LITEYA 51
Ndenge nini maloba na biso ekoki kosepelisa Yehova?
Ntango Yehova asalaki biso, apesaki biso likabo moko kitoko, likoki ya koloba. Ndenge oyo tosalelaka likabo yango ezali mpenza na ntina na miso na ye? Ɛɛ! (Tángá Yakobo 1:26.) Na yango, ndenge nini tokoki kosalela likoki na biso ya koloba na ndenge oyo ekosepelisa Yehova?
1. Ndenge nini tokoki kosalela malamu likoki ya koloba?
Biblia eyebisi biso ete “[tókoba] kobɔndisana mpe kolendisana.” (1 Batesaloniki 5:11) Oyebi bato oyo bazali na mposa bálendisa bango? Okoki kosala nini mpo bámiyoka malamu? Yebisá bango ete ozwaka bango na valɛrɛ mingi. Okoki koyebisa bango likambo moko ya malamu oyo osepelaka na yango epai na bango. Okoki mpe kolakisa bango vɛrsɛ moko oyo ekoki kosalisa bango! Bavɛrsɛ oyo okoki kosalela ezali mingi. Kobosana te: Maloba na yo mpe ndenge oyo ozali koloba ekoki kosalisa basusu to kopesa bango mpasi. Yango wana, salá makasi olobaka ntango nyonso na boboto.—Masese 15:1.
2. Tosengeli koboya maloba ya ndenge nini?
Biblia elobi: “Liloba ya kopɔla ebima na monɔkɔ na bino te.” (Tángá Baefese 4:29.) Yango elingi koloba ete tosengeli te kozala na maloba mabe, maloba makasi mpe maloba ya kozokisa oyo ekosala moto mpasi na motema. Tosengeli mpe te kokosela bato makambo to kotɔnga bango.—Tángá Masese 16:28.
3. Tosengeli kosala nini mpo tózala na maloba ya kolendisa?
Mbala mingi, makambo oyo tolobaka emonisaka mpenza oyo ezali na motema to na makanisi na biso. (Luka 6:45) Yango wana, tosengeli kosala makasi tókanisaka makambo ya malamu, ya pɛto, makambo oyo ekoki kolingama mpe makambo oyo ebongi kokumisama. (Bafilipi 4:8) Mpo tótya makanisi na makambo yango, tosengeli kopona malamu baninga, masano mpe makambo mosusu. (Masese 13:20) Lisusu, ekozala malamu tózwaka ntango ya kokanisa liboso ya koloba. Talá oyo maloba na yo ekoki kosala basusu. Biblia elobi: “Koloba kozanga kokanisa ezali lokola kozokisa na mopanga, Kasi lolemo ya bato ya bwanya ebikisaka.”—Masese 12:18.
KƆTÁ NA MOZINDO
Luká koyeba oyo okoki kosala mpo maloba na yo esepelisa Yehova mpe esalisa basusu.
4. Zalá na maloba ya malamu
Na bantango mosusu, biso nyonso tolobaka maloba oyo na nsima epesaka biso mawa. (Yakobo 3:2) Tángá Bagalatia 5:22, 23, mpe na nsima yanolá na mituna oyo:
Na bizaleli oyo bavɛrsɛ oyo elobeli, oyo wapi okoki kosɛnga Yehova mpo esalisa yo ozala na maloba ya malamu? Ndenge nini bizaleli yango ekoki kosalisa yo?
Tángá 1 Bakorinti 15:33, mpe na nsima yanolá na motuna oyo:
Baninga mpe masano to makambo mosusu ekoki kosala ete okóma na maloba ya ndenge nini?
Nini ekoki kosala ete okóma na maloba ya malamu to ya mabe?
Tángá Mosakoli 3:1, 7, mpe na nsima yanolá na motuna oyo:
Ntango nini ebongi kofanda kimya to kozela ntango ya malamu mpo na koloba?
5. Lobáká malamu mpo na basusu
Ndenge nini tokoki koboya kofinga basusu to koloba na bango mabe? Talá VIDEO, mpe na nsima yanolá na mituna oyo elandi.
Na video yango, mpo na nini ndeko mobali alingaki kobongola ndenge oyo azalaki koloba na basusu?
Asalaki nini?
Tángá Mosakoli 7:16, mpe na nsima yanolá na motuna oyo:
Likambo nini tosengeli kobosana te ntango tolingi koloba mabe mpo na basusu?
Tángá Mosakoli 7:21, 22, mpe na nsima yanolá na motuna oyo:
Ndenge nini bavɛrsɛ yango ekoki kosalisa yo osilika te ntango moto moko alobi mabe mpo na yo?
6. Zalá na boboto ntango ozali kosolola na bato ya libota na yo
Yehova alingi ete tómonisaka boboto mpe bolingo ntango tozali kosolola na bato ya libota na biso. Talá VIDEO, mpe na nsima yanolá na motuna oyo elandi.
Nini ekosalisa yo olobaka na bato ya libota na yo na boboto?
Tángá Baefese 4:31, 32, mpe na nsima yanolá na motuna oyo:
Maloba ya ndenge nini esalaka ete bato ya libota bámiyoka malamu?
Yehova alobaki polele ete alingaka mwana na ye, Yesu. Tángá Matai 17:5, mpe na nsima yanolá na motuna oyo:
Ndenge nini okoki komekola Yehova ntango ozali kosolola na bato ya libota na yo?
Luká mabaku oyo ekosalisa yo oyebisa basusu makambo ya malamu oyo osepelaka na yango epai na bango
SOKI MOTO ALOBI NA YO: “Nalobaka nyonso oyo eyelaka ngai na motó. Bato básepela, básepela te, etali ngai te.”
Yo mpe okanisaka bongo? Mpo na nini?
NA MOKUSE
Makambo oyo tolobaka ekoki kosalisa basusu to kopesa bango mpasi. Yango wana, tosengeli kokanisa malamumalamu makambo oyo tokoloba, ntango oyo tokoloba yango, mpe ndenge oyo tokoloba yango.
Bozongeli
Ndenge nini okoki koloba mpo na kosalisa basusu?
Maloba ya ndenge nini tosengeli koboya?
Nini ekosalisa biso tózala ntango nyonso na maloba ya boboto mpe oyo elendisaka?
MAKANISI MOSUSU
Nini ekoki kosalisa biso tózala na maloba malamu?
Talá makambo oyo ekoki kosalisa yo oboya maloba mabe.
“Mpo na nini koboya koloba maloba ya mabe?” (Lisolo oyo ezali na Internet)
Talá oyo okoki kosala mpo okwea te na motambo ya kotɔnga basusu.
Talá ndenge Yehova asalisaki moto moko atika maloba mabe.