Yesu, bomoi na ye mpe mosala na ye

Yesu azali komilengela mpo na kokumisa Paque na ye ya nsuka

WANA MOKOLO ya mardi 11 Nisan ekomaki na nsuka, Yesu asilisi koteya bantoma na ye likoló na ngomba na Olives. Oyo nde mokolo na mosala mingi mpe na kolemba! Sikawa, mbala mosusu na kozongáká na Béthanie mpo na kolala kuna, Yesu alobi na bantoma na ye ete: “Boyebi ete nsima na mikolo mibale Páque ekosalama, mpe bakokaba Mwana na moto mpo na koboma ye na nzete.”

Ezali Komonana ete mokolo elandi, Mercredi 12 Nisan, Yesu afandi esika moko ya kimya elongo na bantoma na ye. Mokolo oyo mozalaki liboso, akweisaki polele bakonzi na mangomba mpe asosolaki ete balingaki koboma ye. Ezali mpo na yango amimonisi polele te mokolo yango, mpamba te alingi ete eloko moko epekisa ye te kokumisa Páque elongo na bayekoli na ye mpokwa elandi.

Na ntango yango, banganga minene mpe mikoló na bato bayangani na ndako monene na nganga monene, Kaife. Na kotungisamáka na mitema mpo na mpamela oyo Yesu alobaki na bango lobi loleki, babongisi mwango mpo bakanga ye na nkuku mpe ete baboma ye. Balobi ete: “Kasi na boumeli na elambo (feti) te, ete mobulu ebima kati na bato te.” Bazalaki kobanga bato, mpamba te bato basepelaki na Yesu.

Wana bakonzi na mangomba bazalaki kosala mwango ya mabe mpo na koboma Yesu, bazwi mopaya moko. Bakamwi na komona ete ezali moko na bantoma na Yesu, Yuda lscariote, oyo epai na ye Satana akonaki likanisi mabe ya kokaba Nkolo na ye. Basepelaki mingi ntango Yuda atunaki bango: “Bolingi kopesa ngai nini soko nakokaba ye epai na bino?” Nokinoki bandimi kopesa ye palata 30, motuya na moombo engebene kondimana na Mibeko ya Moise. Uta ntango yango, Yuda alukaki libaku moko ya malamu mpo na kokaba Yesu esika oyo bato bazali te.

Le 13 Nisan ebandi Mercredi na kolala ya moi. Wana Yesu akomaki na Jéricho Vendredi, ezalaki butu ya motoba mpe ya nsuka oyo alekisaki na Béthanie. Na mokolo molandi. Jeudi, esengeli kosala bibongiseli ya nsuka mpo na Páque, oyo ekobanda na kolala ya moi, ntango mwana na mpate na páque asengeli kobomama mpe kotumbama mobimba. Bakosala elambo epai wapi , mpe nani akosala bibongiseli?

Naino Yesu apesi malako te mpo na likambo yango, mbala mosusu ezali mpo ete Yuda akende koyebisa banganga minene esika yango te mpe bakoka kokanga ye te na boumeli na molulu ya Pàque. Kasi sikawa. ekoki kozala noki nsima ya midi ya Jeudi, longwa na Béthanie Yesu atindi Petelo na Yoane, na koyebisáká bango ete: “Kenda kobongisa Pàque mpo na biso ete tolya yango.” Bango nde batuni boye: “Olingi ete tobongisa yango wapi?”

Yesu alimboli bango ete: Wana ekokoka bino na mboka mobali moko akozwana na bino komema mbeki na mai. Bila ye kati na ndako kuna ekokota ye. Mpe loba na mokolo na ndako ete: ’Molakisi alobi na yo ete: Wapi eteni na ndako kuna ekolya ngai Paque esika moko na bayekoli na ngai?’ Ye wana akotalisa bino eteni monene na mokili na likolo esili kotandama. Bongisa wana.

Mokolo ndako azali moyekoli na ye, oyo azali komizela mbala mosusu ete Yesu asenga ye basalela ndako na ye mpo na libaku oyo kitoko. Atako bongo, ntango Petelo na Yoane bakomi na Yelusaleme, bamoni makambo nyonso lokola Yesu asakolaki Na yango, babongisaki mwana na mpate mpe basalaki bibongiseli nyonso mpo ete bato 13, elingi koloba Yesu mpe bantoma na ye 12, bakoka kokumisa Páque. matai 26:1-5,14-19; Malako 14:1, 2, 10-16; Luka 22:1-13; Exode 21:32.

◆ Lolenge emonani, likambo nini Yesu asali mokolo ya Mercredi, mpe mpo na nini?

◆ Likita nini esalami epai na nganga monene, mpe na mokano nini Yuda akei kotala bakonzi ya mangomba?

◆ Yesu atindi nani na Yelusaleme mokolo ya Jeudi, mpe mpo na ntina nini?

◆ Baoyo Yesu atindaki bakuti likambo nini, oyo ezali lisusu elembo emonisi ete azali na nguya na kokamwisa?