Yesu, bomoi na ye mpe mosala na ye

Bazali na elikya na boumeli ya mikolo na nsuka

MARDI 11 Nisan ekomi na nsuka na yango. Yesu azali elongo na bantoma na ye likoló na ngomba ya Olive. Kala mingi te bautaki kotika kartye ya temple, oyo bazali komona ete ekomi na nse, mpe Yesu asololaki elongo na bango mpo na bilembo ya kozonga na ye, ntango akozwa bokonzi, mpe mpo na nsuka na biloko na ntango oyo.

Na nsima Yesu akebisaki bango mpo na bamasiya ya lokuta. Alobi ete: “Bakomeka kopengwisa baponami” soko likoki ezali. Kasi, lokola mpongo oyo bamonaka mosika, baponami bakoyangana esika oyo bilei na elimo esengeli kozala, elingi koloba elongo na Masiya ya solo na boumeli ya bozongi na ye kozanga komonana Bakozimbisama te to mpe bakosangana na masiya moko ya lokuta te.

Bamasiya ya lokuta bakomimonisa bobele na lolenge ya polele. Nzokande, kozonga na Klisto ekozala ya kozanga komonana. Lokola alobi yango ye moko, ekozala na eleko moko ya mpasi ya lisolo na bato: “Moi ekoyinda mpe sanza ekopesa pole na yango te.” Ee, ekozala ntango ya molili koleka ya Lisolo mobimba ya bato. Ekozala lokola soki moi eyindi, lokola soki sanza ezalaki kopesa pole na yango lisusu te na butu.

Yesu akobi na kolobaka ete: “Nguya na makoló ekotetema.” Na wana azali komonisa ete makoló oyo mazali komonana makozala elembo mpo na kopesa likebisi epai na bato. Makoló makozala bobele esika ya bandeke te; ba avions ya bitumba ba fusées mpe ba sondes spatiales ekolekaleka kati na yango. Kobanga mpe mobulu ekongala koleka kati na lisolo mobimba ya bato.

Tala ntina Yesu azali koloba ete “mitema na mabota mikozala na likoló mpo na mikakatano na konguluma na kotomboka na mai monene. Bato bakosenzwa na nsomo na kotalela makambo makobima kati na mikili”. Ee, lokola Yesu alobi yango, ntango wana, oyo ya molili koleka uta moto azalisama, ekosuka na ntango oyo ’’elembo na Mwana na moto ekomonana na likoló mpe mabota nyonso na mokili bakolela”.

Kasi bato nyonso bakolela te ntango ‘Mwana na moto akozonga na nguya’ mpo na koboma biloko mabe na ntango oyo. “Baponami” ba 144 000 oyo bakosangana na Bokonzi ya likoló elongo na Klisto, bakolela te ndenge moko mpe mpo na baninga na bango baoyo Yesu abengaki liboso ete “bampate mosusu” na ye. Atako bazali na bomoi na boumeli ’na mikolo ya molili koleka kati na lisolo ya bato, balendisami na’ elendiseli oyo ya Yesu: “Wana ekobanda makambo oyo kobima, telema alima mpe tombola mitó na bino mpo ete lisiko na bino ezali kobelema.”

Mpo ete bayekoli na ye bakoka, na boumeli ya mikolo oyo ya nsuka, koyeba ete nsuka ebelemi, Yesu apesaki lisese oyo: ’‘Botala nzete ya figi, na nzete mosusu nyonso, soko nkasa na yango esili kobima, bokotala yango na miso na bino mpenza mpe bokoyeba ete ntango na kotela na biloko elingi koya. Bino mpe bongo, wana ekomona bino makambo oyo kobima, boyeba ete bokonzi na Nzambe ezali penepene. Nalobi na bino solo ete libota oyo ekoleka soko moke te kino ekobima makambo oyo nyonso.”

Na yango, ntango bayekoli na ye bakomona kokokisama ya makambo ndenge na ndenge ya elembo, bakoyeba ete nsuka ya biloko ya ntango oyo ebelemi mpe ete mosika te Bokonzi na Nzambe ekosilisa mabe nyonso. Na yango, nsuka ekoya wana baoyo bakomona kokokisama ya makambo nyonso oyo Yesu asakolaki bazali naino na bomoi. Na nsima apesaki likebisi oyo mpo na bayekoli na ye oyo bakozala na bomoi na mikolo ya nsuka oyo ya mpasi:

“Keba na bino ete mitema na bino mikoma makasi mpo na kolunda te. Soko na kolangwa te, soko na mitungiseli na bomoi te. Bongo mokolo yango ebimela bino pwasa lokola motambo te. Mpo ete ekobimela bato nyonso balandi na mikili nyonso. Senzela ntango nyonso, mpe bondela ete bozala na makasi na kokima makambo oyo nyonso malingi koya, mpe na kotema liboso na Mwana na moto.” Matai 24:23-51; Malako 13:21-37; Luka 21:25-36; Emoniseli 14:1, 3; Yoane 10:16.

◆ Makambo nini ya mokili mazali komonisa bozongi ya Klisto?

◆ Ntango nini ‘mabota nyonso ya mokili bakolela, kasi bayekoli na Klisto bakosala nini na ntango yango?

◆ Lisese nini Yesu apesaki mpo na kosalisa baoyo bakokoma bayekoli na ye na koyeba kobelema ya ntango na nsuka?

◆ Likebisi nini Yesu apesaki epai na bayekoli na ye oyo bakozala na bomoi na boumeli ya mikolo na nsuka?