LITEYA 55
Pesá mabɔkɔ na lisangá oyo ozali
Na mokili mobimba, Batatoli ya Yehova basambelaka Yehova na kati ya bankóto ya masangá. Bazalaka na botɔndi mpo na mateya mpe litambwisi oyo bazwaka, mpe na esengo nyonso bapesaka mabɔkɔ na lisangá na makambo ndenge na ndenge. Yo mpe, osalaka bongo?
1. Ndenge nini okoki kosalela ntango mpe makasi na yo mpo na kopesa mabɔkɔ na lisangá?
Biso nyonso tokoki kopesa mabɔkɔ na lisangá. Na ndakisa, ezali na bandeko oyo bakómi mibange to oyo bazali bibɔsɔnɔ na lisangá na bino? Okoki kosalisa bango báyanganaka na makita? To okoki kosalisa bango na makambo mosusu, na ndakisa, kosalisa bango na kosomba biloko to kotyela bango bopɛto na ndako? (Tángá Yakobo 1:27.) Okoki mpe kotya bopɛto to kobongisa Ndako ya Bokonzi. Moto moko te atindaka biso na makasi tósala makambo yango. Bolingo na biso mpo na Yehova mpe mpo na bandeko na biso nde etindaka biso ‘tómipesa na bolingo na biso moko.’—Nzembo 110:3.
Bandeko oyo bazwá batisimo bakoki kosalisa lisangá na makambo mingi. Bandeko oyo bakokisi makambo oyo Biblia esɛngi bakoki kokóma basaleli na misala mpe na nsima bankulutu. Bandeko basi mpe mibali bakoki kokóma babongisi-nzela mpo na komipesa lisusu mingi na mosala ya kosakola. Bandeko mosusu bakoki kopesa mabɔkɔ na mosala ya kotonga bisika ya losambo to kokende na masangá oyo mposa ezali mingi.
2. Ndenge nini tokoki kosalela mbongo na biso mpe biloko na biso mpo na kosalisa lisangá?
Tokoki ‘kokumisa Yehova na biloko na biso ya motuya.’ (Masese 3:9) Tomonaka ete ezali lokumu kopesa mbongo mpe biloko na biso mpo na kopesa mabɔkɔ na lisangá mpe na mosala ya kosakola na mokili mobimba. (Tángá 2 Bakorinti 9:7.) Makabo na biso esalelamaka mpe mpo na kosalisa bandeko na biso oyo bazwi likama. Bandeko na biso mingi basepelaka kotya “mwa eloko pembeni” mbala na mbala mpo na kopesa likabo. (Tángá 1 Bakorinti 16:2.) Tokoki kopesa makabo na nzela ya bakɛsi oyo ezalaka na bisika ya losambo to na nzela ya Internet na donate.jw.org. Kosalela biloko oyo tozali na yango mpo na kosalisa lisangá emonisaka ete tolingaka Yehova.
KƆTÁ NA MOZINDO
Luká koyeba makambo oyo okoki kosala mpo na kosalisa lisangá.
3. Tokoki kopesa biloko na biso
Yehova ná Yesu balingaka baoyo bapesaka na motema moko. Na ndakisa, Yesu akumisaki mwasi mobola oyo mobali akufá oyo apesaki Yehova likabo atako azalaki na mbongo moke mpenza. Tángá Luka 21:1-4, mpe na nsima yanolá na mituna oyo:
Tosengeli kopesa mbongo mingi mpo na kosepelisa Yehova?
Ndenge nini Yehova ná Yesu batalelaka makabo oyo topesaka na motema mobimba?
Mpo na koyeba ndenge oyo makabo na biso esalelamaka, talá VIDEO. Mpe na nsima yanolá na motuna oyo elandi.
Ndenge nini makabo na biso esalelamaka mpo na bolamu ya masangá na mokili mobimba?
4. Tokoki komipesa mpo na kosalisa
Na ntango ya kala, basaleli ya Yehova bazalaki kosala na molende mpo na kobatela bisika ya losambo. Kasi yango esɛngaki kaka kopesa mbongo te. Tángá 2 Ntango 34:9-11, mpe na nsima yanolá na motuna oyo:
Moyisraele mokomoko asalaki nini mpo na kobatela ndako ya Yehova to bisika ya losambo?
Mpo na komona ndenge Batatoli ya Yehova balandaka ndakisa wana ya Biblia, talá VIDEO. Mpe na nsima yanolá na mituna oyo elandi.
Mpo na nini kobatela mpe kobongisa Ndako ya Bokonzi ezali na ntina?
Ndenge nini okoki kosalisa?
5. Bandeko mibali bakoki kosala makambo mingi na lisangá
Biblia elendisi bandeko mibali ete básala nyonso oyo bakoki mpo na kopesa mabɔkɔ na lisangá. Mpo na komona ndakisa moko, talá VIDEO. Mpe na nsima yanolá na motuna oyo elandi.
Na video yango, Ryan asalaki nini mpo na kopesa lisusu mabɔkɔ mingi na lisangá?
Biblia elobeli makambo oyo bandeko mibali basengeli kosala mpo bákóma basaleli na misala mpe bankulutu. Tángá 1 Timote 3:1-13, mpe na nsima yanolá na mituna oyo:
Biblia elobi ete bandeko mibali oyo bazali koluka kokóma basaleli na misala mpe bankulutu basengeli kosala nini?
Mabota na bango esengeli kozala ndenge nini? —Talá vɛrsɛ 4 mpe 11.
Soki bandeko mibali bazali kosala makasi mpo na kokokisa makambo oyo Biblia esɛngi bango, bolamu nini lisangá mobimba ekozwa?
SOKI MOTO ATUNI YO: “Batatoli ya Yehova bazwaka mbongo wapi mpo na misala na bango?”
Okopesa eyano nini?
NA MOKUSE
Yehova asepelaka mingi ndenge tosalelaka ntango na biso, makasi na biso mpe biloko na biso mpo na kosalisa lisangá.
Bozongeli
Ndenge nini tokoki kosalela ntango na biso mpe makasi na biso mpo na kopesa mabɔkɔ na lisangá?
Ndenge nini tokoki kosalela biloko na biso mpo na kosalisa lisangá?
Okosepela kopesa mabɔkɔ na lisangá na makambo nini?
MAKANISI MOSUSU
Luká koyeba mpo na nini Nzambe asɛngaka lisusu te ete basaleli na ye bápesa dime.
“Biblia elobi nini mpo na dime?” (Lisolo oyo ezali na Internet)
Biblia epesi bandeko mibali oyo bazwá batisimo mwa mikumba ya kosala. Kasi tokoloba nini soki ndeko mwasi oyo azwá batisimo alingi kokokisa mikumba yango?
“Mokumba oyo bankulutu bazali na yango na kati ya lisangá” (Linɔ́ngi ya Mosɛnzɛli ya 02/2021)
Talá ndenge Batatoli ya Yehova mosusu bamonisaka mpiko mpe bamipesaka mpo na komemela bandeko na bango mikanda.
Kokabola mikanda oyo elimbolaka Biblia na République Démocratique du Congo (4:25)
Ndenge tozwaka mbongo mpo na kosala mosala na biso ekeseni na oyo ya mangomba mosusu.
“Batatoli ya Yehova bazwaka mbongo wapi?” (Lisolo oyo ezali na Internet)