleli mwasi oyo akotisaki Petelo amoni ye malamu mpenza. Mpe angangi ete: “Yo mpe ozalaki na Yesu na Galilai!”

Na kobanga ete noki bakoyeba ye, Petelo awangani liboso na bato nyonso ete ayebi Yesu ata soko moke te. Alobi ete: “Nayebi ye te mpe nayebi te soki olingi koloba nini.”

Mpe Petelo akei kotelema pene na ekuke. Wana, mosali mwasi mosusu amoni ye mpe alobi lisusu na bato bazalaki na esika yango ete: “Oyo azalaki elongo na Yesu na Nazareta.” Petelo awangani lisusu, na kosimbáká ndai ete: “Nayebi moto yango te.”

Petelo atikali na libanda kolukáká na lolenge nyonso ete bayeba ye te. Mbala mosusu akamwaki na ntango oyo ya sikisiki, wana nsoso eleli na mwa kotana ya ntongo. Na ntango wana, amonani lokola ete kosambisama na Yesu ezali kosalama, na eteni moko ya ndako, oyo ezalaki likoló ya libándá. Petelo elongo na bato mosusu baoyo bazali kozela, bazali komona lolenge batatoli mingi babengamaki bazali kokende mpe kozonga mpo na kotatola.

Pene na ngonga moko esili koleka uta bayebi Petelo lokola moko na baninga na Yesu. Sikawa, bato oyo bazali wana babelemi na Petelo mpe balobi na ye ete: “Solo, yo ozali moko na bango mpo na lokótá na yo ezali kososolisa yo “Moko na bango oyo azali ndeko ya Malukusu, moto oyo Petelo akataki litoi atuni ye ete: “Namonaki yo te kati na elanga elongo na ye?

Mpe Petelo alobi na nguya nyonso ete, “Nayebi moto yango te!” Na solo, azali komeka kondimisa bango nyonso ete bazali komikosa, na kosimbáka’ ndai mpe na komilakela mabe, elingi koloba kobenga mabe likoló na ye moko soki nde alobi solo te.

Wana Petelo awangani Yesu mpo na mbala ya misato, nsoso eleli. Bobele na ntango wana, emonani ete Yesu apusani mwa liboso na eteni na ndako bipai ya libandá, ebongwani mpe atali Petelo. Nokinoki, ye mpe amikundoli likambo oyo ayebisaki ye mwa bangonga liboso kati na chambre ya likoló, ete: “Liboso naino nsoso eleli mbala mibale te, okowangana mbala misato,” Koyokáká mpasi mpo na lisumu na ye wana, Petelo abimi mpe aleli mingi mpenza.

Ndenge nini yango ekomaki? Ndenge nini, nsima na komimonisa na makasi na elimo, Petelo awanganaki lisusu Nkolo na ye mbala misato na mwa ntango moke? Makambo wana masukisaki mikano ya Petelo. Solo ebongwani mpe Yesu emonisami lokola moto na mabe mpenza. Basali nyonso ete oyo ezali sembo emonana mabe mpe oyo ayebi likambo te, akweisama. Yango wana, Petelo abungisi bokatikati na ye likoló na ezalela ya makambo wana. Na mbala moko, bosembo na ye ebebaki. Mpo na mawa na ye, Petelo amitikaki na kobanga bato. Tika ete likambo oyo ekomela biso soko moke te. Matai 26:57, 58, 69-75; Malako 14:30, 53, 54, 66-72; Luka 22:54-62; Yoane 18:15-18, 25-27.

▪ Ndenge nini Petelo mpe Yoane balongi na kokota kati na libanda ya lopango ya nganga monene?

▪ Wana Petelo mpe Yoane bazali na libandá, nini ezali kosalema kati na ndako?

▪ Nsoso eleli mbala boni, mpe Petelo awangani Klisto mbala boni?

▪ Likambo oyo Petelo asimbi ndai mpe amilakeli mabe elimboli nini?

▪ Mpo na ntina nini Petelo awangani Yesu?