Ozali kotonga likoló ya zɛlɔ to ya mabanga?

OSEPELAKA kotánga Biblia? Motatoli ya Yehova moko ayaka mbala na mbala kotala yo mpo na koyekola Biblia elongo na yo? Soki ezali bongo, na ntembe te, ozali komona ete boyebi oyo ozwi esalisi yo oyeba malamu ntina oyo mokili etondi na mikakatano. (Emoniseli 12:9, 12) Longola yango, osili koyeba bavɛrsɛ mingi ya Biblia oyo ekoki kobɔndisa yo ntango okutani na makambo ya mpasi mpe oyo ekoki kopesa yo elikya mpo na mikolo ezali koya.​—Nzembo 145:14; 147:3; 2 Petelo 3:13.

Kozwa boyebi ya sikisiki ya Biblia ezali likambo ya ntina mingi mpo na moto oyo alingi kokóma moyekoli ya Klisto. Kasi esuki kaka wana? Te. Mpo moyekoli ya Biblia azala ntango nyonso moklisto ya solo​—mingimingi ntango kondima na ye emekami—​asengeli kosala likambo mosusu. Likambo nini? Mpo na kozwa eyano, tótalela mwa moke Lisolo Likoló ya Ngomba, lisukulu oyo Yesu asalaki na ngomba moko ya Galilai.​—Matai 5:1, 2.

Ndako mibale

Oyebaka malamu makambo oyo ezali na Lisolo Likoló ya Ngomba? Okoki kotánga yango na Evanzile ya Matai mpe ya Luka. (Matai 5:1–7:29; Luka 6:20-49) Okoki kotánga lisolo yango mobimba na boumeli ya miniti 20 mpamba. Atako bongo, ezali na maloba oyo euti na bisika kolela 20 na Makomami ya Liebele mpe bandakisa koleka 50. Moko na bandakisa yango elobeli kotongama ya bandako mibale. Ndakisa yango ezali na ntina mingi mpamba te Yesu apesaki yango mpo na kosukisa lisolo na ye. Soki okangi ntina ya ndakisa yango, okoyeba oyo okoki kosala mpo otikala moyekoli ya Klisto ata ntango okutani na makambo oyo emeki kondima na yo.

Yesu alobaki boye: “Moto nyonso oyo ayokaka maloba na ngai oyo mpe atosaka yango akokokana na moto ya mayele, oyo atongaki ndako na ye likoló ya mabanga. Mpe mbula enɔkaki makasi mpe mpela eyaki mpe mipɛpɛ epɛpaki mpe ebɛtaki ndako yango, kasi ebukanaki te, mpo yango ezwaki moboko likoló ya mabanga. Lisusu, moto nyonso oyo ayokaka maloba oyo ya ngai mpe asalelaka yango te akokokana na moto ya zoba, oyo atongaki ndako na ye likoló ya zɛlɔ. Mpe mbula enɔkaki makasi mpe mpela eyaki mpe mipɛpɛ epɛpaki mpe ebɛtaki ndako yango mpe ebukanaki, mpe kokwea na yango ezalaki monene.”​—Matai 7:24-27.

Moto “oyo atimolaki mpe akitisaki libulu mosika na nse”

Liteya nini ya ntina mingi Yesu alingaki kopesa bayekoli na ye na ndakisa ya bato mibale oyo batongaki bandako? Mpo na koyeba yango, tótalela malamumalamu maloba ya Yesu. Likambo nini osimbi na ntina na bandako yango mibale? Mbula mpe mipɛpɛ ebɛtaki bandako yango mibale. Mbala mosusu bandako yango ezalaki komonana ndenge moko. Mbala mosusu mpe etongamaki esika moko​—mbala mosusu kutu ezalaki pembeni mpenza. Atako bongo, moko etongamaki likoló ya zɛlɔ mpe mosusu likoló ya mabanga. Ndenge nini ekokaki kosalema? Ndenge Evanzile ya Luka emonisi yango, moto ya mayele “atimolaki mpe akitisaki libulu mosika na nse” mpo atya fondasyo na yango na mabanga. (Luka 6:48) Na ndenge yango, ndako ya moto ya mayele epikamaki makasi.

Yesu alukaki komonisa likanisi nini? Yesu apesaki ndakisa yango mpo na kolobela likambo oyo mokomoko na bato oyo batongaki bandako asalaki, kasi te mpo na kolobela ndenge bandako yango ezalaki komonana, to esika oyo ezalaki, to mpe makasi ya mbula to ya mipɛpɛ. Moko na bato yango atimolaki libulu mosika; kasi, mosusu asalaki bongo te. Ndenge nini okoki kolanda ndakisa ya moto ya mayele oyo atimolaki libulu mosika? Yesu ye moko abimisaki likanisi ya ntina ya ndakisa na ye na maloba oyo: “Bongo, mpo na nini bozali kobenga ngai ‘Nkolo! Nkolo!’ kasi bozali te kosala makambo oyo ngai nazali koloba? Moto nyonso oyo azali koya epai na ngai mpe azali koyoka maloba na ngai mpe azali kosalela yango, nakolakisa bino soki akokani na nani: Akokani na moto . . . oyo atimolaki mpe akitisaki libulu mosika na nse mpe atyaki moboko likoló ya mabanga.”​—Luka 6:46-48.

Ya solo, kosuka kaka na koyoka mateya ya Biblia to kotánga Biblia na ndako ezali lokola kotonga ndako likoló ya zɛlɔ​—yango esɛngaka kotimola te. Kasi, kosalela mateya ya Klisto esɛngaka kosala milende. Na ndenge ya elilingi, yango esɛngaka kotimola mosika tii na mabanga.

Na yango, mpo na kotikala moyekoli ya Klisto, moto asengeli kosalela makambo oyo azali koyoka. Soki na bomoi na yo ya mokolo na mokolo, ozali kosalela makambo oyo ozali koyekola na Biblia, ozali lokola moto ya mayele oyo atimolaki libulu mosika. Yango wana, moyekoli mokomoko ya Biblia asengeli komituna mituna oyo: ‘Nasukaka kaka na koyoka, to nasalelaka mpe makambo yango? Nasukaka kaka na kotánga mpe koyekola Biblia, to nasalelaka batoli na yango ntango nazali kozwa bikateli?’

Matomba ya kotimola libulu mosika

Tótalela ndakisa ya José. Baboti na ye bateyaki ye mitinda ya Biblia banda bomwana; kasi ayekolaki mpenza Liloba ya Nzambe na mozindo te. José alobi boye: “Ntango nalongwaki na ndako, namekaki kosala makasi nazala moto malamu kasi nazalaki kotambola na baninga ya mabe. Nakómaki komɛla bangi, kosala pite, mpe nazalaki ntango nyonso kobunda.”

Nsukansuka, José azwaki ekateli ya kobongola bomoi na ye mpe komipesa na koyekola Biblia. José alobi boye: “Nakómaki mpenza na mposa ya kobongwana nsima ya kotánga Lisolo Likoló ya Ngomba mpe kokanga ntina na yango. Kasi, esɛngaki ntango mingi mpo nabongola bomoto mpe etamboli na ngai. Na ebandeli, nazalaki kobanga ete ‘baninga’ na ngai bakotyola ngai, kasi nalongaki kobanga yango. Natikaki lokuta mpe koloba maloba ya nsɔni mpe nakómaki koyangana na makita ya Batatoli ya Yehova. Namonaki ete, ndenge Yesu alakaki yango, kozala na bomoi ezangi mindɔndɔ mpe kosalela batoli ya Biblia epesaka esengo ya solosolo.”​—Matai 5:3-12.

Matomba nini okozwa soki otimoli libulu mosika mpo na kotonga likoló ya mabanga, elingi koloba, soki ozali kosalela makambo oyo ozali kotánga na Liloba ya Nzambe? Yesu alobaki boye: “Ntango mpela eyaki, ebale ebɛtabɛtaki ndako yango, kasi ezalaki makasi mingi te mpo na koningisa yango, mpo etongamaki malamu.” (Luka 6:48) Ya solo, soki otongi malamu, elingi koloba ozali kosalela makambo oyo ozali koyekola, mipɛpɛ makasi ekokweisa ndako na yo te, na maloba mosusu, komekama ekobebisa kondima na yo te. Yango ezali likanisi ya kolendisa mpenza!

Moyekoli Yakobo, ndeko ya Yesu, alobelaki litomba mosusu oyo moyekoli ya Biblia akozwa soki azali moyoki mpamba te kasi azali moto oyo asalelaka Liloba ya Nzambe. Akomaki boye: “Bókóma batosi ya liloba, kasi bayoki kaka te . . . Moto oyo azali kotalatala na kati ya mobeko ya kokoka oyo ezali ya bonsomi mpe oyo azali kotingama na yango, moto wana, lokola akómi moyoki oyo abosanaka te, kasi moto oyo azali kosala mosala, akozala na esengo na kosaláká yango.”​—Yakobo 1:22-25.

Ya solo, bato oyo basalelaka batoli ya Biblia bazalaka mpenza na esengo. Esengo yango epesaka bayekoli ya Klisto makasi ya koyika mpiko liboso ya mikakatano oyo emekaka kondima na bango to ezaleli na bango ya kokangama na Nzambe.

Osengeli kosala nini?

Na Lisolo Likoló ya Ngomba, Yesu amonisaki ete mbala mingi, kosalela Yehova Nzambe esɛngaka kopona likambo moko kati na makambo mibale. Na ndakisa, Yesu alobaki ete moto akoki kozala na liso alima to na liso ya mabe; moto akoki kozala moombo ya Nzambe to ya bomɛngo; moto akoki kotambola na nzela ya moke to na nzela ya monene. (Matai 6:22-24; 7:13, 14) Na ndakisa ya bato mibale oyo batongaki ndako, oyo Yesu apesaki mpo na kosukisa lisolo na ye, ayebisaki bayekoli na ye bápona likambo moko: Kosala lokola moto ya mayele to moto ya zoba.

Soki ozali kosalela na motema mobimba makambo oyo ozali koyekola na Biblia, ozali kosala lokola moto ya mayele. Ya solo, kotimola libulu mosika ekomemela yo mapamboli mingi lelo oyo mpe na mikolo ezali koya.​—Masese 10:25.

[Bililingi na lokasa 30]

Mpo na kopikama makasi tosengeli kosalela makambo oyo tozali koyekola