“Fololo na lisobe”

KOZANGA mosala. Komata ya ntalo ya biloko. Bobola. Kobeba ya nkita. Makambo oyo mazali koyokama mbala mingi na bansango. Mazali komonisa mikakatano oyo bamilio na bato bazali kokutana na yango mpo na komeka komizwela bilei, bilamba mpe efandelo mpo na mabota na bango.

Ezala bato oyo bazali bandimi to baoyo bazali bandimi te, bango nyonso bazali kokutana na makambo wana. Kasi bandimi bazali bobele bango moko te baoyo bazali koluka kolonga mikakatano wana. Kolobaka na bato ya bopolo na ekeke ya liboso, Yesu ayebisaki ete: “Botala bandeke na likolo ete bakokonaka te mpe bakobukaka te, bakoyanganisaka na ebombelo mpe te; nde Tata na bino na Likolo azali koleisa bango. Bino nde boleki bango na motuya te?”​—Matai 6:26.

Yesu alobaki lisusu ete: “Botala fololo na lisobe, lokola ezali yango kokola; ekosalaka mosala te, ekosonaka mpe te; nde nazali koloba na bino ete ata Salomo na nkembo na ye nyonso alataki bilamba lokola moko na yango te. Soki Nzambe azali kolatisa matiti na elanga . . . akoleka kolatisa bino te?”​—Matai 6:28-30.

Tosengeli kosukisa na koloba ete moklisto akoki te kosala mosala mpo na kobikela? Ezali bongo te! Moklisto asengeli kosala engebene makoki na ye mpo na kokokisa bamposa na ye. Ntoma Paulo alobaki ete: “Soki moto nani alingi kosala mosala te, alya mpe te!” (2 Batesaloniki 3:10) Nzokande, moklisto ayebi ete Nzambe azali kotyela ye likebi litondi na bolingo mpe ayebi ete Tata na ye na likolo azali komibanzabanza mpo na ye. Na yango, mitungisi ya bomoi mizali kobungisela ye bokatikati na ye te. Ata kati na bantango ya mpasi, azali kotya makambo maleki ntina, makambo ya elimo, na esika ya liboso. Azali kondima maloba na Yesu ete: “Bolukaka nde liboso bokonzi [na Nzambe] mpe boyengebene na Ye mpe biloko wana mosusu bikobakisama na bino.”​—Matai 6:33, MN.