“Bókamata ekanganeli na ngai likoló na bino”

¹ Na mokili oyo etondi na mitungisi, tozwi mpenza libɔndisi ya solosolo ndenge tondimi kozwa ekanganeli ya Yesu oyo epesaka bato kopema. (Mat. 11:​29, 30) Kondima ekanganeli ya Klisto elimboli kokóma moyekoli na ye, mpe kosala mosala oyo ezali na mikakatano kasi ebɔndisaka. Yango esɛngi mpe kosakwela bato nsango malamu ya Bokonzi, kosalisa bango mpe bázwa libɔndisi na nzela ya ekanganeli ya Yesu oyo ezali pɛtɛpɛtɛ.​—⁠Mat. 24:14; 28:​19, 20.

² Mosala ya kosakola epesaka biso makasi: Yesu asɛngaki bayekoli na te bábakisa ekanganeli na ye na mikumba na bango. Asɛngaki bango nde bápesa ye mikumba na bango ya kilo mpe bázwa mokumba na ye ya pɛpɛlɛ. Totikaka lisusu te ete mitungisi ya ebongiseli ya makambo ya ntango oyo mpe kozanga elikya ekómisa mitema na biso kilo; tobomaka mpe nzoto te mpo na bomɛngo oyo ekoki kobunga lelo to lobi. (Luka 21:34; 1 Tim. 6:17) Atako tozalaka na makambo mingi ya kosala mpe tosengeli kosala mosala mpo na kozwa mwa eloko ya kobikela, totyaka nde losambo ya Nzambe na esika ya liboso na bomoi na biso. (Mat. 6:33) Soki totalelaka makambo oyo eleki ntina na ndenge ebongi, tokomona mosala ya kosakola kilo te, mpe mosala yango ekopesa biso makasi ntango nyonso.​—⁠Filp. 1:⁠10.

³ Biso nyonso tosepelaka kolobela makambo oyo tolingaka. (Luka 6:45) Baklisto balingaka Yehova mingi mpe mapamboli oyo alaki kopesa bato na nzela ya Bokonzi na ye. Na bongo, tozwaka mpenza makasi ntango toyebisaka bato “nsango malamu ya makambo ya malamu” mpe tobosanaka mitungisi na biso ntango tozali kosakola. (Lom. 10:15) Ya solo, soki moto azali kosala likambo moko mbala na mbala, ayebaka yango malamu, mpe akómaka na esengo mingi. Na yango, soki tosakolaka mingi, na kotalela makoki na biso, tokozwa lisusu makasi mingi. Longola yango, tolendisamaka mpenza ntango bato bandimaka nsango oyo tosakwelaka bango. (Mis. 15:⁠3) Soki tobosani te ete Yehova asepelaka na milende oyo tosalaka mpe ye nde asalaka ete milende na biso ebota mbuma malamu, tokozwa makasi na mosala ya kosakola ata soki bato baboyi koyoka biso to bazali kotɛmɛla biso.​—⁠Mis. 5:41; 1 Kol. 3:⁠9.

⁴ Lokola tondimi ekanganeli ya Yesu, tozali na libaku malamu ya kosala elongo na ye lokola Batatoli ya Yehova. (Yis. 43:10; Emon. 1:⁠5) Likambo yango epesaka biso makasi koleka makambo mosusu nyonso!