Yesu, bomoi na ye mpe mosala na ye

“Bakateli ye etumbu ya liwa”

KOLINGAMAKA bansinga lokola mobomi na yauli, Yesu akumbami epai na Anne, nganga monene ya kala mpe moto monene na nguya. Anne azalaki nganga monene wana Yesu azalaki na mibu 12, ntango akamwisaki balakisi na Bayuda mpo na boyebi na ye na temple. Bana mingi ya Anne bakomaki banganga minene na nsima, mpe, sikawa, ezali nkoko na ye, Kaife, nde moto azali kokokisa mokumba yango.

Emonani mpenza solo ete Yesu akumbami liboso epai na Anne, mpamba te nganga monene wana azali uta kala kokokisa mokumba monene kati na makambo matali lingomba na Bayuda. Kokangama wana epai na Anne epesi nzela na nganga monene Kaife ete ayanganisa basangani 71 ya Sanedrina, esambiselo monene na bayuda, mpe na koyanganisa batatoli na lokuta.

Anne, nganga monene, atuni sikawa Yesu na ntina na bayekoli na ye mpe na mateya na ye. Kasi Yesu ayanolaki ye ete: “Ngai nasololi polele kati na mokili. Ntango nyonso nalakisi polele kati na eyanganelo mpe kati na temple wana Bayuda nyonso bazali koyangana; nasololi likambo moko na nkuku te. Mpo na nini ozali kotuna ngai? Tuna bango basili koyoka makambo masololaki ngai na bango. Bango bayebi makambo malobi ngai.”

Na nsima moko na bapolisyé oyo atelamaki pene na Yesu abeti ye mbata, kolobáká ete: “Ozali kozongisela nganga monene na lolenge boye?”

“Yesu azongiseli ye ete, soko nalobi mabe, tatola mpo na mabe yango; nde soko nalobi malamu. mpo na nini obeti ngai?” Nsima na kolobana wana, Anne atindi Yesu oyo alingámi na nsinga epai na Kaife.

Na ntango wana, banganga minene nyonso, mikóló mpe bakomeli, elingi koloba Sanedrina mobimba. ebandi koyangana.

Emonani lokola ete, likita yango lisalemaki epai na Kaife. Atako eyokanaki te na mibeko na Bayuda na kosala esambiseli motindo wana na butu ya Pasika, mikóló na lingomba baboyi kotika mwango na bango ya mabe.

Baposo mingi liboso, ntango Yesu asekwisaki Lazare, Sanedrina ezwaki ekateli ya koboma ye. Mpe bobele mikolo mibale mpamba na nsima, mercredi, mikóló na lingomba basalaki mwango ya kokanga ye, na nzela na mayele mabe, mpo na koboma ye. Kanisa naino mwa moke, Yesu akatelami etumbu ya liwa liboso nkutu ete asambisama!

Sikawa bazali kosala molende ya kozwa batatoli oyo bamilengeli mpo na kopesa matatoli ya lokuta mpo na koyanganisa bilembeteli nyonso na ntina na ye. Nzokande, matatoli yango ezali na boyokani te. Na nsuka na yango, batatoli mibale batelemi mpe balobi ete: “Toyoki ye koloba ete: ‘Ngai nakoboma Temple oyo esalami na maboko, mpe nsima na mikolo misato nakotonga mosusu ekosalama na maboko te.’”

Kaife atuni ete. “okozongisa monoko te? Makambo bato oyo balobi na ntina na yo ezali solo?” Kasi Yesu akangi monoko. Mpo na nsoni monene ya Sanedrina, ata kati na efundeli wana ya lokuta, bilembeteli ya batemwe wana mibale bizali na boyokani te. Na bongo. Kaife ameki lisusu mwango mosusu.

Ayebi ete Bayuda bazali kotomboka ntango moto moko amikumisi ete ye azali Mwana na Nzambe. Mbala mibale liboso, basukisaki nokinoki na kolobaka ete Yesu azalaki motuki oyo abongi kokula, mpamba te balobaki ete, Yesu amikumisaki ete azali motindo moko na Nzambe, nzokande ezalaki bongo te. Kosaleláká mayele mabe. Kaife asengi bongo na Yesu ete: “Nazali kokatisa yo ndai na Nzambe na bomoi ete oloba na biso soko yo ozali Klisto, Mwana na Nzambe!”

Atako likanisi na Bayuda ezalaki nini, Yesu azali mpenza Mwana na Nzambe. Na kofandáká nyee, akokaki komonisa lokola azali kowangana ete azali Mwana na Nzambe te. Na bongo, Yesu ayanoli na mpiko nyonso ete: “Ngai nazali, mpe bokomona Mwana na moto kofanda na loboko mobali na nguya mpe koya kati na mapata na likoló.”

Na maloba wana, kosaláká geste moko monene. Kaife apasoli bilamba na ye ya likoló mpe angangi ete: “Asili kotuka! Tozali lisusu koluka litatoli mpo na nini? Sikawa bosili koyoka maloba na kotuka! Bino bokanisi nini?”

Sanedrina esakoli ete, “abongi kokufa.” Na bongo babandi koseka ye, mpe kotuka ye. Bamosusu bazali kobeta ye mpe kobwakela ye nsoi na elongi. Bamosusu bazali kozipa elongi na ye mpe kobeta ye makofi kolobáká na mongongo ya kotyola ete: “Sakwela biso, yo Klisto, nani abeti yo?” Wana ezali makambo mabe mpe ezangi kondimama na mibeko oyo basalelaki Yesu na boumeli ya kosambisama na ye na butu. Matai 26:57-68; 26:3, 4; Malako 14:53-65; Luka 22:54, 63-65; Yoane 18:13-24; 11:45-53; 10:31-39; 5:16-18.

◆ Yesu akumbamaki epai wapi liboso, mpe likambo nini akomelaki ye?

◆ Na nsima Yesu akumbamaki epai wapi, mpe mpo na nini?

◆ Ndenge nini Kaife asali mpo ete Sanedrina ekatela Yesu etumbu ya liwa?

◆ Makambo nini ya mabe mpe ezangi kondimama na mibeko basali epai na Yesu na boumeli ya kosambisama na ye na butu?