Yesu bomoi na ye ,mpe mosala na ye
Yesu akweisi batemeli na ye
YESU abulunganisaki batemeli na ye bakonzi na mangomba kino babangaki kotuna ye mituna mosusu. Na yango Ye atunaki bango liboso mpo na komonisa polele kozanga na bango ya boyebi Atuni bango ete: “Bino bokanisi nini mpo na Klisto? Azali nde mwana na nani?”
Bafalisayi bazongiseli ye monoko ete: ’‘Mwana na David”.
Kozanga koboya ete Davidi azali nkoko na mosuni na Klisto to Masiya, Yesu atuni motuna oyo ete: “Mpo na nini Davidi na kopemama na Nzambe (na Nzembo 110), abiangaki ye ’Nkolo’, na kolobaka: ‘Jéhovah alobaki na Nkolo na ngai ete: “Fanda na loboko na ngai na mobali kino nakotia bayini nyonso na yo na nse na makolo na yo” ’? Soko nde David abiangaki ye ‘Nkolo‘, azali mwana na ye boni?
Bafalisayi bafandaki swi, mpamba te bayebaki te soko Klisto to mopakolami azalaki nani mpenza Kokesana na ndenge oyo Bafalisai bazalaki kokanisa, Masiya azali bobele mokitani na Davidi te, kasi azalaki na bomoi na likoló mpe azalaki mokolo koleka David; azalaki Nkolo na ye.
Sikawa abaluki epai na ebele na bato mpe bayekoli na ye, Yesu akebisi bango mpo na bakomeli mpe Bafalisayi. Lokola ezali mibali yango nde bazali koteya Mibeko na Nzambe, ‘nakofandaka na kiti na Moise’, Yesu alobi ete: “Bongo makambo nyonso makoloba bango na bino, bosala yango mpe botosa yango.” Kasi abakisi, ’’nde bosala mosala mokosalaka bango te, mpamba te bakolobaka nde bazali kosala te’’.
Bazali bakosi, mpe Yesu akweisi bango bobele na maloba oyo asalelaki mokolo oyo aliaki epai na Mofalisayi moko mwa basanza liboso. Alobi ete: ”Bazali kosala misala nyonso na bango ete bato batela bango.” Mpe mpo na yango apesi bandakisa:
“Bazali koyeisa ba (kasete) na bango minene oyo ezali na mikapo na Makomami na kati, (kasete) oyo bazali komema lokola libateli.” Bakasete oyo ezalaki mwa moke bazalaki komema yango na elongi to na loboko ebombaki na kati biteni minei na Mibeko: Exode 13:1-10,11-16; mpe Deteronome 6:4-9; 11:13-21, Bafalisayi, bango, bazalaki koyeisa bakasete yango minene mpo na kokamwisa bato ete bazali kobatela Mibeko na molende.
Yesu alobi lisusu ete “bazali koyeisa nsonge na bilamba na bango milai” Na Mituya 15:38-40, Bayisraele bazuaki etinda ya kobakisa ndelo to nsonge na bilamba na bango; kasi Bafalisayi bazalaki koyeisa nsonge na bilamba na bango molai koleka bato nyonso. Na misala na bango nyonso, balingi komimonisa! Yesu apameli bango ete: “Balingi bisika na lokumu”.
Kasi na mawa nyonso, bayekoli na ye balongamaki na mposa yango ya kozwa lokumu epai na bato. Mpo na yango Yesu apesaki bango toli oyo: “Bino bobiangama Labi te, mpamba te moko azali molakisi na bino, bino nyonso bozali bandeko Bobianga moto tata awa na mokili te, mpamba te moko azali Tata na bino, oyo na Likoló. Bobiangama mpe ‘bakambi’ te, mpamba te moko azali Mokambi na bino, ye Klisto.” Bayekoli basengeli kolongola na mitema na bango mposa ya kozala na esika ya liboso. Ezali mpo na yango Yesu alendisi bango na maloba oyo ete: “Ye oyo aleki monene na bino akozala mosungi na bino.”
Lisusu, abimisi maloba mingi na kolakela mabe likoló na bakomeli mpe Bafalisai, na kolobaka mbala mingi ete bazali bakosi. Alobi ete, bazali ‘kokanga bokonzi na makoló liboso na bato’ mpe ete, “bakolyaka ndako na basi—bakufeli-mibali mpe bakobondelaka mabondeli milai mpo na kokosa“
Yesu alobi: ‘’Mawa na bino, bakambi bakufi miso.” Akweisi Balifasai mpo ete bazali kozua biloko ya elimo na motuya te, elembetelo mpo na yango ezali ete bazali kozua bikateli na ndenge bango moko balingi. Na ndakisa, bazali koloba ete: ‘Soki moto akokata ndai na temple azali na likambo te nde; soko nani akokata ndai na wolo oyoezali na kati na temple, ndai ekokanga ye.’ Na kolobela mingi mpo na wolo na temple koleka motuya na makambo na elimo oyo malali esika yango na losambo, bazali komonisa ezaleli na bango ya kokufa miso na bizaleli malamu.
Lisusu, lokola asilaki kosala yango, Yesu akweisi Bafalisayi mpo ete bazali komonisa bopotu na “makambo maleki na bozito kati na Mibeko, yango: kosambisa-sembo mpe koyoka mawa mpe bosembo”, wana ezali bango kotia likebi mingi na bofuti na ndambo na zomi, elingi koloba ndambo na zomi na makambo mikemike mazangi ntina.
Yesu abiangi Bafalisai ete bazali ‘bakambi bakufi miso, baoyo bazali kokanga ngungi na kiyungulu kasi bazali komela chamo’! Ya solo, soki bazali kokanga kati na kiyungulu ngungi oyo ekwei kati na vinyo na bango, ezali bobele te ete ezali nyama moke, kasi mpo ete ezali mbindo engebene losambo. Nzokande, na kozalaka na bopotu na makambo minene koleka na Mibeko, ezali lokola bazalaki komela chamo, oyo mpe ezali nyama moko ya mbindo engebene losambo. Matai 22:41 kino 23:24; Malako 12:35-40; Luka 20:41-47; Levitike 11:4, 21-24.
◆ Mpo na nini Bafalisai bafandi swi ntango Yesu atuni bango na ntina na maloba na David oyo makomami kati na Nzembo 110?
◆ Mpo na nini Bafalisayi bazali koyeisa bakasete na bango minene oyo ezali na mikapo na Makomami na kati mpe bazali koyeisa milai nsonge to ndelo na bilambo na bango?
◆ Toli nini Yesu azali kopesa na bayekoli na ye?
◆ Ezaleli nini ya kozwa bikateli na bango moko Bafalisayi bazali komonisa mpe na maloba nini Yesu akweisi bopotu na bango mpo na makambo maleki ntina.