¹³ Yesu alobelaki mpe makambo mosusu oyo bato bayebaki mpo na nzela yango oyo ezalaki ‘kouta na Yerusaleme ekiti na Yeriko.’ Ndenge lisese yango emonisi, liboso nganga-nzambe moko azalaki koleka na nzela yango, mpe na nsima Molevi moko, kasi moko te na bango atɛlɛmaki mpo na kosalisa moto yango. (Luka 10:31, 32) Banganga-nzambe bazalaki kosala na tempelo mpe Balevi bazalaki kosalisa bango. Banganga-nzambe ná Balevi mingi bazalaki kofanda na Yeriko soki ezali ngala na bango te ya kosala na tempelo; Yeriko ekabwanaki na Yerusaleme kaka na ntaka ya kilomɛtrɛ 23. Na yango, bato bakokaki komona bango na nzela wana. Lisusu, tósimba ete Yesu alobaki ete moto yango ya mobembo ‘azalaki kokita,’ kasi azalaki komata te na nzela oyo ‘eutaki na Yerusaleme.’ Bayoki na ye bakangaki ntina ya likambo yango. Yerusaleme ezalaki likoló, Yeriko na nse. Na yango, soki moto ya mobembo ‘auti na Yerusaleme,’ azalaki nde “kokita.”b Ezali polele ete Yesu azalaki kolobela likambo oyo bayoki na ye bayebaki.