Toli ya bwanya mpo na liso

● Liso ya moto ezali enama moko ya kitoko mingi, mpe ezali na nguya. Buku moko (Visual Impact, Visual Teaching) elobi ete “na misisa nyonso ya nzoto oyo ekendeke tii na bɔɔngɔ, mingi na yango (40%) eutaka na miso.”

Yango wana Yesu Kristo alobaki ete liso ezali “mwinda ya nzoto.” Na nsima, alimbolaki yango boye: “Soki liso na yo ezali alima [sembo, etalaka kaka makambo ya malamu], nzoto na yo mobimba ekongɛnga; kasi soki liso na yo ezali mabe, nzoto na yo mobimba ekozala molili.” (Matai 6:22, 23) Yesu asalelaki maloba wana ya elilingi mpo na komonisa ete makambo oyo moto atalaka etindaka ye akanisa, ayoka, mpe asala boye to boye. Makanisi ya Nzambe engɛngisaka bomoi ya moto; kasi makanisi ya mabe ekómisaka yango molili.

Na ndakisa, tótalela maloba ya Yesu oyo ezali na Matai 5:28, 29, oyo elobi ete: “Moto nyonso oyo azali kokoba kotala mwasi tii ayoki ye mposa asali na ye ekobo na motema. Nzokande, soki liso na yo ya mobali ezali kobɛtisa yo libaku, pikolá yango [na maloba ya elilingi].” Alingaki koloba nini? Liso ya bilulelá ekoki kolamwisa bamposa ya mabe, mpe soki kaka libaku emonani, moto akoki kosala pite to ekobo mpe Nzambe akondima ye lisusu te.​—Yakobo 1:14, 15.

Yango wana eleki malamu komipekisa, ata soki ekoki kosala mpasi lokola komipikola liso! Ezali na ntina te obungisa bomoi ya seko kaka mpo na bisengo ya ntango mokuse.

Makambo oyo totalaka ekoki kotinda biso na lokoso. Na yango, Biblia ekebisi biso ete “mposa ya miso . . . euti na Tata te, kasi euti na mokili. Lisusu, mokili ezali koleka ndenge moko mpe mposa na yango, kasi moto oyo azali kosala mokano ya Nzambe azali kotikala libela na libela.”​—1 Yoane 2:16, 17.

Toli ya Biblia eleki nde makasi? Ata moke te! Koboya kolanda yango ezali nde komilukela mikakatano mpe bampasi. (Bagalatia 6:7, 8) Kasi kotosa Liloba ya Nzambe, ezala mpe toli na yango ya bwanya mpo na liso, ememelaka moto esengo. Yesu alobaki ete: “Esengo . . . na baoyo bazali koyoka liloba ya Nzambe mpe kotosa yango.” (Luka 11:28) Lisusu, baoyo batosaka yango bazali na elikya ya kotikala na bomoi libela awa na mabele; kasi bato ya liso ya bilulelá mpe ya lokoso bakozanga esengo mpe bomoi.