Mokumba ya Malia na mokano ya Nzambe

NTANGO Yesu azalaki awa na mabelé, mwasi moko oyo azalaki na kati ya ebele ya bato agangaki ete: “Esengo na matrisi oyo ememaki yo mpe na mabɛlɛ oyo omɛlaki!” Soki Yesu alingaki ete bato básambelaka mama na ye, alingaki kosalela libaku wana mpo na kolendisa bato básalaka yango. Nzokande, alobaki ete: “Te, kasi nde, Esengo na baoyo bazali koyoka liloba ya Nzambe mpe kobatela yango!”​—Luka 11:27, 28.

Ata mokolo moko te Yesu akumisaki mama na ye lokoka Nzambe; ayebisaki mpe bayekoli na ye te ete básalaka yango. Kasi, mpo na nini ebele ya bandimi ya mitema sembo basambelaka Malia? Tótala oyo Biblia elobi mpo na makambo oyo bato bateyaka na ntina na mama ya Yesu.

“Otóndí ngrásya,” “opambolami na kati ya basi”

Anzelu Gabiliele ayebisaki Malia mokumba oyo akozala na yango na mokano ya Nzambe. Na libaku yango, apesaki ye mbote na maloba oyo: “Mbote, moto oyo bamoniseli boboto mingi, Yehova azali elongo na yo.” (Luka 1:28) Libongoli mosusu ya Biblia ebongoli mbote yango ete: “Losáko, otóndí ngrásya, Mokonzi azalí na yó.” Mwa moke na nsima, Elizabeti apesaki Malia mbote na maloba oyo: “Opambolami na kati ya basi, mpe mbuma ya matrisi na yo epambolami!” (Luka 1:42) Maloba yango emonisi nde ete tosengeli kosambela Malia?

Te! Atako bato ya Katolike bakɔtisá maloba yango na mabondeli na bango, Biblia elobi te ete tosengeli kobondelaka Malia. Gabiliele ná Elizabeti bayebaki mokumba monene oyo Malia azalaki na yango ya kobota Masiya, kasi Biblia elobi ata esika moko te ete tosengeli kosambelaka ye. Nzokande, ntango bayekoli ya Yesu basɛngaki ye alakisa bango ndenge ya kobondela, Yesu ayebisaki bango bábondelaka nde Tata na ye. Kutu, libondeli oyo Yesu apesaki lokola ndakisa ebandaka na maloba oyo: “Tata na biso na likoló.”​—Matai 6:9.

Azali moko ya bakonzi

Liteya mosusu oyo epalangani mingi na ntina na Malia ezali ete lelo oyo, azali “Mokonzi-mwasi ya likoló.” Biblia epesi ye titre ya ndenge wana ata esika moko te. Kasi, Biblia emonisi ete azali na esika ya lokumu na ebongiseli ya Nzambe na likoló. Esika yango ezali nini?

Yesu alobaki ete bayekoli na ye mosusu ya sembo bakoyangela elongo na ye na Bokonzi na ye. (Luka 22:28-30) Yesu akopesa bango nguya ya kosala lokola “banganga-nzambe mpo na Nzambe na biso, mpe basengeli koyangela mabelé.” (Emoniseli 5:10) Biblia esalisi biso tómona ete Malia azali na kati ya bato oyo bazwi mokumba wana ya ntina mingi. Mpo na nini tolobi bongo?

Ntango mosusu oyebi ete nsima ya liwa ya Yesu, Malia, bayekoli ya Yesu mpe bandeko na ye “bamipesaki na mabondeli.” Bayekoli soki 120, elongo na “basi moko boye,” bayanganaki mpo na kobondela. (Misala 1:12-15) Biblia elobi boye: “Wana mokolo ya fɛti ya Pantekote ezalaki koleka bazalaki bango nyonso elongo na esika wana moko,” ntango elimo santu ya Nzambe ekitelaki bango mpe epesaki bango likoki ya koloba na minɔkɔ mosusu.​—Misala 2:1-4.

Lokola Malia mpe azalaki na kati ya bato oyo bazwaki elimo santu, yango emonisi ete ye ná basi mosusu oyo bazalaki mpe wana baponamaki mpo na koyangela elongo na Yesu na Bokonzi ya likoló. Yango wana, tokoki mpenza kondima ete lelo oyo, Malia azali elongo na Yesu na likoló. (Baloma 8:14-17) Tótala mwa mikumba oyo ye ná bato mosusu oyo bakoyangela elongo na Yesu bakozala na yango mpo na kokokisa mokano ya Nzambe.

Bakopesa bato mapamboli

Mokanda ya Emoniseli elobi ete bato 144 000 bakosekwa mpo na kokende likoló mpo na kosala elongo na Yesu lokola banganga-nzambe, basambisi, mpe bakonzi. (Emoniseli 14:1, 4; 20:4, 6) Lokola banganga-nzambe, bakosalela mbeka ya Yesu mpo na kokómisa bato nyonso ya botosi bato ya kokoka na makambo nyonso. (Emoniseli 21:1-4) Eleko kitoko wana ekozala mpenza esengo mpo na basambeli nyonso ya Yehova ya sembo!a

Malia azalaki mpe azali kaka na mokumba monene na kokokisama ya mokano ya Yehova. Tosengeli mpenza komekola ye mpo na komikitisa, kondima mpe botosi na ye, mpe ndenge azalaki mama ya malamu, mpe ayikaki mpiko na mikakatano. Lokola abotaki Masiya mpe azali na kati ya bato oyo bakopesa bato mapamboli ya seko, ebongi tópesa ye limemya mingi.

Kasi, liteya monene oyo tozwi epai ya Malia ezali ete, ye moko ná basaleli mosusu ya Nzambe, basambelaka nde Yehova kasi nzambe mosusu te. Malia ná bato oyo bakoyangela elongo na Klisto na likoló, bazali koloba na mongongo makasi ete: “Na Oyo afandi na kiti ya bokonzi [Yehova Nzambe] mpe na Mwana-Mpate [Yesu Klisto] lipamboli mpe lokumu mpe nkembo mpe nguya ezala libela na libela seko.”​—Emoniseli 5:13; 19:10.

[Maloba na nse ya lokasa]

[Likanisi ya paragrafe na lokasa 10]

Tosengeli komekola komikitisa, kondima, mpe botosi ya Malia