Yesu bomoi na ye, mpe mosala na ye

Liboso na Sanedrina, mpe liboso na Pilato

NTONGO etani. Petelo asili kowangana Yesu mpo na mbala ya misato, mpe basangani ya Sanedrina basilisaki kosambisa na bango ya bokosi mpe bapanzanaki. Kasi. bazongi lisusu Vendredi na ntongo, na kobima na moi, mbala oyo bakei na salle ya Sanedrina. Emonani lokola ete bazali na mposa ya kondimisa kosambisa na bokosi oyo esalemaki na butu. Ntango Yesu amemamaki liboso na bango, batuni ye, lokola esalaki bango na butu eleki, ete: “Loba na biso soko yo Klisto.”

Yesu ayanoli ete, “Soko nakoloba na bino, bokondima te, mpe soko nakotuna bino, bokozongisa eyano te.” Kasi, Yesu azali na mpiko mpo na koloba na bango soko azali nani, kolobáká ete: “Mwana na moto akofanda na loboko na mobali na nguya na Nzambe.”

Batuni ye ete, “Na bongo ozali Mwana na Nzambe?” Bango nyonso balingi koyeba yango. Yesu alobi na bango ete, “lokola elobi bino.”

Mpo na bato wana oyo bazali na mposa ya koboma ye, eyano oyo ekoki. Mpo na bango, eyano wana ezali kotuka. Mpe balobi ete, “Tokoluka lisusu litatoli nini? Biso mpenza toyoki na monoko na ye.” Bongo, bakangi Yesu na nsinga, bamemi ye epai na Guvernere Pilato.

Yuda, ye oyo atekaki Yesu, alandaki kosambisa wana. Ntango amoni ete Yesu akweisami. amitungisi mpenza. Akei bongo kozongisa misolo na palata ntuku misato epai na banganga minene mpe mikólo, kolobaka ete: “Nasali lisumu mpo na kokaba makila mazali na likambo te.”

Balobi na ye kozanga mawa ete. “Yango ezali nini epai na biso? Yo moko tala yango.” Bongo Yuda abwaki misolo na palata kati na temple mpe akei komikakisa na nzete. Kasi, emonani lokola ete etape ya nzete oyo na yango Yuda akangisi nsinga ebukani mpe akwei motó liboso na libanga monene, epai kuna apanzani.

Banganga minene bayebi te nini basengeli kosala na misolo na palata wana. Balobani ete, “Ekoki te ete tobwaka oyo na sanduku-na-makabo, mpamba te ezali mosolo ya makila.” Yango wana, nsima na koyokana na likambo yango, basómbáki elanga na moyemi na mbeki mpo na kokunda bapaya. Ezali mpo na ntina oyo nde elanga yango ebengami, “Elanga ya makila.”

Ezali naino ntongo wana bamemi Yesu na ndako na Guvernere. Bayuda oyo bazali komema ye, baboyi kokóta na lopango, mpamba te bakanisi ete kozala esika moko na Bapakano ekoyeisa bango mbindo. Mpo na kosepelisa bango, Pilato akendeli bango. Mpe atuni bango ete, “Bofundi moto oyo na likambo nini?”

Bayuda balobi na ye ete, “Soko moto oyo azalaki mosali na makambo mabe te, mbele tokabi ye epai na yo te.”

Lokola aboyi komikotisa na likambo yango, Pilato alobi na bango ete, “Bokamata ye bino mpenza, mpe bosambisa ye na Mibeko na bino.”

Komonisáká mposa na bango ya koboma, Bayuda bazongisi ete, “Ebongi na biso koboma moto te.” Ya solo, soki babomi Yesu mokolo na Pasiká, yikiyiki ekozala mpenza kati na bato, mpamba te mingi bandimi Yesu. Kasi soki balóngi kosenga na Baloma ete baboma ye na ntina na makambo na politike, bango bakomema mokumba moko te liboso na bato.

Yango wana bakonzi ya mangomba batiki kosambisa oyo basalaki liboso, oyo na yango basilaki kokweisa Yesu likoló na kotuka, mpe basaleli bifundeli mosusu. Bafundi Yesu na makambo misato, ete: “Tozwi moto oyo wana ezalaki ye [1] kopengwisa bato ya libota, [2] ete bafuta mpako na Kaisala te mpe [3] kolobáká ete ye mpenza azali Klisto, mokonzi.”

Efundeli oyo ete Yesu amilobi mokonzi ebendi likebi ya Pilato. Akoti lisusu na ndako, abengi Yesu mpe atuni ye ete: “Yo mokonzi na Bayuda?” Na elobeli mosusu, obuki nde mibeko na kolobáká ete yo ozali mokonzi na esika na Kaisala?

Yesu alingi koyeba makambo nini Pilato ayebi na ntina na ye, boye atuni ye ete: “Yo ozali koloba boye mpo na yo moko soko mpo na bamosusu balobi na yo na ntina na ngai?”

Pilato alobi ete, ayebi eloko moko te mpe alingi koyeba solo. Azongisi ye monoko ete: “Ngai nazali nde Moyuda? Libota na yo mpe banganga minene bakabi yo epai na ngai. Osali nini?”

Yesu aluki te kopengola eyano na ntina na bokonzi. Mpe oyo ayanoli sikawa ekamwisi mpenza Pilato. Luka 22:66 kino 23:3; Matai 27:1-11; Malako 15:1; Yoane 18:28-35; Misala 1:16-20.

◆ Na likanisi nini Sanedrina eyangani lisusu na ntongo?

◆ Yuda akufi lolenge nini, mpe misolo na palata ntuku misato misalelami na nini?

◆ Mpo na nini Bayuda balingi koboma Yesu epai na Baloma, na esika ete baboma ye bango moko, lokola bazalaki komeka kosala yango na mabaku mosusu?

◆ Bayuda bafundi Yesu mpo na makambo nini?

Liboso na Sanedrina, mpe liboso na Pilato